Molar um málfar og miðla 1397

  Molavin skrifaði: ,,Einn af hátt settustu...(valdamönnum í Kína)" sagði fréttamaður Stöðvar 2 í kvöld 24.01. Ef til vill er þetta hugsunarleysi, ef til vill þekkingarleysi. Lýsingarorðið ,,hár" stigbeygist og gæti því orðið ,,hátt settur" - ,hærra settur" eða ,,hæst settur." En ekki , ,settastur." En eftir situr að enginn ritstýrir, leiðréttir eða gerir athugasemd.

 

Félag íslenskra bókaútgefenda auglýsir væntanlegan bókamarkað í næsta mánuði í blöðum þessa dagana og þar segir, orðrétt: ,,Útgefendur sem vilja bjóða bækur sínar á markaðinum er bent á að hafa samband...." Hér er sitthvað athugavert en einkum er átakanlegt er menn ráða ekki við aukasetningar, né afmarka þær með kommum. Oft má sleppa þeim alveg og það hefði til dæmis dugað að segja: ,,Útgefendum er bent á að hafa samband...” -- Molaskrifari þakkar bréfið.

 

Það sýnist vel ráðið að stjórn Ríkisútvarpsins skuli hafa valið Magnús Geir Þórðarson í starf útvarpsstjóra. Honum er árnað allra heilla í erfiðu starfi. Í Efstaleiti þarf að taka til hendinni eftir langa óstjórn. Margir hæfir sóttu um starfið og ekki efast Molaskrifari um að til dæmis Salvör Nordal eða Stefán Jón Hafstein hefðu bæði getað gegnt þessu mikilvæga starfi með sóma.

 

Í fréttum Ríkissjónvarps (24.01.2014) talaði Sigmundur Davíð Gunnlaugsson forsætisráðherra um að gera ætti öllum kleift að eignast heimili. Hann ruglaði hér greinilega saman húsnæði og heimili sem er sitthvað.

 

Í sama fréttatíma Ríkissjónvarps kom rangt nafn á skjáinn þegar rætt var við Björgólf Jóhannsson, formann Samtaka atvinnulífsins. Engin afsökun. Engin skýring. Stundum er eins og enginn horfi á fréttirnar í útvarpshöllinni við Efstaleiti, eða það að rangt sé farið með nafn þess sem við er rætt skipti bara engu máli. Það er fúsk.

 

Gamall þáttur Jökuls Jakobssonar sem endurfluttur var á laugardagsmorgni (25.01.2014) um Áfanga Jóns Helgasonar var sannkölluð útvarpsperla. Ætti að nýtast sem ítarefni, þegar fjallað er um Áfanga í bókmenntakennslu í íslenskum skólum. Vonandi er staldrað við þetta einstaka ljóð í bókmenntakennslu einhversstaðar á leiðinni til stúdentsprófs. Eitt af öndvegisljóðum íslenskra bókmennta. Molalesari kynntist Áföngum í öðrum bekk í gagnfræðaskóla, þá  14 eða 15 ára.

 

Í veðurfréttum Ríkissjónvarps (25.01.2014) voru nokkur borganöfn komin á Norður Ameríkukortið. Takk fyrir það. Vonandi fer þeim fjölgandi, - einnig á Evrópukortinu. Hvaða regla  gildir annars um veðurkort  frá öðrum svæðum heims en Evrópu? Ræður hver veðurfræðingur því hvaða kort hann sýnir okkur?

 

Stundum er gaman að fréttamatinu. Á miðnætti á föstudagskvöld (24.01.2014) var fyrsta frétt í Ríkisútvarpinu um eld í bíl undir Hafnarfjalli. Eldurinn lognaðist útaf af sjálfu sér. Næsta frétt var um eld í potti á veitingastað í Reykjavík. Svo leyfir Ríkisútvarpið sér að flytja engar fréttir fyrr en sjö klukkutímum síðar, - klukkan sjö næsta morgun. Lélegt hjá þjónustustofnun í eigu þjóðarinnar sem jafnframt á að sinna öryggishlutverki. Með þessum hætti er því alls ekki sinnt svo sem skyldi.

 

Þeir voru prýðilegir Bogi Ágústsson og Þórður Snær Júlíusson í Sunnudagsmorgni Gísla Marteins (26.01.2014). Elín Hirst einbeitti sér að því auglýsa Sjálfstæðisflokkinn. Það er sjálfsagt skylda þingmanna Sjálfstæðisflokksins þegar Gísli Marteinn, fyrrum borgarfulltrúi flokksins, boðar þá á sinn fund.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Athugasemdir

[Helga Kristjánsdóttir, 27.1.2014 kl. 18:22]

Sæll. Er ekki háttsettur eitt samsett orð,? Hernig er þá miðstigið? Háttsettari,ég tel þetta lo. Dettur þá í hug hve margir skrifa hæstur með-ð-i,hæðstur. Þegar reglan er að stofn lýsingarorða finnst í kvk eint. nf. hún er há, hvorki ð eða r finnst þar þá er það svo í öllum stigbreytingum. Fréttir að byrja....

[Húsari. (IP-tala skráð) 28.1.2014 kl. 00:38]

Sæll Eiður.

 Kann að vera um lítilsháttar misskilning að ræða hjá þér
en lýsingarorðið sem þú gerir að umtalsefni er nákvæmlega
tilfært þannig: háttsettur.

Frumstig

Sterk beyging

Eintala
	Karlkyn	Kvenkyn	Hvorugkyn
Nf.	háttsettur	háttsett	háttsett
Þf.	háttsettan	háttsetta	háttsett
Þgf.	háttsettum	háttsettri	háttsettu
Ef.	háttsetts	háttsettrar	háttsetts

Fleirtala
	Karlkyn	Kvenkyn	Hvorugkyn
Nf.	háttsettir	háttsettar	háttsett
Þf.	háttsetta	háttsettar	háttsett
Þgf.	háttsettum	háttsettum	háttsettum
Ef.	háttsettra	háttsettra	háttsettra

Veik beyging

Eintala
	Karlkyn	Kvenkyn	Hvorugkyn
Nf.	háttsetti	háttsetta	háttsetta
Þf.	háttsetta	háttsettu	háttsetta
Þgf.	háttsetta	háttsettu	háttsetta
Ef.	háttsetta	háttsettu	háttsetta

Fleirtala
	Karlkyn	Kvenkyn	Hvorugkyn
Nf.	háttsettu	háttsettu	háttsettu
Þf.	háttsettu	háttsettu	háttsettu
Þgf.	háttsettu	háttsettu	háttsettu
Ef.	háttsettu	háttsettu	háttsettu

Miðstig

Veik beyging

Eintala
	Karlkyn	Kvenkyn	Hvorugkyn
Nf.	háttsettari	háttsettari	háttsettara
Þf.	háttsettari	háttsettari	háttsettara
Þgf.	háttsettari	háttsettari	háttsettara
Ef.	háttsettari	háttsettari	háttsettara

Fleirtala
	Karlkyn	Kvenkyn	Hvorugkyn
Nf.	háttsettari	háttsettari	háttsettari
Þf.	háttsettari	háttsettari	háttsettari
Þgf.	háttsettari	háttsettari	háttsettari
Ef.	háttsettari	háttsettari	háttsettari

Efsta stig

Sterk beyging

Eintala
	Karlkyn	Kvenkyn	Hvorugkyn
Nf.	háttsettastur	háttsettust	háttsettast
Þf.	háttsettastan	háttsettasta	háttsettast
Þgf.	háttsettustum	háttsettastri	háttsettustu
Ef.	háttsettasts	háttsettastrar	háttsettasts

Fleirtala
	Karlkyn	Kvenkyn	Hvorugkyn
Nf.	háttsettastir	háttsettastar	háttsettust
Þf.	háttsettasta	háttsettastar	háttsettust
Þgf.	háttsettustum	háttsettustum	háttsettustum
Ef.	háttsettastra	háttsettastra	háttsettastra

Veik beyging

Eintala
	Karlkyn	Kvenkyn	Hvorugkyn
Nf.	háttsettasti	háttsettasta	háttsettasta
Þf.	háttsettasta	háttsettustu	háttsettasta
Þgf.	háttsettasta	háttsettustu	háttsettasta
Ef.	háttsettasta	háttsettustu	háttsettasta

Fleirtala
	Karlkyn	Kvenkyn	Hvorugkyn
Nf.	háttsettustu	háttsettustu	háttsettustu
Þf.	háttsettustu	háttsettustu	háttsettustu
Þgf.	háttsettustu	háttsettustu	háttsettustu
Ef.	háttsettustu	háttsettustu	háttsettustu

 

[Eiður Guðnason (IP-tala skráð) 28.1.2014 kl. 10:11]

Athugasemdin var í bréfi frá Molalesanda.