Molar um málfar og miðla 572

 

      

 Nokkrum sinnum hefur það verið  nefnt í þessum  Molum að  Ríkissjónvarpið sýnir   viðaskiptavinum sínum dónaskap, þegar   kynntur  er   þátturinn Í  návígi og þess látið rækilega ógetið  við hvern á  að  ræða hvað. Hvaða  tilgangi þjónar það að segja okkur ekki við hvern á að  ræða?   Í besta falli er þetta  bjánalegt. Þetta er  örugglega einsdæmi  í dagskrárkynningu hjá   sjónvarpsstöð. En einsdæmin hjá  Ríkissjónvarpinu okkar eru býsna mörg. Stundum er sagt að einsdæmin séu verst.

  

Á Hrafnaþingi í ÍNN (29.03.2011) var áhugavert viðtal við Jafet Ólafsson  viðskiptafræðing, sem  benti á ýmsar jákvæðar hliðar í efnahagsmálum. Skemmtileg  tilbreyting  frá öfgunum,sem oftast ríða húsum í þessum þætti. Jafet skaut  fram  þeirri  hugmynd að sameina  Orkuveituna og Landsvirkjun, setja fyrirtækið á markað  og gefa   innlendum og erlendum fjárfestum kost á að eignast hlut  í  glæsilegu orkufyrirtæki. Fín hugmynd og umræðuverð. Sjónvarpsstjórinn  eyðilagði reyndar  viðtalið í lokin með  því að segja ,,að Landsvirkjun  væri með rassgatið fullt af peningum”. Ingvi Hrafn  gerir lítið úr sér og áhorfendum með svona orðbragði.

   Í fréttum Stöðvar  tvö var talað um gesti brúðkaupsins, þegar greinilega var  átt við þá sem  boðnir  væru til brúðkaupsins, gesti í brúðkaupinu. Í fréttum sama miðils var (29.03.2011) talað um að forða gjaldþroti. Molaskrifari  sættir sig  seint við  þessa  notkun  sagnarinnar að  forða,  sem þýðir að koma undan  eða bjarga. Hér  hefði  betur verið talað um að  forða frá  gjaldþroti, ekki  forða  gjaldþroti.     

Athugasemdir

[Agla (IP-tala skráð) 31.3.2011 kl. 16:29]

Ég sé ekki betur en að þú hafir gert  smá  stafsetningarmistök: " ..sýni viðskiptavinum sýnum dónaskap" !!!

Bara smá sparðatíningur/sparðatýningur.

Keep up the good work!

[Eiður Svanberg Guðnason, 31.3.2011 kl. 17:10]

Rétt, Agla. Þóttist reyndar vera búinn að leiðrétta þetta, en það virðist ekki skila sér.