Molar um málfar og miðla 521

 

 Ferðaþjónustan fullsödd af dýrum  mat , er fín   forsíðufyrirsögn í Fréttablaðinu (004.02.2011).

Molaskrifari las það einhversstaðar, að vefurinn ring.is  hafi verið tilnefndur til  íslensku vefverðlaunanna. Það  þykir Molaskrifara skrítið. Orðið  ring er  nefnilega ekki  íslenska  heldur enska.

 Það er ekkert til ,sem heitir um tuttugu og níu  manns eins og sagt var í hádegisfréttum Ríkisútvarpsins (03.02.2011). Tuttugu og níu manns eru  tuttugu og níu manns. Ekkert um. Það er hinsvegar hægt að segja um  þrjátíu

 Í hádegisfréttum Ríkisútvarpsins (03.02.2011) sagði íþróttafréttamaður: .. þar ber hæst stórleikur...  Það verður að gera þá kröfu  til íþróttafréttamanna að  þeir   kunni að beita jafneinföldum orðatiltækjum  eins og að eitthvað beri hátt eða hæst.

 Stundum er  eitt  sagt og annað meint. Þegar sagt er ,að  ráðherra þurfi að íhuga stöðu sína  er átt við að hann eigi að segja af sér. Þegar sagt er  að kanna þurfi umboð formanns  Sjálfstæðisflokksins er átt  við að   setja eigi formanninn af.   

Icesave frumvarp samþykkt , sagði  í villandi fyrirsögn á fyrirsögn á fréttavef  Ríkisútvarpsins (03.02.2011). Af fyrirsögninni  lá beint við að draga þá ályktun að málinu væri lokið á Alþingi.  Svo er ekki. Verið var að samþykkja frumvarpið til  þriðju umræðu. Áður hefur komið fram að  málið fer á  ný til nefndar milli annarrar og þriðju umræðu  eins og  oft  gerist. Þetta eru ekki  vönduð vinnubrögð. Fleiri miðlar féllu reyndar í þessa sömu gryfju.

 

Athugasemdir

[Ben.Ax. (Benedikt Jóhannes Axelsson), 4.2.2011 kl. 17:14]

Sæll. Ég er ekki sammála þér um:  Það verður að gera þá kröfu  til íþróttafréttamanna að  þeir   kunni að beita jafneinföldum orðatiltækjum  eins og að eitthvað beri hátt eða hæst.

Orðatiltæki er í mínum huga orðtak eða málsháttur. En burtséð frá því finnst mér ekki einfalt mál að fara rétt með þetta.  þegar sögnin er óp. tekur hún með sér þf. og því segir maður húsið ber við loft. Nú vill svo vel til að hús er eins í nf. og þf. Hvað á þá blaðamaður sem er fljótur að hlaupa að gera ef hann er að fjalla um kirkju. Á hann að segja kirkjan ber við loft eða kirkjuna ber við loft? Ef hann veit ekki betur tekur hann þann kost að giska og þá fer stundum verr en illa.

Ég myndi ekki hengja neinn fyrir að fara rangt með þetta þótt ég mætti ráða því að það er þó að minnsta kosti skiljanlegt hvað verið er að segja. Margt annað, sem sagt er og skrifað, orkar hins vegar svo mjög tvímælis að mínu mati að það þarfnaðist hengingar í stórum stíl.

[Eiður Svanberg Guðnason, 4.2.2011 kl. 20:07]

„Þar sem jökulinn ber við, hættir landið að vera jarðneskt en jörðin fær hlutdeild í himninum .... " (Heimsljós, HKL) Þetta skiptir máli. Við verðum sjálfsagt seint sammála.

[Emil Ragnar Hjartarson (IP-tala skráð) 4.2.2011 kl. 20:13]

Það var verið að ræða hvort leyfa skuli konum að bera klæðnað sem heitir Búrka en þá  er andlitið hulið skilst mér. Í umræðunni var það haft á móti þessum klæðnaði að í honum væri manneskjan  ópersónugreinanleg , ég er ekki að skrökva, þetta orð var notað. Af hverju  þarf að búa til svona óskapnað ? Má ekki segja að manneskjan þekkist ekki í þessum fatnaði eða að hún sé óþekkjanleg ?

[Eiður (IP-tala skráð) 4.2.2011 kl. 21:42]

  Hræðilegt orð ! -