Molar um málfar og og miðla 499

 

  Í hádegisfréttum Ríkisútvarpsins (11.01.2011) las þulur án þess að hika: Kaup Kínverja hefur engin  áhrif á ...  Orðið kaup er  hér fleirtöluorð og þess vegna hefði þulur átt að segja: Kaup Kínverja  hafa engin áhrif á ....Verð á 95 oktan bensíni kostar nú ... las  þulur  sömuleiðis án þess að hiksta í sexfréttum Ríkisútvarpsins (10.01.2011). Verð kostar ekki. Hér hefði verið betra að  segja: Verð á  95 oktan bensíni er nú....  Of margir í Efstaleitinu  eru, að því er virðist, með laskaða máltilfinningu.

  Málblómin voru mörg í fréttum Stöðvar tvö  á mánudagskvöld (10.01.2011). Þar var meðal annars sagt: Ekki leggja  allir trúnað við...í merkingunni ekki  trúa allir. Talað er um að leggja  trúnað á eitthvað , að trúa einhverju.  Síðan var talað um að versla  bakkelsi.  Það er eins og fréttamenn Stöðvar tvö geti  alls ekki gert greinarmun á sögnunum að versla og  að kaupa. Þær merkja ekki það sama.  Sagt var, að flugslys hefði orðið í  miklum snjóbyl. Af hverju ekki í stórhríð  eða mikilli snjókomu? Það er ekki  íslenskulegt  að tala um mikinn snjóbyl. Loks var frétt um vegagerð á   Vestfjörðum.  Í inngangi  fréttarinnar var sagt, að vegurinn  lægi í gegnum hlaðið á tilteknum bæ.  Betur var þetta orðað í fréttinni, er fréttamaður sagði að vegurinn lægi  um bæjarhlaðið.

   Jafnágætur félagsskapur og SÍBS er  og alls góðs maklegur, finnst  Molaskrifara   „vinarauglýsingar" happdrættis SÍBS  einstaklega væmnar. Molaskrifari hefur átt  miða í happdrættinu frá því að það var sett á laggirnar og  virðir það sem þessi samtök hafa vel gert, sem er margt og mikið.

 

 Margt er  hnýsilegt í  tilvitnanabókinni,  sem  Hannes Hólmsteinn  sendi frá  sér fyrir jólin. Það er ekki öllum gefið að   setja saman svona bók með pólitískri slagsíðu en Hannesi Hólmsteini hefur tekist það.  Engu er líkara  en  úr  hópi seinni tíma  Íslendinga hafi  fólkið  fyrst verið valið , svo leitaðar uppi tilvitnanir. Er Molaskrifari blaðaði í bókinni fann hann  strax  eina villu.  Halldór Blöndal orti ekki vísuna snjöllu,sem honum er eignuð:

Hver er þessi eina á ,

sem aldrei frýs ?

Gul og  rauð og græn og blá

og  gjörð af SÍS.

  Halldór Blöndal er snjallhagyrðingur, en hann orti ekki þessa vísu. Hún er eftir  Pétur B. Jónsson  sem lengi var starfsmaður Iðunnar á Akureyri og áin því verið honum nærtækt yrkisefni, en hún breytti litum, þegar verið var að lita ull í verksmiðjunni. Um þetta má  lesa í Morgunblaðinu 18.03.2000. Sá  Halldór Blöndal, sem ég þekki , mundi seint  vilja að honum væri eignuð vísa,  sem annar maður hefði ort. Vandaður fræðimaður hefði spurt Halldór hvort hann hefði ort  vísuna. Ég er viss um að  svar Halldórs hefði verið: Nei.  Vonandi eru  ekki margar villur af sama toga í þessari þykku bók.

Athugasemdir

[Bergljót Gunnarsdóttir, 12.1.2011 kl. 22:53]

En hefur kaupið sem Kínverjar hafa einhver áhrif?

Verslun er bæði fyrirtækið og það sem fer fram í því, þ.e. þegar verslunarmaðurinn selur kaupandanum eitthvað.t.d. föt. Verslunarmaðurinn selur en kaupandinn kaupir, það er verslun. Það verslar sér enginn neitt, en allt of margir kaupa og kaupa, jafnvel umfram efni.

Orðaflaumur þeirra á Stöð tvö er nánast óstöðvandi á köflum, en væri ekki ráð að taka fréttamennina í smá málfarstíma, t.d. kenna þeim að stofn lýsingarorða er í kvk. ef. eint. sbr. lýsingarorðið hár sem er að stofni til há. Þess vegna er óþolandi að hlusta aftur og aftur á menntaða menn segja kinnroðalaust hæðstur og stæðstur. Ég býð bara eftir að þetta verði orðið svo herfilegt að einhver  þeirra segi meðstur eða beðstur. Er það ekki bara eðlilegt framhald af dellunn ef ekkert er aðhafst?

[Ben.Ax. (Benedikt Jóhannes Axelsson), 13.1.2011 kl. 00:11]

Húsgangur er orð yfir kveðskap sem enginn veit höfund að. Til eru óteljandi vísur sem enginn veit eftir hvern er. Sennilega eru jafnmargar sem eru eignaðar röngum höfundi. Um höfund fjölda vísna deila menn. Þar að auki læra ekki allir vísur nákvæmlega eins. Margt skolast til í þessum efnum en það er eðlilegt. Ég á vísu sem Jón úr Vör skrifaði á blaðsnepil sem hann reif af London Docks vindlapakka forðum daga og er eftir Stein Steinarr. Vísan hefur aldrei birst á prenti og bað hann mig að láta hana ekki fara lengra.