Molar um málfar og miðla 556

  Sitthvað hefði mátt betur fara  í fréttatíma Stöðvar tvö á laugardagskvöld (12.03.2011).  Í fréttum af náttúruhamförunum í Japan   talaði fréttamaður um Íslendinga,sem dveldu í landinu.Betra hefði verið að tala um íslendinga  sem dveldust í landinu.  Sögnin  að valda veldur  mörgum fréttamönnum erfiðleikum. Í þessum fréttatíma sagði fréttamaður: ... flóðbylgjan, sem hefur ollið gífurlegri eyðileggingu. Hér hefði  auðvitað átt að segja. ... sem valdið hefur  gífurlegri eyðileggingu. Þá var í þessum fréttatíma talað um ævintýralega há verð á minkaskinnum.  Betur hefði farið á að tala um ævintýralega hátt verð á minkaskinnum.

    Í áttafréttum Ríkisútvarpsins  (12.03.2011) var  sagt að  minnst 1300 manns hefðu misst lífiðí náttúruhamförunum í Japan. Á íslensku tölum við um að láta lífið, ekki missa lífið. Að missa lífið er enskættað orðalag.

   Úr mbl.is (13.03.2011): ... vegna stórrar sprengingar í verinu...  Málvenja er að tala um öfluga sprengingu fremur en stóra sprengingu.

  Það er eins og  stjórnendur  fréttastofu  Ríkisútvarpsins átti sig ekki á því að það fer ekki endilega saman  að vera góður fréttamaður og að vera  góður fréttalesari eða þulur. Þetta hefur  verið einkar áberandi í   Ríkissjónvarpinu undanfarna daga.

 Í  Fréttablaðinu (12.03.2011) eru  þeir sem bera líkkistu úr kirkju kallaðir  kistuberar. Það er  rangnefni. Þeir sem, bera  kistu við jarðarför heita líkmenn á íslensku. Það er engin ástæða  til að kasta því orði fyrir  róða.

 Skrifað er á pressan.is (12.03.2011): Fundurinn var þétt setinn og þeir foreldrar sem voru mættir byrjuðu á því að kjósa nýjan ritara og fundarstjóra.  Það er út í hött að  tala um að fundur sé þétt setinn.  Fundur getur  verið vel  sóttur, fjölmennur. Salur getur verið þétt setinn.

Athugasemdir

[Sigurður Bogi Sævarsson (IP-tala skráð) 14.3.2011 kl. 09:14]

Allt gildar athugasemdir: 

Hér má við bæta, að gjarnan er sagt að bekkurinn sé þétt setinn. Þá er gömul íslensk málhefð er að segja, að þröngt sé setinn Svarfaðardalur! Það orðatiltæki mætti heyrast oftar!

kv. sbs

[Emil Ragnar Hjartarson (IP-tala skráð) 14.3.2011 kl. 12:47]

. Björgunarsveitarmenn  hafa í morgun hjálpað til við að ná í bíla sem ökumenn urðu að skilja eftir á Holtavörðuheiði í nótt. Í hádegisfréttatíma RUV var einn hinna vösku bjargvætta spurður um hvernig gengi. Hann kvað ganga allvel,"Það eru "einhverjir þrír bílar eftir á heiðinni"

Hvað þýðir þetta? 1.Það eru líklega þrír bílar eftir eða 

                            2. Það eru þrír bílar eftir en við vitum ekki hvaða bílar það eru.

Skelfing er nýyrðið "gærnótt" ömurleg viðbót við íslenskan orðaforða. Ég hef heyrt  það notað  ítrekað.Þetta mun merkja það sama og fyrrinótt

[Eiður Svanberg Guðnason, 14.3.2011 kl. 13:50]

 Ég þakka ykkur  Sigurður Bogi og  Emil Ragnar fyrir þessar prýðilegu athugasemdir. Allt er þetta réttmætt.