Molar um málfar XXXIX

  Lítill bæklingur kom inn um bréfalúguna í morgun með  dagblöðunum. Framan á honum stendur: „Afsláttur sem  telur". Þetta þykir  mér  ekki til  fyrirmyndar. Veit  að  vísu  að  reiðareksmenn um málfar   hafa sett  þessa  merkingu í orðabók, en merkja   jafnframt  sem  málnotkun  sem  ekki  sé  æskileg.  Hér  er  sögnin að  telja   látin  þýða   að eitthvað  skipti máli. Beint úr  ensku-  „something that  counts".

  Í  fyrirsögn á  dv.is  var  (01.04) talað um „Þekktustu böndin..." Af hverju   þarf að  nota  slettuna  „band" um  hljómsveit? Það  skil ég ekki.  Fyrir  allmörgum árum  töluðu  sumir  þulir RÚV  jafnan  um  „big band", þegar  var  verið að kynna   leik  fjölmennra jasshljómsveita. Nú  hefur  hið ágæta orð  stórsveit útrýmt  þessu  „big band" tali. Sem  betur fer.

Fréttamaður  Stöðvar tvö  tók  svo  til orða í  fréttum (01.04),  að  „margt væri ábótavant".  Það er  kannski ofsagt að mörgu hafi   verið ábótabót  um íslenskukunnáttu  fréttamannsins. Þetta hefði hann þó betur   orðað  á  annan veg.

Þingmenn sýna  Alþingi  ekki mikla  virðingu, þegar  þeir standa  bölvandi og ragnandi í ræðustóli eins og ítrekað hefur gerst að undanförnu. Þingmenn sýna   þinginu  heldur ekki  virðingu með  söng úr  ræðustóli. Það er fíflagangur.

Stöku sinnum  rekst  maður  á óborganlegar setningar á  Moggablogginu. Eins og  til  dæmis þessa (01.04): „Er þetta ekki meira fréttnæmt heldur en þessi steypa með Jesús Krist sem hélt ekki vatni." Skýr texti. Skýr hugsun.

Athugasemdir

[Hildur Helga Sigurðardóttir, 3.4.2009 kl. 03:01]

Gott hjá þér að taka þátt í því að halda tungunni hreinni.

[Sigurður Hreiðar, 3.4.2009 kl. 12:06]

Haltu áfram að halda utan um tunguna og segja til syndanna, Eiður. Ég gerði þetta líka um tíma og fékk þá hornhagldarlega sendingu hér á blogginu -- undir rós, þar sem talað var um „háaldraða málfarsperverta“. Hélt engu að síður áfram meðan mig þraut ekki örendið.

Með baráttukveðju

[Þorsteinn Briem, 3.4.2009 kl. 13:29]

Laglegar á honum leiðar,
lánlaus er Sigurður Hreiðar,
hann getur ei að því gert,
sá gamli málfarspervert.

[Eiður Svanberg Guðnason, 3.4.2009 kl. 14:35]

Þakka ykkur orðin, Hildur Helga og Sigurður Hreiðar. Langtum fleiri en mig dreymdi um hafa þakkað mér þessar athugasemdir. Að vera „háaldraður málfarspervert" er alveg sérstakur heiðurstitill. Kannski ættum við að stofna félag ?

 Mun ég halda þessu áfram  enn um sinn  eða uns mig þrýtur örendið.

Kveðjur -  Eiður

[Orðaleppur (IP-tala skráð) 3.4.2009 kl. 20:58]

http://www.visir.is/article/20090403/LIFID01/124622665

Hef reyndar veitt því athygli áður, að það hafa orðið hausavíxl á notkun "af" og "að" í máli fólks. Ekki bara á visir.is.