Molar um málfar og miðla 1404

  Ævinlega finnst Molaskrifara jafngaman að sjá  myndir  frá gömlum tíma hér á landi. Þess vegna, meðal annars,var fengur að myndinni um Eimskipafélag Íslands, sem  sýnd var í Ríkissjónvarpinu á sunnudagskvöld (02.02.2014).  Margt fróðlegt þar. Nokkrir hnökrar voru þó í texta og  misræmi á tveimur stöðum. Annarsvegar  varðandi það hvenær  siglingar hófust  vestur um haf. Sagt var 1917 í þulartexta en núverandi forstjóri  talaði um 1915 , - árið eftir stofnun félagsins. Svo var það rangt að Dettifossi hefði verið sökkt í lok janúar 1945. Dettifossi var sökkt  21. febrúar 1945. Molaskrifari hafði gaman af að sjá á skjánum skipstjórana Magnús Þorsteinsson og Erlend Jónsson. Þeir  áttu um  skeið báðir heima á Skeggjagötu í Norðurmýrinni í Reykjavík, þá reyndar stýrimenn,  þar sem Molaskrifari ólst upp.  Og vissi þá upp á hár hver bjó hvar í þeirri  góðu götu,  því  fjölskyldan bar þar út Moggann um árabil um og eftir 1950. Gaman verður að sjá  seinni hluta myndarinnar, - væntanlega að viku liðinni. Í myndgerðinni var margt snoturlega og smekklega gert. 

 

Molavin skrifaði (03.02.2014): ,,Eins og fram hefur komið í dag er engum bát saknað." Þannig er orðuð Fasbókarkynning Vísis á frétt um leit að báti á Faxaflóa á sunnudagskvöldi, en í fréttinni sjálfri á visir.is er þetta orðað þannig: "Eins og fram hefur komið í dag er einskyns bát saknað" Erfitt er að sjá hvor setningin á að vera leiðrétting á hinni. Þarna leiðir haltur blindan eins og svo oft áður.” Þau láta ekki að sér hæða fréttabörnin sem taka vísisvaktir um helgar.  Þakka bréfið, Molavin.

 

Á mbl.is (02.02.2014) segir: Töluverður erill var á lögreglunni á höfuðborgarsvæðinu í nótt og í gærkvöldi. http://www.mbl.is/frettir/innlent/2014/02/02/toluverdur_erill_a_logreglunni/

 Molaskrifari hefði sagt   að töluverður erill hafi verið hjá  lögreglunni.  Vel má vera að hvort tveggja  sé gott og gilt.

 

Þrír fjórðu landsmanna vill, sagði Telma Tómasson, fréttaþulur á Stöð tvö á  sunnudagskvöld (01.02.2014).   Þrír fjórðu landsmanna vilja ...  hefði hún betur sagt.

 

Ekki heyrði Molaskrifari betur sagt  væri í dagskrárauglýsingu á  Stöð tvö  á sunnudagskvöld (02.02.2014).  Ég vissi að það mundi eitthvað skemmtilegt henda fyrir mig í kvöld. Klúðurslegt og óvandað orðalag.

 

KÞ spyr (02.02.2014): Hvað er ,,gærnótt"?

http://www.dv.is/frettir/2014/2/2/thu-sagdir-sigri-hrosandi-vid-vini-thina-ad-thu-hefdir-lamid-einhverja-gellu-sem-hefdi-verid-fyrir-ther/  Ekki getur  Molaskrifari svarað því svo óyggjandi sé. Líklega síðastliðin nótt. Kannski fyrrinótt. Þetta bjálfalega orðaleg heyrist  æ oftar í fjölmiðlum og étur þar hver eftir öðrum eins og svo oft.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Athugasemdir

[Ómar Ragnarsson, 4.2.2014 kl. 11:26]

Ég tók eftir þessu með 1915 eins og þú en það truflaði mig meira að lögin sem leikin voru til að styrkja stemninguna voru lengst tekin frá röngum tíma, komu fram nokkrum árum eða áratugum seinna en við átti. 

Til dæmis passaði lag með Dean Martin 1955 engan veginn við tímann fyrir 1940 og Vökudraumur frá 1954 ekki við stemninguna 1947. Og síðan sáust bílar á ferð, sem voru framleiddir mörgum árum síðar en myndirnar áttu að vera frá.  

[Eiður Guðnason (IP-tala skráð) 4.2.2014 kl. 21:34]

Já, þú ert betur inni í tónlistinni en ég, félagi Ómar. Hún truflaði mig ekki, en þetta er rétt hjá þér. Staðreyndavillur eiga hinsvegar ekki að vera í svona myndum. Ég heyrði tvær. Aðrir heyrðu kannski eitthvað fleira.