Molar um málfar XLV

   Venjulegt er að  talað um brim þegar bárur brotna á  ströndum ,  stórbrim þegar  hvasst er og öldurnar háar. Það var þessvegna  svolítið   skrítið á   lesa  í Vefmogga  (07.04) að brim hefði valdið stórtjóni á  grásleppunetum á  30 faðma dýpi. Samkvæmt minni máltilfinningu er  brim upp  við land  ekki úti á sjó.  Hvað  segja menn um það ?

  Lesa mátti  á Vefdv (07.04): „ .... fréttastjóri Al-Jazeera hefur neitað fyrir það að maðurinn hafi starfað fyrir stöðina."  Það er  ekki   rétt til orða  tekið  að tala um að   "neita fyrir eitthvað". Það  er  hægt að neita  einhverju, þvertaka  fyrir   eitthvað, hafna  einhverju, en ekki  „neita  fyrir eitthvað".

 Einnig af  Vefdv (07.04) „ ... þar sem hann  sagðist blöskra umræðan í þjóðfélaginu.....". Þarna  hefði  til dæmis mátt segja :  ..þar sem hann sagði að sér  blöskraði umræðan í þjóðfélaginu...". Mér blöskrar til dæmis  framkoma  þingmanna  þessa  dagana.

  „Hverjir eru það sem,  sem  eru að bera ábyrgð á ......." . Úr  þingræðu 07.04.  Sóttin hefur borist  í Alþinghúsið.

   Vegna  athugasemdar   við  þessa pistla hér á  dögunum  er rétt að lýsa þeirri skoðun  skrifara að  lygi   verður ekki sannleikur, þótt  hún sé  endurtekin  þúsund  sinnum. Þannig  verður  slæmt  mál  ekki  gott mál þótt  það  sé  endurtekið þúsund sinnum.  Forseti Alþingis  sagði  af forsetastóli (07.04): „Háttvirtur þingmaður hefur kveðið sér hljóðs". Þótt þetta sé  sagt þúsund sinnum verður það ekki   góð og gild íslenska. Jafnvel  reiðareksmenn  um þróun málsins   ættu að geta  viðurkennt það.

Athugasemdir

[Ben.Ax. (Benedikt Jóhannes Axelsson), 8.4.2009 kl. 21:03]

Talað er um brim við strönd. Ég er sammála þér í öllum greinum fram að þessu.

[Sverrir Einarsson, 8.4.2009 kl. 21:04]

Hefur þingmaðurinn þá hvatt sér hljóðs?

[Ben.Ax. (Benedikt Jóhannes Axelsson), 8.4.2009 kl. 21:05]

Eru grásleppunet hugsanlega lögð stutt frá strönd á 30 faðma dýpi?

[Lana Kolbrún Eddudóttir, 8.4.2009 kl. 22:30]

Hvað segir þú um málfarið í þessari setningu, úr frétt á ruv.is í kvöld kl. 20:40 ?

„Kaupendum að íbúðum við Lindargötuturninn í Skuggahverfinu hefur verið boðið íbúðir í nálægum byggingum. ”

[Haukur Nikulásson, 9.4.2009 kl. 09:05]

" Venjulegt er að  talað um brim"

Tillögur til úrbóta:

 " Venjulega er að  talað um brim"

" Venjulegt er að  talað sé um brim"

Fyrirgefðu mér Eiður, stóðst ekki mátið.

[Eiður (IP-tala skráð) 9.4.2009 kl. 10:44]

Þakka þér  ,Haukur. Þarna átti  auðvitað að standa: ,,Venjulegt er að talað sé um brim". Það er  svona  þegar hugurinn fer fram úr fingrunumþ

[Gústaf Níelsson, 9.4.2009 kl. 17:44]

Þetta er slungið með brimið, því bæði brimar úti á sjó og á ströndum. Mér sýnist að orðið hafrót hefði verið brúklegast í þessu samhengi.

[Eiður (IP-tala skráð) 9.4.2009 kl. 18:03]

Sammála,Gústaf. Hafrót hefði verið besta orðið.

[Jón Arnkelsson (IP-tala skráð) 14.4.2009 kl. 01:38]

Orðið brim getur þýtt "þegar alda brotnar á grynningum eða við strönd".

Ef aldan er orðin það mikil að hún brotnar á 30 faðma dýpi, þá er það brim samkvæmt mínum málskilningi.