Molar um málfar og miðla 1395

  Gunnar skrifaði (22.01.2014): ,,Á visir.is skrifar Ellý Ármanns frétt um pilt sem slasaðist í Bláfjöllum. Hann er í tvígang kallaður „Máni Örn Arnarson“ en í sömu frétt er viðtal við föður hans, sem sagt er að heiti „Arnar Már Þórisson“. Sé það rétt er drengurinn Arnarsson. Annars héti faðir hans Örn. Lágmark að fara rétt með nöfn.” Molaskrifari þakkar bréfið.

„Bæði félögin skrifuðu ekki undir samningana,“ var sagt í hádegisfréttum Bylgjunnar 22. janúar. Eðlilegra hefði verið að segja að hvorugt félagið hafi skrifað undir.”

 

Örn skrifaði Molum eftirfarandi um nafnháttarnotkun (22.012014): ,,Vísir skrifar í dag: http://visir.is/vodafone-harmar-vistun-gagnanna--gognin-attu-ekki-ad-vera-geymd-/article/2014140129695.

 Það er árátta að nota nafnhátt hjá yngra fólki:,,að vera geymd" í stað þess að segja,,að geymast" Sama á við um frásagnir af liðnum atburðum, þær eru flestar sagðar í nútíð, þótt nokkuð sé um liðið frá atburði.” Þakka bréfið.

 

 

Fyrsta frétt í átta fréttum Ríkisútvarps á miðvikudag (22.01.2014) var ofurlöng frásögn af kerfishremmingum konu með geðræn vandamál. Hremmingarnar tengdust nauðungarvistun. Fréttin var endurtekið efni úr morgunútvarpinu. Megintilgangur fréttarinnar virtist vera að vekja athygli á fyrirhugaðri ráðstefnu. Leikurinn var endurtekinn daginn eftir. Viðtal í morgunútvarpi og endurtekið efni aftur fyrsta frétt, nú klukkan níu, muni Molaskrifari rétt. Þetta voru hreinar auglýsingar og fólk að vinna sér hlutina létt.

 

Á fullu gazi - Saga Garðars klessir á, (22.01.2014). Fyrirsögn á visir.is. Fréttabarn hefur fengið að semja fyrirsögn.

 

Það var skemmtileg tilbreyting að fá fína óperettutónleika í Ríkissjónvarpið á miðvikudagskvöld (22.1.2014). Takk fyrir það. Skiptir engu þótt upptakan hafi verið frá 2007. Þetta efni eldist ekki svo glatt. Skyldi Ríkissjónvarpið manna sig upp í að sýna okkur eins og einn þátt með Wynton Marsalis áður en höfðinginn heimsækir Ísland með fríðu föruneyti í sumar?

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Athugasemdir

[Már Elíson, 24.1.2014 kl. 19:02]

Ágæti Eiður,

Afhverju talar þú yfirleitt í neihvæðum tón útí allt og alla...og minnist yfirleitt aldrei á jákvæða þætti í sjónvarpi (Gettu betur, Orðbragð o.fl.) og síðan óskar þú eftir að Ríkissjónvarpið dembi yfir okkur einhverri óperettu sem enginn skilur eða greinir orðaskil með útkreistum A og O hljóðum dauðans.

Og hver er þessi / þetta Wynton Marsalis...?...Á hvaða aldri eru þeir sem eiga að vita eitthvað um þetta nafn ? - Ert þú að tala / rita fyrir einhvern sértrúarhóp eða ellismelli ? - Á unga fólkið ekki upp á pallborðið hjá þér ? - Vertu fjölbreyttur í orðræðunni en ekki eins og gamall klár með augnlokur báðu megin.

Sýndu af þér gleði og jákvæðni í skrifum þínum en ekki eilífar aðfinnslur og menntahroka. - Þú hefur ekki alltaf rétt fyrir þér, Eiður, þó að þú látir þannig eða viljir að svo sé.

[Eiður Svanberg Guðnason, 24.1.2014 kl. 19:58]

Sæll Már, Þú lest pistlana mína ekki nægilega vel. Ég hrósa ýmsu og finn að mörgu.Ég hef hrósað Orðbragði, Útsvari , tónlisarþáttum Víkings Heiðars, bara svo nokkuð sé nefnt. Wynton Marsalis er einn kunnasti trompetleikari heims víðfrægur jassmaður leikur einnig klassisk, en þú ert greinilega haldinn fordómum gagnvart tónlist, sbr. það sem þú segir um Pavarotti tónleikana. Þess vegna er það alveg á mörkunum að ég nenni að eiga orðastað við þig. Reyndu að vera svolítið jákvæður !!!

[Eiður Svanberg Guðnason, 24.1.2014 kl. 20:45]

Placido Domingo, var það , - ekki Pavarotti. En þu hefur kannski ekki heyrt þeirra getið að nokkru?

[Már Elíson, 24.1.2014 kl. 21:07]

Þú slærð ekkert af hrokanum, Eiður...en var við því að búast ? - Við þurfum ekkert að eiga orðastað frekar en þú vilt,

en manni getur blöskrað og ég hef heimild til þess.

Ég veit vel hver þessi trompetleikari er, en spurning mín var.."Á hvaða aldri eru þeir sem eiga að vita eitthvað

um þetta nafn ? .." - Það var nú allt og sumt. - Reyndu svo að yngja upp í sálu þinni.