Molar um málfar og miðla 1783

 

SKYNSAMAR TILLÖGUR

Í Morgunútgáfu Ríkisútvarpsins (27.08.2015) var talað um skynsamar tillögur. Molaskrifara var kennt á sínum tíma að tillögur eða breytingar gætu ekki verið skynsamar. Þær gætu verið skynsamlegar. En þetta orðalag heyrist æ oftar. Sama morgun talaði umsjónarmaður þáttarins um að farið yrði yfir það sem hefði toppað allar fréttir vikunnar. Það er líklega sérviska Molaskrifara, að kunna  ekki að meta þetta orðalag.

 

BOLTALEIKUROG STEFNURÆÐA

 Frá því var greint í morgun (31.08.2015) að vegna boltaleiks í útlöndum , þar sem Íslendingar koma við sögu, verði hefðbundnum tíma á flutningi stefnuræðu forsætisráðherra breytt. Hún verði flutt að kvöldi þingsetningardags, ekki kvöldið eftir eins og venja hefur verið. Að sögn er þetta gert að ósk Ríkisútvarpsins. Íþróttadeildin stjórnar þá ekki aðeins dagskrá Ríkisútvarpsins, heldur einnig störfum SDG og Alþingis. Eða hvað? Gæti ekki verið að óskin um breytinguna hafi komið frá sjálfum SDG,forsætisráðherranum, sem óttast samkeppni um áhorf, þegar boltaleikur er annarsvegar? Það skyldi þó aldrei vera

 

HURÐ – HURÐIR

Les enginn yfir það sem skrifað er á svokallað Smartland mbl.is?

Þar var skrifað (25.08.2015): Húsið var end­ur­nýjað fyr­ir fá­ein­um árum og var þá skipt um gól­f­efni, inni­h­urðar og baðher­bergi. Innihurðar hvað? Það var skipt um innihurðir. Hurðar er eignarfall eintölu af orðinu hurð. Fleirtalan er hurðir. Svo var sagt að húsráðendur hefðu greinilega mikla rýmisgreind. Greind er sjálfsagt af ýmsu tagi og stundum ekki mjög rúmfrek.

 

LEGGUR OG STRÍPAÐAR BÆTUR

Í kvöldfréttum Ríkisútvarps (27.08.2015) var sagt um flugfarþega, sem höfðu þurft að þola mikla seinkun á flugi: , ... áður en lokaleggur ferðarinnar hófst”. Auðrekjanlegt til áhrifa frá ensku.

 Í sama fréttatíma, eða í fréttaskýringu, var fjallað um bætur til ellilífeyrisþega. Þar var að minnsta kosti fjórum sinnum talað um strípaðar bætur. Ekki er Molaskrifari viss um að allir eldri borgarar hafi skilið þetta orðalag. Átt var við grunnbætur án viðbótargreiðslna. Fréttir Ríkisútvarps eiga að vera á vönduðu máli og öllum skiljanlegar.

 

FINDUS OG SANNLEIKURINN

Findus stórfyrirtækið heldur áfram að segja okkur ósatt. Heldur því  fram í sjónvarpsauglýsingum að hraðfryst grænmeti sé ferskara en ferskt (27.08.2015). Það stenst ekki skoðun. Við erum víst talin svo vitlaus, að það sé allt í lagi að segja okkur ósatt. Fyrir tveimur árum varð þetta sama fyrirtæki, Findus ,að biðjast opinberlega afsökunar á því að selja fólki hrossakjöt og kalla það nautakjöt. Sjá t.d. https://en.wikipedia.org/wiki/Findus

Á fyrirtækið ekki að biðjast afsökunar á því að segja okkur að frosið grænmeti sé ferskara en ferskt?

 (,,On 8 February 2013, Findus UK published a public apology on their website, also announcing that, following DNA testing, 3 of its products were found to contain horse tissue. These are the 320, 350 and 500 gram packages of Findus Beef Lasagne and the company offers a refund for products purchased.^[23] In Sweden, Findus Sverige AB also announced a recall of its 375 gram packs of ready made single portion lasagne (code 63957) and published a contact number for customers who had already purchased the products”).^[24]

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Athugasemdir

[Guðbjörg Snót Jónsdóttir (IP-tala skráð) 31.8.2015 kl. 10:58]

 Satt segirðu. Ég var aldeilis hissa, þegar ég las um setningu Alþingis og stefnuræðu forsætisráðherra í Morgunblaðinu í morgun. Hvað er eiginlega að gerast? Nú hefur Alþingi sína eigin sjónvarpsrás. Auk þess er Rúv búin að koma sér upp sér íþróttarás. Varla er Rás1 með útsendingu frá þessum boltaleikjum. Á mannmörgum heimilum eru tölvurnar margar. Fyrir utan frekjuna, sem í þessu fellst, þá skil ég ekki, hvers vegna þarf að hliðra til setningu Alþingis og stefnuræðunni vegna einhverja boltaleikja. Ég hélt, að forfallnir boltaáhugamenn gætu horft á boltaleikina fyrir því einhvers staðar þar, sem þeir trufla ekki aðra heimilismeðlimi, því að varla eru allir heimilismeðlimir svona miklir boltaáhugamenn, að þessa þurfi, enda kannast ég ekki við slíkar fjölskyldur. Aðrir í fjölskyldum boltaáhugamanna, sem vilja ekki horfa á leikina, geta verið annars staðar í íbúðinni að hlusta á útvarpið eða sjónvarp Alþingis. Við tilheyrum þeirri kynslóð, sem ólst upp við að hlusta á umræður frá Alþingi í útvarpinu, áður en sjónvarpið byrjaði útsendingar sínar hér á landi, enda er nú heldur ekki nauðsynlegt að sjá framan í þingmennina, meðan þeir eru að flytja mál sitt í sölum Alþingis. Ef fólk vill sjá mennina á skjánum, þá má alltaf stilla á sjónvarpsrás Alþingis, sem fylgir áskriftinni að Sjónvarpi Símans. Á þessum tímum, sem við lifum núna, þá á þetta ekki að vera neitt vandamál. Mér finnst þetta óskapleg frekja og tilætlunarsemi af hálfu Rúv, vægast sagt, að fara að gera þessar kröfur til Alþingis, og full langt gengið, svo ég segi nú ekki meira.

[Eiður Svanberg Guðnason, 31.8.2015 kl. 22:02]

Hreint ótrúlegt.