Molar um málfar XXXIII

  Nýtt orðatiltæki sá ég í Morgunblaðinu í morgun.  Þar  er verið að bera fram þakkir  til starfsfólks í  einu af útíbúum SPRON og  er  sagt að  þar,,hafi verið valinn  maður á hverjum  stað". Hér er augljóslega um að  ræða  nútíma afbökun á  orðatiltækinu  ,,valinn maður í hverju  rúmi". Þar þýðir  rúm  ekki  rekkja, heldur bilið milli þóftna í árabáti. Þetta er því úr  gömlu  sjómannamáli  þar sem miklu máli hefur skipt til dæmis í brimlendingum  að valinn maður væri í hverju  rúmi skipsins, við hverja ár. Líklega er fólk  núna  hrætt  við að nota  þetta    orðatiltæki vegna þess að  hin   gamla merking orðsins  rúm er  horfin  eða  að hverfa.

Fréttablaðið segir í dag frá nauðgunarkæru í Vestmannaeyjum. Í fréttinni er  tekið  svo  til  orða, að  atburðurinn  hafi ,, átt sér  stað í heimahúsi konunnar". Af hverju ekki á heimili konunnar  eða  heima hjá konunni ?

 Moggabloggari skrifar í gær ,,.... skora á ykkur ...   og kjósa með þessu  frumvarpi". Þetta orðalag finnst mér  ekki samræmast  góðri málvenju.  Hér  hefði verið   eðlilegra að tala um að greiða  atkvæði með  þessu frumvarpi, ekki kjósa  með því.

Þessi snilldarsetning var á  dv.is. í gær:,,Nú hefur Gunnar birt nýtt myndband þar sem hann segir meðal annars að hann hafi verið beðinn um að taka myndbandið út af stúlkunni." Það þýðir ekkert að spyrja hvað  sá sem skrifaði hafi verið að hugsa. Hann var greinilega ekki að hugsa.

 Þegar menn rugla saman Kjós og Kjalarnesi er það ekki mismæli, eins og  sagt var í Kastljósi kvöldsins. Það er  skortur á landafræðikunnáttu,-  staðarþekkingu.

Í Molum gærdagsins  nefndi ég hve snautleg mér fannst  frásögn  Stöðvar  tvö af   lokadegi  Geirs H. Haarde  á Alþingi. ,,Frétt" Morgunblaðsins  fór hinsvegar framhjá mér þar sem  tvinnað  var saman frásögn af  starfslokum Geirs í þinginu  og mynd af norskum leiðsöguhundi,sem  sjónskertur þingmaður hefur   fengið  sér  til trausts og halds var  óskiljanleg.     Afsökunarbeiðni sem   reyndar var  hálfgert yfirklór var svo birt  vegna harðra  viðbragða  frá lesendum, - ekki vegna þess að  Morgunblaðinu  fyndist að því hefði orðið á í messunni.

 Staldraði aðeins við  Sjónvarpsstöðina ÍNN í kvöld þar sem  sjónvarpsstjórinn talaði  við  sjálfan sig. Verð að játa að annan eins  fúkyrðaflaum og  níð um nafngreinda  einstaklinga hef ég   aldrei  heyrt í sjónvarpi fyrr.  Þeir sem  meira horfa  segja mér að þetta sé alltaf  svona. Þetta skipti í raun ekki nokkru  máli, því enginn taki mark á þessu  rugli. Ég komst hinsvegar ekki hjá því að heyra að  sjónvarpsstjórinn átti  erfitt  með að beygja orðið  dóttir  eins og   reglur  íslenskrar málfræði  gera  ráð  fyrir.