Molar um málfar og miðla 1713

 

Í Morgunútgáfu  Ríkisútvarpsins (09.04.2015)  var rætt  við  einn af þingmönnum Framsóknarflokks. ,sem líkti Framsókn  við  Miðflokkinn í  Finnlandi ( þar sem kosið verður 19. apríl. Orðrétt  sagði   Framsóknarþingmaðurinn:,, Miðjuflokkurinn er  með   25-26% fylgi og  er að sigra þær kosningar (svo!)  með miklum  yfirburðum”!   - Sigra kosningarnar!   Það þarf greinilega ekkert að kjósa í Finnlandi, Miðjuflokkur  þingmannsins íslenska  er búinn að  vinna  yfirburðasigur löngu áður en kosningarnar fara fram. Merkilegt!  

Í þessum sama þætti ræddu þeir  Bogi og Óðinn í vikulegu spjalli sínu  um erlend málefni  um kosningarnar í Finnlandi, en  ræddu ósköp lítið um finnska Framsóknarflokkinn.  Flokkurinn vill ekki, að Finnar  dragi sig út úr  Evrópusambandinu. Vill vera áfram í ESB. Var því upphaflega andvígur ,en  viðurkennir nú kosti aðildar fyrir Finna.  Í fyrra greiddu þingmenn flokksins atkvæði gegn hjónböndum samkynhneigðra, þegar atkvæði voru greidd um það mál í finnska þinginu.

 

 Við þurfum að lesa goðafræðina betur. Það er verið að skipta  landinu upp í goðorð, sagði útvarpsstjóri Útvarps Sögu (09.04.2015). Á. Er það viðfangsefni goðafræðinnar?  Skipting landsins í goðorð?

 

Of langt og rýrt  snjóbrettaviðtal frá Akureyri átti ekki erindi í aðalfréttatíma Ríkissjónvarps á fimmtudagskvöld (09.04.2015). Til hvers  er  sérstakur íþróttafréttatími, sem   hefur verið troðið milli frétta og veðurs? Er hann ekki einmitt fyrir svona efni?   

 

Af forsíðu mbl.is (10.04.2015): ,,Slökkvilið Ak­ur­eyr­ar var kallað til í nótt eft­ir að til­raun íbúa fjöl­býl­is­húss til að kveikja sér í pípu með rista­vél mis­heppnaðist”. .Ristavél er (fréttabarna)heiti á eldhústækinu, sem  við köllum brauðrist. Þetta var reyndar lagfært í fréttinni.

 

Hér er frétt af visir.is  (10.03.2015) um driftandi skriðdreka. Veit einhver  Molalesandi hvaða fyrirbæri það er? http://www.visir.is/driftandi-skriddreki/article/2015150419972

Í fréttinni segir: ,, Enda er þessum skriðdreka fært að drifta að vild, ekki síst ef undirlagið er ísilagt stöðuvatn, ...”  Orðið drift er notað um rek á skipi.  – Ekki sérstakur skrifdreki, sem þetta hefur skrifað. Eða þannig.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Athugasemdir

[Ásgrímur Hartmannsson, 14.4.2015 kl. 18:33]

"Drift" er enskusletta - heiti á afar einkennilegri aksturstækni sem er mikið notuði í japönsku touring-car kappaksturkeppnunum.

Þeir fara allar beygjur á spólandi skrensi.

Sjáðu það bara fyrir þér... 

[Eiður Svanberg Guðnason, 15.4.2015 kl. 07:45]

Kærar þakkir, Ásgrímur.