Molar um málfar og miðla 540

 Kafarar skoðuðu undir Goðafoss í dag var sagt í  sexfréttum Ríkisútvarpsins (23.02.2011) Sama orðalag var notað í  fréttum Ríkissjónvarps. Þetta  er hálfklaufalegt orðalag. Betra  hefði verið að  segja, að kafarar hefðu skoðað botn Goðafoss í dag.  Í yfirliti um efni sama  fréttatíma var talað um að berja(uppreisnina í Líbíu) á bak aftur. Þetta er  rangt. Talað er um að brjóta á bak  aftur  í merkingunni að bæla niður. Svo  er  líka  hægt að tala um að berja eitthvað niður.  Fleira  var athugavert  við þessa  frétt eins og  til dæmis að tala um...  að höfuðborginni hafi verið lokað af.

Formaður Sjálfstæðisflokksins,sem Morgunblaðið kallaði nýlega vikapilt  Streingríms  J. á  ekki upp á pallborðið í Hádegismóum. Mbl.is  birt  frétt um  Icesave (24.02.2011) sem að meginefni var viðtal við Árna Pál Árnason. Í niðurlagi fréttarinnar var svo ein lína: Bjarni Benediktsson, formaður Sjálfstæðisflokksins tekur í sama streng.  Öðruvísi mér áður brá.  

  Það var mikil uppsláttarfrétt á Stöð tvö (22.02.2011) að  Atlanta  flugfélagið  væri að flytja hergögn og  líklega vopn  fyrir Bandaríkjaher til Afghanistan.  Kvöldið eftir varð  fréttastofa  Stöðvar  tvö að éta þetta allt ofan í sig. Fréttin reyndist tilhæfulaus.    Þegar fréttastofan var að bera þetta til baka var talað um innihald flugvélanna. Þar hefði farið betur á því að tala um farm  flugvélanna.

  Í  fréttum Ríkissjónvarps (23.02.2011)  var tekið svo til orða:  Helmingur þeirra hugmynda...hafa átt  viðkomu... Betra hefði verið: Helmingur þeirra hugmynda .... hefur haft viðkomu   eða   er kominn frá ...Svo var sagt:  Hugmyndahús háskólanna verður hinsvegar lokað næsta mánudag. Betra  hefði verið: Hugmyndahúsi háskólanna verður hinsvegar lokað á mánudaginn (kemur).

 Frétt Stöðvar tvö (23.02.2011) um uppsagnir karla og kvenna á heilbrigðisstofnunum víðvegar um landið var botnlaus. Okkur var sagt, að  15 körlum og  92 konum hefði verið sagt upp. Okkur var hinsvegar ekki sagt hve margir  karlar og hve margar konur  störfuðu við þessar stofnanir áður en uppsagnir komu til framkvæmda..  Þess  vegna vissum við ekkert um hvort hlutfallslega fleiri konum en körlum hefði verið sagt upp.  Undarlega slök vinnubrögð.

   Merkilegt hvað Ríkissjónvarpinu gengur illa að láta seinni fréttir  hefjast á réttum tíma (23.02.2011) þótt ekkert hafi borið út af í dagskránni.  Það þarf að fá fólk   sem kann á klukku til að stjórna  útsendingunni.

 Fínt  viðtal í Kiljunni við Unu Margréti Jónsdóttur, sem  unnið   hefur merkilegt menningarstarf   með söfnun   og  rannsókn söngvaleikja.  Molaskrifari tekur undir  allt  sem  þau  Páll Baldvin og Kolbrún sögðu um  Fátækt  fólk Tryggva Emilssonar.  Seilist fljótlega upp í hillu  til að endurlesa þá góðu bók.

   Mjög  góður pistill Kolbrúnar Bergþórsdóttur í Morgunblaðinu (24.02.2011).  Hún  veltir því fyrir sér hvort  fyrrum andstæðinga Ólafs Ragnars snúist til varanlegs fylgis við hann. Það eru kannski  svona innanbúðarhugleiðingar. Kolbrún greinir ástandið rétt: Á Bessastöðum situr einstaklingur sem  trúir fyrst og fremst á  sjálfan sig og  eigið ágæti og sér fátt annað.

Athugasemdir

[Guðjón Sigþór Jensson, 26.2.2011 kl. 22:00]

Já það er alveg furðulegt hversu margir eru hirðulausir um daglegt mál.

Þannig nota sumir orðið helmingur og orðasambandið helmingi meira eða minna eftir atvikum, rétt eins og það sé e-ð óákveðið. Rökrétt er að tala um að e-ð sé helmingi meira þegar það er 50% meira. Sumir vilja meina það sem rökrétt sé tvöfalt meira.

Ungur lærði eg að staldra við orðið en sem á eftir kemur orðasambandinu „helmingi meira“ eða „helmingi minna“. Við það ætti ætíð að miða sem á eftir því orði kæmi. Þannig væri 3 helmingi meira en 2 o.s.frv. en vandinn verður meiri þegar talað er um að e-ð sé helmingi minna en e-ð annað. Þar virðist sem mörgum þyki hann hafa frjálsar hendur við hvað miðað er.

Hvernig væri að fólk taki fremur einfaldlega til prósentuútreikning til að draga úr ónákvæmin. Þá væri eðlilegra að tala um 33% eða 50% meira eða minna miðað við eitthvað fremur en helminginn af e-u eins og þeir eiga oftast við.

Hugsun á íslensku er orðin allt of ónákvæm og er það kannski skýringin á því hvers vegna aldrei verður hægt að treysta neinu nú orðið?

Endilega haltu áfram að hreyfa áfram við amböguhættinum hjá okkur. Þú átt „þúsund þakkir“ skildar Eiður, eins og þeir segja í Danmörku.

Góðar stundir

Mosi