Molar um málfar og miðla 567

 

Morgunblaðið  birti fyrst fjölmiðla (26.03.2011) frétt  um  tilraun til að smygla til landsins  miklu magni  eiturlyfja. Í hádegisfréttum Ríkisútvarpsins sama dag var sagt frá þessu  og þess getið í framhjáhlaupi, að komið hefði fram í Morgunblaðinu, að fólkið sem að  smyglinu stóð væri íslenskt. Þetta var ómerkilegt hjá  fréttastofu Ríkisútvarpsins. Ríkisútvarpið hefði átt  unna Morgunblaðinu þess að láta þess getið að Morgunblaðið hefði verið fyrst til að segja frá þessu.

Í fréttinni um smygltilraunina las fréttamaður Ríkisútvarpsins hikstalaust: Yfirtollvörðurinn á Keflavíkurflugvelli segir  fundinn einn sá stærsta..... Glöggir  fréttamenn sem  hlusta á eigin lestur eiga að heyra  þegar þeir láta sv ona ambögur sér um munn fara. Yfirtollvörðurinn sagði fundinn einn  þann stærsta..., eða: Yfirtollvörðurinn sagði að fundurinn væri einn sá stærsti...

 

 

 

Molaskrifari veltir því fyrir sér hvort hægt sé að tala um lýðheilsu fólks, eins og viðmælandi  fréttastofu Ríkisútvarpsins gerði (25.03.2011)

 

Það er alvarleg ásökun, þegar formaður  Bændasamtakanna heldur því fram í fréttum Ríkisútvarpsins (25.03.2011) að skýrsla  Ríkisendurskoðunar um  samskipti  ríkisvalds og hagsmunasamtaka  bænda, sé pólitískt  plagg. Einhver hlýtur  að bregðast við.

 

Molaskrifari er orðinn leiður á að hlusta á  eilífar fréttir af heilsufari íþróttamanna í ýmsum greinum  og endalausar  romsur um ráðningar  þjálfara innanlands og utan.  Varla getur verið  að meirihluti þjóðarinnar lifi og hrærist  með þessum málum. Getur ekki  hin fjölmenna íþróttadeild  Ríkisútvarpsins bara haldið þessu fyrir sig?

 

 

Framkvæmd losun annarra hafta verður svo ákveðin  ....  sagði fréttamaður Stöðvar tvö (25.03.2011) Hér hefði   átt að segja:  Afnám annarra hafta verður  svo ákveðið.... Í  sama fréttatíma var rætt við  Norðmann, sem var vel mæltur á íslensku, - talaði  mjög  góða  íslensku. Þú talar  alveg svakalega fína íslensku, sagði fréttamaður. Molaskrifara fannst ekkert svakalegt við  góða íslenskukunnáttu Norðmannsins. En þetta þykir nú líklega  vera nöldur !

Athugasemdir

[Þór Ómar Jónsson, 26.3.2011 kl. 17:00]

ekki get ég tekið undir orð þín um að athugasemdir þínar séu nöldur. þær eru í versta falli bráð skemmtilegar og þessi um norðmanninn er frábært dæmi um hversu illa ég og fleiri tölum. ég myndi sjálfur láta þetta út úr mér svona .

ein spurning. nafnið grensásvegur er furðulegt og mér langar að vita hvernig það kemur til. veist þú það?

[Eiður Svanberg Guðnason, 26.3.2011 kl. 18:03]

Sæll Þór Ómar.    Þú spyrð um Grensásveg. Vegurinn dregur  nafn sitt af  ásnum, Grensási. Fróður maður hefur  hinsvegar sagt mér að orðið gren, (ekki greni) þýði sól og sé    úr  írsku , gelísku.  Mér þykir  mjög sennilegt að það sé rétt, en hefur  ekki tekist að finna staðfestingu á því.

[Sigurður O (IP-tala skráð) 27.3.2011 kl. 00:54]

Heyrt hef ég þá kenningu, að nafnið eigi uppruna sinn frá þeim tíma er dönsk áhrif voru mikil á Íslandi. Talið að þar sem gatan (vegurinn) liggur hafi verið "bygrænsen" þ.e.a.s. að þangað hafi umdæmi Reykjavíkur náð á þeim tíma, þannig að Grens- er framburðarstafsetning á dönsku að viðbættum ás, sem lýsir landslaginu. Annað dæmi um örnefni í grennd við Reykjavík er "Gullbringusýsla". Menn reyndu að skýra nafnið sem svo, að í fjallgarðinum væru svokallaðar Gullbringur! En mig minnir að ég hafi lesið það einhvers staðar hjá Birni Þorsteinssyni, sagnfræðingi, að nafnið hafi verið misskilið í dönskum Bessastaðatexta, þar sem Danir töluðu um " ...de guld indbringende sysler" hinar arðsömu sýslur, en vegna vanþekkingar á dönskunni, varð til nafnið Gullbringusýsla. Bessastaðavaldið var einmitt sterkast á Suðurnesjum og upp í Kjós og arðsemin í hlutfalli við það.

[Þór Ómar Jónsson, 28.3.2011 kl. 19:31]

takk fyrir þetta. menn voru vissir um að nafnið ætti rætur að rekja til grenis :-). okkur fannst ólíklegt að "grens" kæmi til greina nema þá helst ef það tengdist "að vera á grensunni".