Molar um málfar og miðla 535

    

Í fréttum Stöðvar tvö, um strand Goðafoss var sagt: Sjópróf   verða gerð.  Sjópróf eru ekki gerð. Sjópróf fara fram.  Ekki mjög flókið.  Í  einni frétt Ríkisútvarpsins af strandinu var sagt: Norska útvarpið  náði síðdegis  samband við...   Ekki nógu gott.  Norska útvarpið  náði  sambandi við....

  Morðin verða enn fleiri og hrikalegri,  sagði í auglýsingu um nýja þáttaröð á  Stöð  tvö. Þetta  er sannarlega tilhlökkunarefni fyrir þá, sem kjósa að  kaupa  það sem  Stöð  tvö hefur á boðstólum. 

  Fjölmiðlar hafa að undanförnu rætt það í síbylju hvort forseti Íslands muni synja lögunum um Icesave.Synja lögunum um hvað?    Molaskrifari spyr . Hann kannast ekki við þessa notkun sagnarinnar að synja. Talað er um að synja einhverjum um eitthvað. Mér var synjað um vegabréfsáritun til Bandaríkjanna. Réttara  væri að  fjölmiðlar veltu því fyrir sér hvort forseti Íslands ætli að neita að undirrita lög Alþingis  um Icesave.

   Í fréttum Ríkissjónvarps (18.02.2011)   fullyrti  forseti Ísland að  Alþingi  hefði tekið sér lengri  tíma  til að fjalla um Icesave   en nokkuð annað  annað mál.  Þess  eru mörg  dæmi að forseti  lýðveldisins sé ekki mjög  minnisgóður á fortíð sína og annarra. Molaskrifari er næsta viss um að Alþingi tók sér á sínum tíma  lengri tíma  til að fjalla um aðild okkar  að EES  en Icesave núna.   Ætli Hjörleifur Guttormsson hafi ekki talað álíka lengi  gegn  EES og öll stjórnarandstaðan gegn Icesave í þessari lotu ?

 Í  Molum  gærdagsins var  vikið að  væli  Víkverja  Morgunblaðsins um  „smánarleg" framlög  ríkisins  til knattspyrnu á  Íslandi og minnt á  Knattspyrnusambandið hefði skilað  tugmilljóna hagnaði í fyrra. Í hádegisfréttum Ríkisútvarpsins  (18.02.2011) kom fram þessu til  viðbótar að knattspyrnudeild  eins  íþróttafélags  hefði grætt 72 milljónir í fyrra! Og svo  vilja menn seilast enn dýpra í vasa  skattborgaranna, þar sem ekki er mikið fé  að finna.

 

Athugasemdir

[Ármann (IP-tala skráð) 19.2.2011 kl. 18:03]

Það væri gaman að sjá þegar ströndin verður "dýpkuð"

Ströndinni verður breytt

Goðafoss á strandstað. Mynd/ afp.

Jón Hákon Halldórsson skrifar:

Til stendur að gera breytingar á ströndinni, þar sem Goðafoss strandaði á fimmtudag, til þess að reyna að koma í veg fyrir að óhöpp af þessu tagi verði aftur. Það munu þó líða nokkur ár þangað til breytingarnar ganga í gegn, að því er fram kemur í Dagsavisen.



Til stendur að sprengja grjót undir sjónum á fjórum fimm stöðum til þess að dýpka ströndina og breikka hana þannig að hún verði öruggari, segir Harald Andreassen hjá norsku strandgæslunni.

 Skemmtilega orðað ekki satt?

[Eiður Svanberg Guðnason, 19.2.2011 kl. 18:38]

 Þetta er hreint  stórkostlegt !

Takk fyrir sendinguna !

[Trausti Harðarson (IP-tala skráð) 19.2.2011 kl. 19:49]

Framhald fréttarinnar er ekki lakara:

Harald segir að til standi að framkvæmdirnar fari fram á árunum 2014-2019. Hann segist ekki geta fullyrt að hægt hefði verið að koma í veg fyrir strand Goðafoss þrátt fyrir að breytingarnar væru þegar gengnar í gegn.