Molar um málfar XXVII

 Enn eitt  fyrirtækið  auglýsir nú undir heitinu „outlet". Fyrirtækið er til húsa á  Fiskislóð  Í Reykjavík og  selur  skó. Það  auglýsir: „ Tveir fyrir einn á öllum skóm á  tilboði". Ekki  get ég skilið það  öðruvísi en ef ég kaupi  einn skó þá fái ég tvo. -  Hvílík kjarakaup ! ,,Outlet" sýkin er bráðsmitandi því í dag auglýsa  tvö  fyrirtæki  undir þessu  hallærisnafni, þau eru  við sömu götuna, Faxafen. Líklega er þetta einhver  fenjapest.

„Ein stærsta kannabisræktun sögunnar", sagði í   þriggja dálka  fyrirsögn Mogga í  gær. Þarna hefði átt  að standa  mesta  en ekki „stærsta". Svo mætti líka  gefa því gaum að þetta  er   örugglega ekki mesta kannabisræktun sögunnar,  enda þótt það kunni að vera  mesta kannabisræktun sem  sögum fari af hér á landi. Það er annar handleggur. Svo segir Fréttablaðið okkur í dag: ,,Risavaxin Sony-auglýsing  tekin á Íslandi". Hér er átt við  sjónvarpsauglýsingu , geri ég ráð fyrir, en mér er hulin ráðgáta hvernig  hún getur verið   risavaxin ! Í fréttum RÚV sjónvarps í kvöld talað um ,,stóra mótmælagöngu í París", líklega hefur þá verið þar múgur og margmenni

Séð hef  ég í fréttum að nú standi til að  skipuleggja ferðir   til útlanda  til að  stunda fjárhættuspil, nánar tiltekið póker.  Er ekki einboðið að  fararstjórar í þeim ferðum verði útrásarvíkingarnir, sem   spilað hafa  fjárhættuspil með  peninga þjóðarinnar í útlöndum  undanfarin ár? Þeir hafa reyndar  allir  spilað rassinn úr  buxunum, ekki bara sínum , heldur líka okkar, en þannig  er nú fjárhættuspil.  Kannski mætti  fá  heiðursfararstjóra  af  Álftanesinu og  aðstoðarfararstjóra úr pókerliði Framsóknarflokksins !

Á Vefdv  stóð þessi setning í gær: „Árið 1989  eldaði hann mat ofan í George Bush þáverandi forseta Bandaríkjanna og  faðir  núverandi forseta". Þarna  ætti  auðvitað að standa   föður...   ekki faðir og   svo  er  Barack Obama  núverandi  forseti  Bandaríkjanna. Ekki er vitað til þess að George Bush  sé  faðir hans.  Það væri ekki vitlaust ef  ritstjórn DV  kannaði þegar  blaðamenn  eru  ráðnir  hvort þeir kunni að beygja  ýmis algengustu orð móðurmálsins  eins og  faðir,móðir, bróðir  og  systir. Stundum er  engu líkara en  ekki sé  lengur  fjallað um beygingar þessara orða í grunnskólanámi á Íslandi.

Á  Vefvísi   mátti lesa: „... þegar Þorsteinn fór erlendis". Það er  ekkert  til sem  heitir að  „fara erlendis". Við  förum til útlanda,  við  förum utan. Og við getum  dvalist langdvölum erlendis.  Seint lærist sumum að fara rétt með þetta.

Það er til marks um enskuvæðinguna að í Kastljósi í kvöld var áhorfendum, sem  vildu fræðast um Hjálparstofnun kirkjunnar bent á vefsíðuna ,,help.is". Þeim sem  vilja  fræðast um Akureyri   er í sjónvarpsauglýsingum bent á  vefinn´´visitakureyri.is". Líklega er ég  alveg  laus við að hafa húmor  því mér fannst dapurlegt hvernig Kastljós RÚV  byrjaði með  fíflagangi sem  hélt  síðan áfram með hallærisinnskotum út  þáttinn þar sem verið var að vekja  athygli á  fjársöfnun  í þágu góðs málstaðar.

Þessi pistill er skrifaður á  fartölvu sem ekki þýðist  beiðni mína  um  upphafsgæsalappir - alt0132. Kunningi benti mér  á einfalda lausn,  svo einfalda  að hún er  næstum brosleg. Slá bara inn tvær kommur! Það  þýðir að vísu  að ,,gæsalappirnar"  verða ekki alveg  eins við upphaf og enda tilvitnunar, en það verður að hafa það.

Athugasemdir

[Helga Kristjánsdóttir, 21.3.2009 kl. 04:22]

Þetta var þörf ábending,áhugavert að lesa. Hafði afar gaman að læra íslensku hjá sr.Eiríki skólastjóra á Núpi í Dýrafirði,var mín uppáhalds námsgrein.  Þótt ég sé farin að ryðga,særa einfaldar beygingarvillur fjölmiðlafólks mig. Prentvillur eru þó stundum orsök.

[Benedikt (IP-tala skráð) 21.3.2009 kl. 10:39]

Takk fyrir afar skemmtilega pistla. 

Hvað finnst þér annars um það þegar stjórnmálamenn, og fleiri, "taka umræðu" um öll mál?  Er ég sá eini sem læt þessa orðanotkun fara í taugarnar á mér?

[Ben.Ax. (Benedikt Jóhannes Axelsson), 21.3.2009 kl. 17:25]

Þakka fyrir skemmtilegan og þarflegan pistil að venju. Hugsanlega eru menn frekar ráðnir til fréttamennsku sem eru fljótir að hlaupa en vegna íslenskukunnáttu. En miðað við allar ambögur þeirra virðist brýn þörf á prófarkalestri sem er víst að mestu aflagður á fjölmiðlum.

[Magnús Guðni Kuwahara Magnússon (IP-tala skráð) 24.3.2009 kl. 14:49]

"Risavaxin Sony-auglýsing" - Mig grunar að sá sem skrifaði þetta hafi ekki ætlað að nota "risavaxin" í bókstaflegum skilningi. Að segja að eitthvað sé risavaxið þarf ekki endilega að merkja að það sé stórt í fermetrum eða rúmmetrum talið. Þarna er frekar um myndmál um að ræða, þar sem tilstandið við myndatökuna eða eitthvað slíkt er myndhverft svo að því er ljáð eiginleikar lifandi veru. Óvenjuleg orðanotkunin er til að auka áhrifin, eins og tíðkast í skáldskap og blaðamennsku.