Molar um málfar og miðla 2040

TAKA ÓSTINNT UPP

 Úr frétt á mbl.is (22.10.2016), - hundur hafði gelt að börnum að leik: Faðir eins barn­anna ræddi við parið um hegðun hunds­ins, sem tók athuga­semd­un­um óst­innt upp. Molaskrifari á því að venjast að talað sé um að taka eitthvað óstinnt upp, taka einhverju illa, reiðast einhverju. Ekki taka einhverju óstinnt upp.

http://www.mbl.is/frettir/innlent/2016/10/22/hotudu_barsmidum_fyrir_gagnryni_a_hundinn/

- Þegar ég sagði, að frásögn hans væri uppspuni frá rótum, tók hann það mjög óstinnt upp.

 

 

AÐ SJÁ EFTIR

Í hádegisfréttum Bylgjunnar (24.10.2016) var ranglega haft eftir Katrínu Jakobsdóttir að hún sæi mjög á eftir því ....  Katrín sá eftir því, að þjóðaratkvæðagreiðsla skyldi ekki hafa farið fram um aðildarumsóknina að ESB. Eitt er að sjá eftir, iðrast einhvers, allt annað er að sjá á eftir. Ég sá á eftir honum fyrir hornið og sé eftir að hafa ekki elt hann.

Þetta hefur svo sem heyrst áður og áður verið nefnt í Molum.

 

ER AÐ .....

Í frétt á mbl.is (24.10.2016) sagði: ,, „Ég vona bara að við séum all­ar að fara að mæta,“ seg­ir Eygló Harðardótt­ir, fé­lags- og hús­næðismálaráðherra, þegar blaðamaður spyr hana hvort að hún ætli að mæta á Aust­ur­völl í dag.”  Ólíkt hefði nú verið fallegra hefði ráðherra sagt:,, Ég vona bara að við mætum allar”. Einfaldara og betra mál.

http://www.mbl.is/frettir/innlent/2016/10/24/eyglo_vonar_ad_allar_maeti/

 

BÍLVELTA VARÐ .....

Úr frétt á mbl.is (24.102016): Bíl­velta varð á veg­in­um í Blöndu­hlíð í Skagaf­irði á móts við bæ­inn Flugu­mýr­ar­hvamm skömmu fyr­ir klukk­an fimm í dag. Þetta er rangt eins og raunar kemur fram bæði í fyrirsögn og fréttinni sjálfri. Það varð engin bílvelta á veginum. Bíll fór út af vegi og endaði á hvolfi ofan í á. Ekki vel unnið. Sem betur fer urðu ekki slys á fólki.

 Sjá: http://www.mbl.is/frettir/innlent/2016/10/24/for_a_hvolf_ofan_i_hvammsa/

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] . Eða einkaskilaboð á fasbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Athugasemdir

[Geir Ólafsson (IP-tala skráð) 26.10.2016 kl. 16:31]

Sæll vertu.

Það er margt sem betur mætti fara í málinu svo sem endalausar slettur, beygjingarvillur og skortur á máltilfinningu. Það er þó eitt sem ég þoli bara ekki en það er sögnin að tækla a-ð. Þetta not orðið allir sem fyrsta orðaval jafnt háir sem lágir þó aðallega háir t.d. þingmenn og ráðamenn. Er ekki hægt að finna gott orð sem útrýmir slettunni strax? svo sem takast á við eða leysa e-ð eða eitthvað enn beinskeyttara. Ég veit ekki hvert ég á að snúa mér svo ég byrja hér. Það eru margar slettur sem maður lætur yfir sig ganga vegna skorts á ísl. orði, en ofannefnt sem sífellt sækir í sig veðrið þoli ég alls ekki.

Kveðja Geir Ólafsson.

[Eiður Svanberg Guðnason, 26.10.2016 kl. 23:30]

Hjartanlega sammála, Geir. Þetta er frá íþróttafréttamönnum komið.  Svo étur hver eftir öðrum. Hef nokkrum sinnum minnst á þetta í Molum.   K kv   Eiður