Toyota - tungunni spillir

 

Gamalt   slagorð  Toyota á Íslandi er  Toyota – tákn um gæði. Þessa  dagana   fer ekki mikið  fyrir gæðum í orðavali  fyrirtækisins í  auglýsingum.  Fyrirtækið  gerir  ekki miklar kröfur til þeirra sem hanna  auglýsingar þess.

Mannhæðarhátt  upplýst auglýsingaskilti  með orðskrípinu “smælaðu” blasir   við öllum sem aka  suður Kringlumýrarbraut/Hafnarfjarðarveg. Skiltinu  hefur  verið komið  fyrir á þaki  bygginga fyrirtækisins  við  Nýbýlaveg og það er sem áður  sagði engin smásmíði.

Hversvegna þarf Toyota að  nota  orðskrípið og  enskuslettuna “smæla” í staðinn fyrir  fallegu íslensku  sögnina   að brosa?  Það er ofar mínum skilningi. Unnendur  íslenskra  tungu brosa  ekki ,þegar  þessi ósköp  stinga í augu  á leið út úr  borginni. Ég efast líka um að þeir  hugsi hlýtt til  fyrirtækisins.

Toyotamenn ættu að  sjá  sóma sinn í að breyta þessu og  tala  til okkar á  góðu máli.

Á  skiltinu ætti  að standa: Brostu J.

Annað  fyrirtæki  sem  misþyrmir íslensku í auglýsingum  er  Sparisjóðurinn Byr, sem  bullar í hverri  auglýsingunni  á  fætur annari um eitthvað sem þeir  kalla “ fjárhagslega heilsu”. Að  tala um  fjárhagslega  heilsu   er  bara  bull. Í  sama  dúr mætti  segja  að  Toyota og  Byr  séu ekki  við  góða “málfarslega heilsu”. Það er  auðvitað  sama  bullið.

 Fyrirtækin Toyota  og  Byr  eru ekki vönd  að  virðingu sinni  þegar kemur að  málfari í auglýsingum.

Athugasemdir

[Offari, 25.1.2009 kl. 14:58]

Ef þú smælar framan í heiminn smælar heimurinn framan í þig.

[Sæmundur Bjarnason, 25.1.2009 kl. 15:23]

Já, það er satt. Mörg fyrirtæki eru til stórskammar hvað þetta snertir og einhvers staðar verður að byrja. Það er engin afsökun fyrir svonalöguðu að aðrir séu jafnslæmir eða verri.

[Jón Sveinsson (IP-tala skráð) 25.1.2009 kl. 17:16]

Já þú segir nokkuð, en er þetta ekki skiljanlegt, því mér skilst að Megas hafi  "komið þessu af stað" með texta sínum.

Hvernig var það annars, fékk hann ekki verðlaun og var heiðraður sérstaklega á degi íslenskrar tungu, skömmu eftir að þessi texti birtist eftir hann.  Ég man ekki betur en hann hafi þakkað fyrir sig meðal annars með því að segja að peningaverðlaunin væru "bunch of money".

Já myndi þetta ekki vera þá góð og gild íslenska, eða hvað heldur þú ?

[Eiður (IP-tala skráð) 25.1.2009 kl. 17:28]

Enskuslettan  að "smæla"  verður  vonandi  aldrei  talin  góð og  gild íslenska. Það er rétt, að þetta mun vera  úr  texta  eftir Magnús Þór Jónsson, öðru nafni  Megas. Það er líka rétt, að af einhverjum  ástæðum, mér og  væntanlega fleirum lítt skiljanlegum, fékk  hann verðlaun Jónasar Hallgrímssonar á  degi íslenskrar  tungu.  Það er víst  líka rétt að  notaði  ensku  til að  tjá  sig um verðlaunin.

Toyotamenn nota Megas  sem  afsökun  fyrir því að   þrástagast á þessari ljótu slettu í auglýsingum. Það er  hreint  enginn  gæðastimpill að þetta  skuli vera úr  texta  eftir  Megas. Síður en  svo.

[smg, 25.1.2009 kl. 17:38]

Ó mæ fokking god! þvílík óvirðing ;)

[Villi Asgeirsson, 25.1.2009 kl. 20:03]

Væri miklu betra ef Toyota tæki þátt í framtaki gegn símanotkun í umferðinni. Þá segði þetta risa skilti:

Þegiðu :-0

[Eiður (IP-tala skráð) 25.1.2009 kl. 21:59]

Þeirri ágætu hugmynd hefur verið gaukað að mér , hvort ekki ætti  að  stofna einskonar  skammarverðlaun tungunnar og  veita því  fyrirtæki,  eða  fyrirtækjum sem  með  vondu  málfari í auglýsingum  hafa   ástundað málfarsleg skemmdarverk.

 Þar kæmu Toyota  og  Byr  sterklega til  greina   svo og  Office  1  (rammíslenskt nafn  ekki satt?)  sem  bauð okkur  að  "versla bækur"  fyrir  jólin.

[ábs (IP-tala skráð) 26.1.2009 kl. 01:13]

Ætlarðu þá að herma slæma málnotkun upp á meistara Megas? Athugaðu að þetta slagorð er vísun í gamlan dægurlegatexta, afskaplega vel ortan. Og hvað fær þig síðan til að dæma alla auglýsingagerð fyrir Toyota léttvæga út frá þessari orðanotkun? Þú tiltekur engin önnur dæmi um slakt orðfæri Toyoyta-manna.

[Fimmta valdið (IP-tala skráð) 26.1.2009 kl. 08:13]

Íslenskri tungu stendur engin ógn af þessari ívitnun í texta Megasar. Gamansemi í auglýsingum er líka hættulaus. Megas hefur gífurlegan orðaforða og gott vald á íslensku máli. Því meira gaman er að útúr- og uppásnúningum hans á það. Gott er ef fólki lærist af honum að gera sér tunguna ekki einasta að brúkstæki heldur líka leiktæki.

Þessi vandlæting öll er fremur brosleg.

[Kristján Logason, 26.1.2009 kl. 08:19]

Taldi Megas eiga einkaleifi á þessari notkun en sennilega er hann ekki með það skrásett

[Jón Snæbjörnsson, 26.1.2009 kl. 08:24]

hvað er málið

[Erlingur (IP-tala skráð) 26.1.2009 kl. 10:21]

Þið eruð nú meiri fýlupokarnir. Svo er náttúrulega hægt að fara út í heila umræðu um af hverju maður sem þykist vera einhvers konar sjálfskipaður verndari íslenskrar tungu þekki ekki tilvitnun í einn besta orðsmið landsins (eins og fjölmargir benda hér á), sjálfan Megas. En ég nenni því ekki. Til þess er lífið of skemmtilegt.

En svona í alvöru. Ef þið ætlið að væla út af auglýsingaskiltum (með vel þekkta poppmenningartilvitnun), alþjóðlegum fyrirtækjanöfnum og heiðarlegum tilraunum til að íslenska erlend hugtök, þá get ég ekki ímyndað mér hvernig þið ætlið að láta þegar kemur að raunverulegum vandamálum í lífinu.

Lifið vel

[Þráinn Bertelsson (IP-tala skráð) 26.1.2009 kl. 11:42]

Það vildi ég að ég hefði áhyggjurnar yðar, hr. fyrrverandi sendimaður.

[Frosti Logason (IP-tala skráð) 26.1.2009 kl. 12:17]

Já það virðist líka vera ofar þínum skilningi að þetta sé tilvitnun í ein mestu menningarverðmæti okkar Íslendinga, nefnilega meistara Megas... hefur þú einhverntíman heyrt um hann eða?

[Eiður (IP-tala skráð) 26.1.2009 kl. 17:57]

Frosti,

Þér  að  segja þá  kom   Magnús  Þór  stundum með  bróður  sínum  Einari Má  heimili mitt í Norðurmýrinni  fyrir  margt löngu.  Líklega  fyrir    svona  57- 58 árum . Ég er  hinsvegar enginn sérstakur aðdáandi tónlistar hans.

En ef menningarverðmæti  eru  fólgin í því  að hefja  slettuna   að "smæla"  til vegs og virðingar í stað íslensku  sagnarinnar að  brosa,  eisn og Megas og  Toyota gera - þá verð ég að játa,  að  ég er mát. Þá  veit  ég bara ekkert hvað menningarverðmæti  eru. Eða að mitt  evrðmætamat er allt  annað en þitt og  um það  evrður ekki deilt.