Molar um málfdar XXXVIII

 Úr Vefmogga (31.03) ,,Síld hefur vaðið um Hafnarfjarðarhöfn undanfarnar vikur."  Bara  veður  um höfnina !  Hvíklík ósvífni.  Samkvæmt málvenju ætti  hér  að  segja  : Síld  veður  Í Hafnarfjarðarhöfn. En lesendur Vefmogga  geta andað  rólega því seinna í sömu frétt  segir:,,Ekki er talin sérstök hætta stafa  af síldinni þar sem  straumar inn og út úr höfninni  hreinsa  hana nokkuð vel" . Mikið  var það nú gott, -  hættuleg skepna  síldin .

 ,,Fyrr í þessari viku flaug Madonna, 50 ára, til Malaví ásamt þremur börnum hennar Lourdes, Rocco og David Banda."  Vefvísir 31.03. Madonna flaug  til Malavi ásamt   þremur  börnum hennar. Hennar hverrar ? Auðvitað  flaug  hún til  Malaví  ásamt þremur börnum sínum.

,,Aka þarf með sérstakri gát um Kambana á Hellisheiði en þar er nú fljúgandi hálka."  Vefmoggi 31.03. Um Kambana  á Hellisheiði ! Það var og. Líklega  hefur sá  sem  skrifaði þessa frétt aldrei  ekið austur yfir Fjall.

Einkennileg er sú árátta ýmissa þingmanna, að geta aldrei  sagt ég  nema  bæta  við  orðinu  sjálfur, - ég  sjálfur. Einkum  eru það  ungir þingmenn sem hafa  tilhneigingu  til  að tala  svona. Þessu  hef ég  tekið  eftir  bæði í bloggskrifum og  ræðum á  Alþingi.  Einu sinni  reyndu menn að forðast að  nota  fyrstu persónu fornafnið ég úr  ræðustóli  þingsins. Það er  liðin  tíð.

Athugasemdir

[Eiður Svanberg Guðnason, 1.4.2009 kl. 22:36]

Ekki er að spyrja að  fljótfærninni. Molar um máldfar! Biðst velvirðingar á  slökum yfirlestri.

[Sverrir Einarsson, 2.4.2009 kl. 10:47]

Já sko ég SJÁLFUR, sagt úr ræðustól Alþingis er til áherslu um að það hafi verið sjálfur þingmaðurinn sem sagði/gerði eitthvað en ekki sauðsvartur ALMÚGA maður. Var einhver að tala um stétta skiptingu á Íslandi?

[Jakob R. Möller (IP-tala skráð) 2.4.2009 kl. 21:18]

Ekki athugasemd, heldur aðdáun. Efast um, að nokkur annar gegni þessu nauðsynjahlutverki um þessar mundir. Vandinn er þó sá, að þeir sem helzt þyrftu að lesa, eru ólíklegastir til þess.