Molar um málfar og miðla 1807

NÝJUNG TIL BÓTA

Fréttaborði Vísis, sem nú rennur yfir skjáinn í fréttatímum Stöðvar tvö er ágæt nýjung og bætir fréttatímana. Veðurfréttir á Stöð tvö eru skýrar og góðar svo langt sem þær ná, sem er reyndar ekki mjög langt, eða tvo daga fram í tímann.

Molaskrifari er áhugamaður um veðurfréttir og furðar sig enn á því hversvegna Ríkissjónvarpið setur ekki staðanöfn á veðurkortin eins og velflestar eða nær allar sjónvarpsstöðvar gera. Okkur hefur einu sinni eða tvisvar verið sýnt að tæknilega er hægt að gera þetta. Hversvegna er það ekki gert?

Veðurfréttirnar í sjónvarpinu eru yfirleitt með miklum ágætum og skýrt fram settar (þótt spáin sé ekki ævinlega eins og maður helst kysi!). Stundum er eins og handahóf ráði því til dæmis hvort við fáum að sjá veðrið í vesturheimi. Það ætti að vera fastur liður.

 

AÐ ÞRUMA

,,Þrumaði knöttinn”, sagði íþróttafréttamaður Ríkisútvarps í seinni fréttum sjónvarps (29.09.2015). Þrumaði knettinum, hefði hann betur sagt. Skaut fast.

 

 NÚ ER HÓTAÐ

Næstum daglega hótar Ríkissjónvarpið okkur nú með því að byrja að nýju að sýna svokallaðar Hraðfréttir. Það er engin leið hafa samúð með slæmri fjárhagsstöðu Ríkissjónvarpsins meðan fé er á glæ kastað með framleiðslu á efni eins og þessu, - verði það eitthvað í líkingu við það sem við höfum séð til þessa.

 

SORI

Molaskrifari hefur nefnt að hann hefur ekki þolinmæði til að hlusta á símabullið í Útvarpi Sögu nema í örfáar mínútur í senn. Hlustaði skamma stund á fimmtudagsmorgni (01.10.2015) Þá var símavinur að ræða við Pétur Gunnlaugsson, stjórnarformann Útvarps Sögu. Sá sem hringdi kallaði Angelu Merkel kanslara Þýskalands að minnsta kosti í tvígang einn mesta fjöldamorðingja síðari ára. Ekki heyrði Molaskrifari stjórnarformanninn hreyfa andmælum, - kom að vísu inn inn í samtalið í miðju kafi. Hreint með ólíkindum, en soralegt orðbragð og svívirðingar finna sér oftast einhvern farveg.

 

TIL LESENDA

Þeir lesendur, sem vilja senda mér tölvupóst eru beðnir að nota póstfangið [e-mail] .Eða einkaskilaboð á fésbók.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Athugasemdir

[Ásgrímur Hartmannsson, 3.10.2015 kl. 04:35]

Alveg er ég að missa áhuga á sjónvarpsfréttum.  Þetta er furðulegur áróður flestallt sem maður á að reyna að vinna úr hvað er að gerast í heiminum.  Það er hið erfiðasta mál, og betur gert á internetinu.  Auðveldara að flakka milli síðna og bera saman.

",,Þrumaði knöttinn”, sagði íþróttafréttamaður Ríkisútvarps"

Minnir mig á orðfar kunningja míns, Sigurgeirs.  Sá mæti maður hefði líklega viljað skjöktast á þessum knetti líka.  Eða hvaða orð hann vill núorðið nota um erótískar aðfarir sínar.  En hvað um það, þarna hefur sem sagt íþróttafréttamaður viljað gefa í skyn að einhver væri að nj´pota ásta með knettinum af óvenju miklu afli og áhuga.

Þ.e, að sjálfsögðu, ef maður tekur Sigurgeirinn á merkinguna.

Svo fer tvennum eða þrennum sögum af þessu Útvarpi sögu.  Stundum skilst mér að þarna sé í gangi sú frábærasta útvarpsstöð bæði fyrr og síðar.  En svo segja aðrir að þetta sé ekkert nema viðtöl við ölvaða menn sem vilja tala um vísitölur.

Hverjum skal trúa?  Ekki næ ég útsendingunum, og get ekkert sagt.