Molar um málfar og miðla 1725

Í fréttum Bylgjunnar (25.05.2015) var haft eftir SDG forsætisráðherra , að þingið mundi sennilega starfa eitthvað inn í sumarið. Er ekki álvenja er að segja fram á sumar, ekki inn í sumarið. En aftur og aftur heyrum við þetta orðalag í fréttum ,... inn í sumarið. Næst verður það sjálfsagt inn í haustið , inn í veturinn - eða hvað?

 

Fleiri hundruð á mótmælafundi, sagði í fyrirsögn á fréttavef Ríkisútvarpsins (26.05.2015). Fleiri en hvað? Þarna hefði átt að tala um mörg hundruð , þótt þátttakendur hafi sennilega verið 1500- 2000 að mati trúverðugs áhorfanda. Kannski hræðist fréttastofan Moggann, þegar kemur að því að tala um fjölda mótmælenda. – Frægt var í gamla daga,þegar kunnur ljósmyndari Moggans spurði þegar hann var sendur til að taka mynd af fundi: - Á að vera margt á fundinum?

 

Tilfinningu fyrir beygingu orða í íslensku fer greinilega hnignandi. Tvö nýleg dæmi af fyrirsögnum af vefsíðinni Allt um flug: 350 helíumfylltar blöðrur röskuðu flug um Bombay-flugvöll. Blöðrurnar röskuðu flugi um flugvöllinn. Og: Þriðjungur starfsmanna hjá Malaysia Airlines verður sagt upp störfum. Ætti að vera: Þriðjungi starfsmanna ....

 

Af mbl.is (27.05.2015): Þetta gerði hann eft­ir að hafa stungið rúm­lega tví­tug­an sam­nem­anda sinn. Stakk hann ekki skólabróður sinn? Þekkja menn það orð ekki lengur ?

http://www.mbl.is/frettir/erlent/2015/05/27/stakk_samnemanda_og_framdi_sjalfsvig/

 

Nýjasta skip veiðiflotans var vígt á Vopnafirði í dag, sagði fréttaþulur Ríkissjónvarpsins í kvöldfréttum (27.05.2015). Þarna var áreiðanlega rétt að orði komist, því í Morgunblaðinu daginn eftir var mynd frá komu skipsins til Vopnafjarðar. Meðal þeirra sem tóku á móti skipinu var hempuklæddur klerkur.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Athugasemdir

[Guðbjörg Snót Jónsdóttir (IP-tala skráð) 29.5.2015 kl. 13:02]

Fyrst votta ég þér samúð mína. Síðan að efni þessarrar greinar. Ég er sammála varðandi málfræðikunnáttuna í dag. Ég minnist þess, þegar ég byrjaði að læra erlend tungumál, þá sagði Katrín Jakobsdóttir Smári við mig einu sinni, þegar ég var í einkatímum hjá henni í ensku, að faðir sinn, skáldið, hefði einu sinni sagt það grundvallaratriði í málanámi að kunna málfræðina hundrað prósent, því að það væri ekki hægt að tjá sig á neinu tungumáli án þess að hafa málfræðina á hreinu. Það er nokkuð til í því. Ein frænka mín, sem er gamall kennari, sagðist vera að hjálpa barnabörnum sínum með námið, og furðaði sig á málfræðikennslunni í dag og sömuleiðis bókunum, sem notaðar eru. Það sé eitthvað annað, en við vorum að læra á sinni tíð. Ég hef verið svo heppin að hafa haft góða íslenskukennara, bæði í gagnfræðaskóla og MR. Við vitum nú bæði, hvað voru gerðar strangar kröfur í MR. Þar hafði ég bæði Kristinn Kristmundsson, Jón Guðmundsson, og Ólaf M. Ólafsson, sem ég hugsa, að þú kannist vel við. Ég lærði mikið af þeim og bý að því. Kristinn lagði sérstaklega mikið upp úr því, líkt og ÓMÓ, að við skrifuðum og töluðum vandaða og kjarngóða íslensku. Ég bý líka að því, að foreldrar mínir og móðuramma mín, sem var á heimilinu hjá okkur, töluðu mikið við mig, sem er ekki síður nauðsynlegt en bóknámið. Fyrir vikið lærði ég heilmikið af orðum, sjaldgæfum orðum líka. Þegar ég skildi ekki eitthvað, þá spurði ég, hvað þau þýddu, auk þess sem ég vandist mörgum austfirskum orðum og orðatiltækjum, þar sem móðir mín og móðuramma voru báðar Austfirðingar. Ég er ansi hrædd um, að lítill tími gefist í hraða nútímans að tala við börnin í dag, nema þau búi svo vel að eiga afa og ömmu, sem geta gefið sér tíma til að tala við þau og kenna þeim málið. Börn læra hvert af öðru, og svo hefur líka myndast ný íslenska, sem svokallaðir nýbúar tala, og þar er ekki alltaf rétt farið með málfræðibeygingarnar, eins og við vitum, og blandast því máli, sem fyrir er. Þá er ekki að spyrja að útkomunni. Ég á ekki von á, að íslenskukennslunni fari fram við styttingu framhaldsskólanáms, enda finnst mér þessi stytting vera hin mesta vitleysa og mjög svo vanhugsuð, svo ekki sé meira sagt.