Molar um málfar miðla 1774

 

STÖÐVAST - STAÐNÆMAST

T.H. skrifaði (15.08.2015). Hann vekur athygli á þessari frétt á visir.is (15.08.2015): http://www.visir.is/fjarlaegdu-langt-ror-ur-nefi-skjaldboku---myndband/article/2015150819337

Hann segir síðan:"Sá sem setur myndbandið inn skrifar einnig að blæðingin hafi staðnæmst nánast samstundis og rörið var komið út."
Það þarf líklega að útskýra muninn á "að staðnæmast" og "að stöðvast" fyrir fréttabörnunum!”

Þakka bréfið, T.H. Það virðist stundum lítið um leiðbeiningar eða verkstjórn á ritstjórnarskrifstofum netmiðla.

 

AÐ EN EKKI AF

K.Þ. benti Molaskrifara á þessa frétt á mbl.is (16.08.2015): http://www.mbl.is/frettir/erlent/2015/08/16/leita_byssumanna_i_paris/

"Leit er haf­in af tveim­ur byssu­mönn­um..." Hann spyr: ,,Að hverju skyldu byssumennirnir vera að leita?

Ótrúlega er orðið að að heyra sagt og sjá skrifað að leita af einhverju, í stað þess að leita að einhverju.

 

EKKI RÉTT

Í Morgunblaðinu (15.08.2015) segir á bls. 19. um grindhvalaveiðar Færeyinga: ,,Grindhvalaveiðar fara þannig fram að hvölunum er smalað upp í fjöru þar sem veiðimenn keppast við að drepa þá með skutlum”. Þetta er ekki rétt t. Skutlar eru ekki notaðir við grindhvaladráp. Hvalirnir eru reknir á land þar sem sandfjara er. Síðan eru notaðir flugbeittir hnífar og skorið þvert yfir, rétt aftan við hausinn, þannig að mænan fer í sundur. Hvalirnir drepast á nokkrum sekúndum.   

 

NÖFN OG BEYGINGAR

Molaskrifari vekur athygli á prýðilegum pistli á bls. 22 i Morgunblaðinu (15.08.2015), Tungutaki. Höfundur er Eva S. Ólafsdóttir Í pistlinum er margar þarfar og réttmætar ábendingar.

 

EKKI VEL SKRIFAÐ

Þessi frétt af visir.is (15.08.2015) er ekki vel skrifuð. Hún er sannast sagna alveg óvenjulega illa skrifuð. Það er ekki skýr hugsun að baki þessum skrifum: http://www.visir.is/mikid-um-stuta-i-borginni/article/2015150819360

Blaðamaðurinn sem skrifar  leggur nafn sitt við fréttina. Aðhald ætti að felast í því að birta nafn þess, sem skrifar fréttina á netmiðlinum. Þessi fréttaskrifari þarf leiðsögn.

Reyndar ekki sá eini!

 

SLÆM FYRIRSÖGN

Ekki var hún góð fyrirsögnin á dv. is (15.089.2015): ,,Rússabannið byrjað: Mörg hundruð tonn af loðnuhrognum siglt aftur til Íslands.” Sjá: http://www.dv.is/frettir/2015/8/15/lodnuhrogn-leid-til-russlands-siglt-aftur-til-islands/

Enn eitt dæmið um skort á gæðaeftirliti. Viðvaningar, sem eru ódýrt vinnuafl, skrifa. Enginn les yfir eða leiðréttir. Allra síst um helgar.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Athugasemdir

[Guðbjörg Snót Jónsdóttir (IP-tala skráð) 18.8.2015 kl. 11:03]

 Sammála. Það getur margt furðulegt komið frá fólki, sem hefur lengi búið erlendis og virðist vera búið að gleyma íslenskunni - þannig séð. Ég veit ekki, hvort þú hlustaðir á samtal Sigurlaugar Margrétar við Ragnheiði nokkra Sigurðardóttur Bjarnason í gærmorgun, en þar segir Ragnheiður á einum stað, að "árið hafi verið upptekið hjá sér". Ég hváði og velti því fyrir mér, hvað hún hefði eiginlega verið að reyna að segja. Líklegast átti þetta að þýða, að hún hafi verið upptekin allt árið, og það komið út í þessarri sænskuskotnu ambögu. Svona segir maður ekki á íslensku. Það væri a.m.k. gaman að sjá ár, sem er upptekið, eins og um manneskju sé að ræða. Þetta sýnir, að margt skondið getur komið upp úr fólki, sem hefur búið lengi erlendis og er hálf-búið að týna íslenskunni. Eða hvernig hefði þú skilið þessa setningu Ragnheiðar?

[Eiður Svanberg Guðnason, 18.8.2015 kl. 14:53]

Þetta hefði  ég skilið , þótt ekki sé það fallegt.