Molar um málfar og miðla 449

  Úr visir.is (02.11.2010)  Ekki er um eiginlega fjársöfnun að ræða, heldur samskot sem voru tekin einu sinni. Á íslensku er ekki  talað um að taka  samskot. Eðlilegra er að tala um að  efna til samskota, þegar fé  er safnað handa einhverjum sem er fjár vant.

 Nú erum við að tala saman, sagði fréttamaður Stöðvar tvö (02.11.2010) með fullan munninn af mat frá kokkalandsliðinu. Þetta var öldungis óþörf tilvísun í  bandaríska málvenju. Svo þykja það nú ekki góðir mannasiðir  að tala með  fullan munninn af mat.

 Hvað er fréttastofa Ríkisútvarpsins að segja okkur, þegar  með frétt um Icesavemálið (03.11.2010) er birt  birt  mynd af Icesave-kaffimáli, sem liggur á  hliðinni   við hálfblauta servíettu? Hvað eigum við áhorfendur að lesa  í þetta?  Enn eitt  dæmið um ófagleg og óboðleg vinnubrögð í Efstaleitinu.

 Hluti verðlaunafjárins verður ánafnað sjálfbærri bankastarfsemi á Íslandi, skrifar mbl.is (03.11.2010)  Málvenja er að ánafna einhverjum eitthvað. Þess vegna hefði þarna betur staðið: Hluta verðlaunafjárins  verður ánafnað sjálfbærri bankastarfsemi á Íslandi.   En hvað er átt við með  sjálfbærri bankastarfsemi?  Er verið að  hæðast að  okkur ?  Minni á  að Færeyingar kalla  hraðbankana  sjálvtökur. 

Þegar hlaupið nær hámarki sínu var sagt í  sjónvarpsfréttum Ríkisútvarpsins (03.11.2010). Þarna  hefði  mátt sleppa  orðinu  sínu.  Því var ofaukið.   Í sömu frétt var rætt  við mann sem titlaður var rafveituvirki. Það  virðulega starfsheiti hefur Molaskrifari aldrei áður heyrt.

 Molavin sendi eftirfarandi: „ Veiðimenn klaga hvor aðrasegir Pressan um klögumál rjúpnaveiðimanna á fjórhjólum. Væntanlega eru skyttur fleiri en tvær, svo ég tel að betur færi á því að segja "Veiðimenn klaga hver annan." Reyndar er þessi frétt aðeins tilvitnun í netmiðlinn Skessuhorn, en þar er sagt, orðrétt: " Einnig hafa veiðimenn verið að klaga hvern annan." Ég kann því heldur ekki vel. Nema þessir menn væru að klaga "annan hvern" veiðimann."

 

 

Athugasemdir

[Emil Ragnar Hjartarson (IP-tala skráð) 4.11.2010 kl. 14:34]

Mbl sjónvarp kynnir mynd með orðunum;"Komu upp um leynileg göng"

Þegar betur er að gáð  er ekki sagt frá neinum sem kom upp um þessi göng. Hins vegar var það lögreglan í Kaliforníu sem  fann göngin en um þau höfðu farið smyglarar með fíkniefni milli Mexíkó og Bandaríkjanna. Ég hef áður séð þetta orðalag notað  í merkingunni að finna  eitthvað. Þetta er að mínu viti ekki rétt.

Að koma upp um einhvern merkir,eftir því sem ég best veit, að ljóstra upp  eitthvað í  hegðun hans, venjulega eitthvert afbrot.

[Emil Ragnar Hjartarson (IP-tala skráð) 4.11.2010 kl. 14:47]

Aldrei skyldi seinn maður flýta sér .Auðvitað átti að segja "ljóstra upp um eitthvað ...

[Eiður Svanberg Guðnason, 4.11.2010 kl. 17:24]

 Takk fyrir þetta, Emil Ragnar. Ég var búinn að  skrifa nokkrar línur  í  sömu átt , -  til birtingar í Molum á morgun.