Molar um málfar og miðla 444

  Í Fréttablaðinu (29.10.2010) segir: Guðni tók þessum ávirðingum óstinnt upp og kvaðst... Þarna  hefði verið rétt að segja: Guðni tók þessar ávirðingar óstinnt upp...  Málvenja er að   tala um að  taka  eitthvað óstinnt upp  ekki  að taka einhverju  óstinnt upp. . Það hefði hinsvegar mátt  segja að Guðni hefði tekið  þessum ávirðingum illa.

... og  dugar metangasið sem þar fellur til sem eldsneyti á fleiri þúsundir bíla. Morgunblaðið (28.10.2010) Af hverju  fleiri þúsundir?  Nægt  hefði að segja á þúsundir  bíla. Fleiri þúsundir segir okkur ekki nokkurn skapaðan hlut. Fleiri en hvað?

 Hin tvö málin hafi átt sér stað... var sagt í hádegisfréttum Ríkisútvarpsins (28.10.2010). Mál eiga sér ekki stað. Frekar er þetta óvandað  orðalag.

  Úr mbl.is (28.0.2010): Sómölsk kona sem var fundin sek um ......  verður gert að dvelja á réttargæsludeild.  Hér skortir samræmi. Rétt hefði verið að  skrifa: Sómalskri konu sem fundin var sek  um ....    verður gert að dveljast á  réttargæsludeild.

 Í hádegisútvarpi (28.10.2010) var tvílesin   tilkynning,  sem var eitthvað á þessa leið:  Málþing,sem  halda  átti , er  frestað.   Í tilkynningatímanum   fyrir   sexfréttir las þulur þessa   sömu tilkynningu rangt orðaða,  en leiðrétti  svo textann og  sagði réttilega: Málþingi,sem halda átti er frestað. Hrós fyrir það.  

  Sannarlega var athyglisvert  að heyra einn af forvígismönnum fótboltans  segja í sjónvarpi (29.10.2010) , að  fótbolti á Íslandi  snúist bara um  peninga. Óvenjulega hreinskilin ummæli. Rétt er  svo, að við höfum í huga að  þessum peningafótbolta   er meðal annars haldið uppi með fé  sem almenningur  greiðir  fyrir Lottómiða. Það er hinsvegar ekki haft hátt um það í auglýsingum Lottósins. Þar er mest talað um Öryrkjabandalagið.

   Enn eitt dæmið um makalaus dagskrárgerð   sjónvarps ríkisins var að endursýna  gamla ameríska mynd  að loknu Útsvari á besta tíma á  föstudagskvöldi  en  sýna  svo hinn vinsæla  Barnaby fyrst klukkan  ellefu um kvöldið. Þess var getið  í prentaðri dagskrá  í blöðunum að verið  væri að endursýna myndina. Þess var ekki getið  þegar þulur kynnti myndina í sjónvarpinu. Þannig  er hægt að ljúga að okkur með þögninni. 

Hún ristir ekki djúpt þekkingin á umfjöllunarefninu, þegar menn halda að línuveiðar séu handfæraveiðar. Það  heldur lögfræðingurinn Pétur Gunnlaugsson, sem hefur  hæst  allra í Útvarpi Sögu. 

Athugasemdir

[Guðrún María Óskarsdóttir., 31.10.2010 kl. 00:52]

Sæll Eiður.

Svo vill til að línuveiðar ásamt handfæraveiðum eru samskonar veiðar varðandi það atriði að vera náttúruvænar, þ.e. fiskurinn hefur val um það að bíta á agnið.

Að tala um vanþekkingu Péturs Gunnlaugssonar á Útvarpi Sögu, á umfjöllunarefnum, er álíka því og að uppfæra Öfugmælavísurnar, því fáir fara í fötin hans með þekkingu á samfélaginu.

kv.Guðrún María.

[Eiður (IP-tala skráð) 31.10.2010 kl. 09:40]

 Eftir stendur, að maðurinn þekkir ekki muninn á línuveiðum og handfæraveiðum. Línuveiðar  eru meðal annars  stundaðar á allstórum bátum með  fullkomnum vélbúnaði þar sem  mannshöndin  kemur hvorki nálægt því að beita eða  draga.

Líklega hefur lögfræðingurinn aldrei mígið í saltan sjó, eins og sagt er á góðri íslensku.