HVE LENGI ENN, SJÁLFSTÆÐISMENN?

Samstarf í tveggja flokka stjórn  byggist umfram allt á  gagnkvæmu trausti og trúnaði oddvita flokkanna. Þannig  var í Viðreisnarstjórninni og þannig var það  lengst af í Viðeyjarstjórninni.

Oddvitar  flokkanna  gefa  ekki mikilvægar stefnumarkandi yfirlýsingar, án þess að hafa um það samráð sín á milli.

Þessu er á annan veg farið í núverandi  ríkisstjórn.  Forsætisráðherra  SDG gefur stefnumarkandi yfirlýsingar út og suður án samráðs, að því er virðistr við  hinn stjórnarflokkinn. Þetta vekur ekki fögnuð hjá  Sjálfstæðismönnum. Þeim þykja þessi vinnubrögð  ekki til marks um heilindi og heiðarleika.

SDG vill nýjan  Landspítala á frímerkisblettinn þar sem útvarpshúsið er. Málið er á  forræði heilbrigðisráðherra. Frá honum heyrist ekki. Ekki tíst. Ekki sem ég hef heyrt að minnsta kosti.  Fjármögnun verksins er á  forræði fjármálaráðherra, formanns  Sjálfstæðisflokksins, sem heldur   segir ekki neitt. Bældir menn og beygðir.

SDG hristir  rykið af stúdentagarðsteikningu frá námsárum  Guðjóns  Samúelssonar, seinna húsameistara meistara ríkisins. Þarna áttu stúdentar að búa meðan  neðri hæð  þinghússins hýsti Háskóla Íslands. (Guðfræðideildin rúmaðist í þingflokksherbergi Alþýðuflokksins) SDG vill klastra  þessu  húsið við okkar  fallega þinghús. Ráðherrar og þingmenn Sjálfstæðisflokksins koma af fjöllum og klóra sér í hausnum.  Þjóðin hélt að þetta væri apríl gabb. Hún áttar sig  ekki á því að  forsætisráðherra  er  kannski bara eitt allsherjar apríl gabb.Hélt kannski,  að ráðherra hefði fengið heilahristing, en varpaði þeirri  hugsun snarlega frá sér.

SDG vill allt í einu nýja Valhöll á Þingvöllum. Hann hefur þar bústað  fyrir sig og sína. Ég hef engan  hitt, sem vill nýja  Valhöll á  Þingvöll.  Þar er varla pissipláss fyrir þá tugi þúsunda eða þau  hundruð  þúsunda  ferðmanna, sem koma  þangað árlega og léleg aðstaða er til að sinna.

Hve lengi ætla  Sjálfstæðismenn að halda áfram að láta Framsóknarmenn niðurlægja sig í þessu stjórnarsamstarfi?

Einkunnarorðin  virðast sótt í forneskjuna eins og  fleira;  nefnilega:  Ríkið það er ég.

Hve lengi, hve lengi, Sjálfstæðismenn?

Athugasemdir

[Hrólfur Þ Hraundal, 4.4.2015 kl. 16:58]

Megi samstarfsaðilinn, forsætisráðherrann ekki leggja fram hugmynd til að gefa fólki færi á að segja álit sitt fyrir þér, þá lýsir það bara þinni þröngsýni.  Hugmynd um að byggja nýtt þjóðar sjúkrahús á lóð útvarps hússins er betri en sú sem er í boði við Hringbraut, það er allt betra en það.  Það hafa ýmsir þröngsýnir komið að þessu máli og alltaf stöðvað staðsetningar umræðu.     

[Ómar Ragnarsson, 4.4.2015 kl. 19:50]

Reiturinn sem Útvarpshúsið stendur á að húsinu meðtöldu er álíka stór og reiturinn, sem Landsspítalahúsin standa á. En yfirlýst var fyrir 15 árum að sá reitur væri of lítill. 

Útvarpshúsið sjálft er eitt helsta menningarslys síðustu áratuga og svo glatað eins og það er nú, að það er fráleitt að ætla að nota það fyrir Landsspítalann, enda yrði þá væntanlega að leggja RUV niður, sem virðist vera heit ósk margra. 

[Eiður Svanberg Guðnason, 4.4.2015 kl. 22:55]

Eitthvað svipað  þessu  sagði ég, Ómar, þegar bygging útvarpshússins stóð fyrir dyrum. Anxdrés Björnsson , útvarpsstjóri, sá mæti maður, tók því  ekki vel, - vægast sagt. Ef bygja ætti Lsp í Efstaleiti þyrfti væntanlega að byrja á því að jafna húsið við jörðu.  Sjálfstæðisflokkurinn næði þá  fram þeim vilja  margra þar í innmúraða kjarnanum að drepa Ríkisútvarpið.

[Torfi Stefánsson (IP-tala skráð) 5.4.2015 kl. 09:52]

Já, margan hægrikratann langar aftur í stjórn með íhaldinu. Ætli það skýri ekki vel eineltið gagnvart Framsókn?

[Eiður (IP-tala skráð) 5.4.2015 kl. 21:04]

   Öll gagnrýni á  Framsókn er einelti eða loftárásir. Merkilegt. Enn merkilegra að fólk skuli segjast styðja þetta fyrirbæri.