Til marks um málefnafátækt

   Fyrirgangurinn í stjórnarandstöðunni á Alþingi í dag er  til marks um málefnafátækt. Að gera ríkisstjórnina ábyrga  fyrir tæknilegri framkvæmd  stjórnlagaþings eins og  stjórnarandstaðan gerði í dag  er að seilast um hurð til lokunnar. Eru ekki allir sammála um að hinir  tæknilegu ágallar sem  Hæstiréttur fann á framkvæmdinni   hafi engu breytt um niðurstöðuna? Mér heyrist það. Það  hefur að minnsta kosti  enginn enn sem komið er fært  rök fyrir öðru.    En  tæknilegur ágallar  voru til staðar og þess vegna er kosningin  ógild. Um það  verður ekki deilt. Dómur Hæstaréttar er að sjálfsögðu lokaorðið um þessar kosningar.

  Áhugavert var að hlýða á ræður þingmanna, ekki síst  stjórnandstæðinga. Fyrir utan  Margréti Tryggvadóttur, sem líklega  flutti bestu ræðuna, var   Birgir Ármannson sá eini sem var málefnalegur.  Vigdís Hauksdóttir  hélt   sennilega að  hún væri við hljóðnemann í Útvarpi Sögu, en ekki á Alþingi  Íslendinga  og ósköp var dapurlegt að heyra konuna   segja  dómstólanir, og dómaranir . Að auki  ætti þingmaðurinn að kynna sér hvernig  kvenkynsnafnorðið dóttir beygist.

  Umfram allt  þurfa þingmenn nú að setjast á rökstóla og  leita  leiða til að  leysa þetta mál. Það verður ekki gert með gífuryrðum  varaformanns Sjálfstæðisflokksins  eða þessa þingmanns Framsóknarflokksins. Nú þurfa menn  að vanda sig og sleppa   stóryrðum. 

Athugasemdir

[Guðrún María Óskarsdóttir., 26.1.2011 kl. 02:23]

Sæll Eiður.

Þingmenn, ber ríkisstjórn sú er situr ekki ábyrgð á framkvæmdavaldi því sem fyrir hendi er við framkvæmd kosninga ?

kv.Guðrún María.

[Eiður Svanberg Guðnason, 26.1.2011 kl. 06:05]

 Landskjörstjórn ber  ábyrgð á framkvæmd kosninganna. Alþingi ber ábyrgð á lögunum,sem  voru ekki gallalaus, en  því er  auðvitað hægt að halda fram að ríkisstjórn sé  ábyrg  fyrir nánast öllu sem gerist í landinu.