Skrifað og skrafað

13.11.2010 | 09:50

Molar um málfar og miðla 458

Hvað gerðist fyrir fjölskylduna mína? Þetta var letrað á skjá Ríkissjónvarpsins (11.11.2010) í kynningu á dagskrá. Annað gullkorn,sem kom á skjáinn í dagskrárkynningu (12.11.2010) : Hvernig á fólki að vera óhult? Þarna er ruglað saman Hvernig á fólki að vera óhætt og hvernig á fólk að vera óhult ? Líklega þarf að ráða fleiri málfarsráðunauta.

Það er makalaus dagskrárgerð, að Ríkissjónvarpið skuli bjóða upp á mynd, sem er bönnuð börnum klukkan 21:20 á föstudagskvöldi. Hvað eru dagskrárstjórar að hugsa?

Úr dv.is (12.11.2010): Magnús Hlynur hefur getið sér góðs orðs fyrir vandaðar og öðruvísi fréttir af málefnum líðandi stundar. Málvenja er að tala um að geta sér gott orð, ekki geta sér góðs orðs. Í 80. pistli Jóns G. Friðjónssonar um Íslenskt mál í Morgunblaðinu í júlí á árinu 2006 segir: Eitt er að geta sér gott orð en annað að afla sér einhvers. Þessu má ekki rugla saman eins og í eftirfarandi dæmi: Miðað er við að kennarar ... hafi getið sér góðs orðs [þ.e. gott orð] fyrir kennslu (Mbl. 30.4.06).

Brottrekstur Þórhalls Jósepssonar af fréttastofu Ríkisútvarpsins vekur spurningar. Fréttastjóra láðist að spyrja Þórhall, þegar Þórhallur sagðist vera að skrifa bók. Hafði fréttastjóri gert athugasemdir við vinnubrögð Þórhalls eftir að hann vissi að Þórhallur var að skrifa um fyrrverandi ráðherra? Það hefur ekki komið fram. Brottrekstur Þórhalls rýrir trúverðugleik fréttastofu og Ríkisútvarps, sem af mörgum ástæðum á í vök að verjast. Greining Þorbjarnar Broddasonar (Rás eitt (12.11.2010), prófessors og sumarafleysingamanns á Alþýðublaðinu um miðjan sjöunda áratuginn var ágæt, - svo langt sem hún náði.

Og nú hefur Lára Hanna verið rekin sem pistlahöfundur í morgunútvarpi. Hver verður næstur?

Í auglýsingu á forsíðu fylgiblaðs Morgunblaðsins , finnur.is segir (11.11.2010): ... þegar fyrirtæki eða stofnanir þurfa að ráða inn starfsmann tímabundið... Ráða inn ? Hér hefði dugað að tala um að ráða starfsmann tímabundið.

Á baksíðu Garðapóstsins (11.11.2010) stendur í heilsíðuauglýsingu: Við viljum bjóða handverksfólki og sölufólki með nýjar vörur og matvæli velkomið á Garðatorg. Það er góðra gjalda vert að glæða hið fram til þessa steindauða torg nýju lífi. Það skal þakkað. Góður prófarkalesari hefði leiðrétt þessa auglýsingu. Þarna hefði átt að standa: Við viljum bjóða handverksfólk og sölufólk með nýjar vörur og matvæli velkomið á Garðatorg.

Flokkur: Bloggar | Facebook

Athugasemdir

Takk fyrir góða málfarspistla, sem ég hef alltaf gaman af. Vonandi að fjölmiðlafólk tileinki sér ábendingar þínar.

Í upphafi morgunútvarps Rásar 2 sl. þriðjudag, um sjö leytið, sagði annar tveggja umsjónarmanna, greinilega af yngri kynslóðinni, að í dag væru 20 ár frá falli Berlínarveggsins (!!) Sei sei. Af raddbrigðum umsjónarmannsins mátti einnig ráða að hann var ekki alveg með þetta fyrirbæri á hreinu - vantar sennilega eitthvað upp á sögukunnáttuna. Hinn umsjónarmaðurinn gerði enga tilraun til að bæta hér úr og leiðrétta, heldur tók undir með félaga sínum. Eðlilega hefur yngri kynslóðin ekki þá máltilfinningu, að þessi ágæti "veggur" var alltaf nefndur Berlínarmúrinn, heldur tekur gagnrýnislaust upp úr erlendum fréttapistlum þar sem þetta fyrirbæri er nefnt "The Berlin Wall". Ætli sé ekki farið að styttast í að Kínamúrinn verði kallaður Kínaveggurinn?

Kær kveðja

Einar Kr. (IP-tala skráð) 13.11.2010 kl. 11:51