Molar um málfar XLII

 Nú er  hafin  sú  tíð,  að mikið  er um  kappakstursmyndir  í fréttum og  dagskrá  sjónvarpsstöðvanna.  Þetta efni  er algjörlega utan míns áhugasviðs, en mér  er ljóst að margir hafa  áhuga á þeim kappakstri  sem  kenndur er  við  „formúlu".  Það verður hinsvegar að gera þá  kröfu  til þeirra sem  flytja  þessar fréttir  að þeir  tali   óbrenglaða íslensku.  Í  kvöld (03.04.) sagði ,,formúluvitringur" Stöðvar  tvö: „..bronsverðlaunin,sem  hefðu fallið Hamilton í té". Þetta er  rugl.  Hann hefði  getað  talað  um  bronsverðlaunin  sem hefðu fallið Hamilton í  skaut, eða  sem  hefðu komið í hlut  Hamiltons.   Sami fréttamaður  sagði, að  tiltekinn  maður  hefði  viðurkennt„ að hafa  falið sannleikann".  Á    góðu máli hefði  verið  sagt, að  maðurinn hefði  viðurkennt að hafa sagt ósatt,- logið.

„Mikilvægt að virða grundvallarreglur á umrótatímum", sagði  (04.04.) í  fyrirsögn á Vefmogga. Ég staldraði við þetta.Orðið  umrót  er   hvorugkyns,  eintöluorð. Það er því  rangt að  tala um „umrótatíma". Orðið umbrot  sem líka  er hvorugkyns er  hinsvegar fleirtöluorð. Þessvegna  hefði mátt tala um umbrotatíma.

 Agnes Bragadóttir blaðamaður  er  hörkutól og  skrif  hennar um fjármálahneyksli  hafa  reynst  vönduð og  vel  grunduð. Hún á  hrós  skilið  fyrir  einurð og hefur  greinilega  gott  tengslanet, -   hóp fólks  sem  sýnir henni  verðskuldað  traust. Það  var  skemmtilega lýsandi í  Silfri Egils (05.04), þegar hún talaði um  „ elsku krakkana í  Fjármálaeftirlitinu".  Svo hafði ég lúmskt gaman af því þegar hún notaði orðið „frumafrit". Ég  er ekki  að  gefa í  skyn að  Agnes hafi ekki verið  með traust  gögn í höndum, en þetta  minnti   mig  svolítið á  sölumanninn í Singapore ,sem  vildi  selja mér  Rolex úr.  „It´s a  real fake  Rolex",  sagði hann. Þetta var sem sé  ekta óekta Rolex. Mér fannst þetta  svo  snjallt  hjá  honum að ég keypti úrhjallinn sem ég held  að hafi kostað  10  dali, -  og  hætti að ganga    áður en  dagur var kvöldi kominn.

Athugasemdir

[Birgir Örn Birgisson, 6.4.2009 kl. 09:18]

Já ég tók eftir þessu líka ,,frumafrit".

Skondið :)

[S.H. (IP-tala skráð) 6.4.2009 kl. 13:50]

Sæll,

það er gott að tala vandað mál.  Tungumál er hins vegar tæki til tjáningar.  Þess vegna er ekkert því til fyrirstöðu að menn búi til ný orð jafn óðum eða setji saman orð með óhefðbundnum hætti.  Það er ekki orðið sem skiptir máli heldur meiningin.

Íslenska er þannig tungumál að gera verður greinarmun á rituðu og töluðu máli, ritmál getur oft hljómað furðulega eða illa sem talmál og öfugt.  Það er líka endalaust hægt að tína til málvillur (strangt til tekið) eða eins og þú oft skrifar um, hefði verið hægt að orða betur.  Þannig segir maður stundum setningar sem gætu alveg verið betur sagðar ef maður endurskoðar það.  Það skiptir líka máli við hvaða aðstæður hlutirnir eru sagðir, eru þeir sagðir í flýti?  Er þetta ræða?  Er þetta viðtal?  Er pressa á viðkomandi?  Og svo mætti lengi telja.

Mér finnst fínt að gagnrýna augljósar vitleysur og beinlínis kolrangt málfar fjölmiðla en að hlusta og líta eftir orðum og setningum alla daga sem betur hefðu mátt fara finnst mér nú furðulega langt gengið, jaðrar við áráttuhegðun.

Ég var því að velta fyrir mér hvort þú engist ekki um af kvölum alla daga og missir svefn því þú kemst ekki gegnum einn einasta dag án þess að heyra setningu sem hefði mátt vera betur orðuð eða heyra algenga málvillu?  Sumar eru reyndar svo útbreiddar að spyrja má hvort það séu nokkuð málvillur lengur, margir ísl.fræðingar eru á þvi að við ákveðna útbreiðslu villu, beri að líta á hana sem gilt málfar.

Takk fyrir.

[Drullusokki (IP-tala skráð) 6.4.2009 kl. 15:35]

Það er ekkert til sem heitir rétt mál.

[Sverrir Einarsson, 7.4.2009 kl. 14:30]

S.H. : Er þá málvillan sem margir nota "Spáðu í því" að þínu mati rétt mál, bara af því að það eru svo margir sem nota hana og hugsa ekkert um hvort þetta er rétt mál notkun eða ekki.

Íslenskan  verður fljótlega afskræmd ef Íslensku kennarar gefast upp á að kenna hana, bara af því það eru svo margir sem tala vitlaust, og seinna þá verður þetta "rétt málfar" af því að svo margir tala svona........þetta finnst mér bara endemis bull.

Annars er ég bara hress.