Molar um málfar og miðla 441

  Það  viðraði ekki vel til hátíðahalda á kvennafrídaginn, 25. október. Konur létu veðrið þó  ekki aftra sér  frá því að  flykkjast þúsundum saman á Lækjartorg og Arnarhól.  Kona, sem  rætt  var við í  fréttum Stöðvar tvö,  sagði að það væri mannskaðaveður. Svo var sem betur  fer ekki. Mannskaðaveður er  veður, sem veldur manntjóni.  Ágæt var hinsvegar forsíðufyrirsögn Morgunblaðsins (26.10.2010): Um 50.000 konur börðust fyrir  hitamálum í nístingskulda.

 Athyglisverð var umfjöllun Svavars Halldórssonar í  fréttum Ríkissjónvarps (25.10.2010) um brask þeirra Jóns Ásgeirs og Pálma Haraldssonar með  fyrirtækið Iceland. Skítaflétta var það kallað. Áreiðanlega  réttnefni.  Átti þessi skítaflétta þeirra félaga  með fyrirtækið Iceland  sinn þátt í að   setja  Íslandið okkar á hliðina?

 Úr dv.is (25.10.2010) : En verkamenn sem vinna nú að breytingum á lúxusheimili hans í London eru taldir hafa lokað morðmáli sem á rætur sínar að rekja aftur til ársins 1879.   Á íslensku er ekki  hægt að taka  þannig  til orða að máli hafi verið lokað.  Það er  hinsvegar hægt að orða hugsun með þeim hætti á  ensku. Hér hefði  til dæmis mátt segja,  að talið væri að verkamenn hefðu leyst morðgátu frá árinu 1879. 

   Í þessari sömu frétt dv.is segir: Morðmálið hefur verið kallað Barnes-ráðgátan þar sem hin 29 ára gamla vinnukona, Kate Webster, á að hafa myrt Thomas með exi þegar yfirmaður hennar snéri aftur úr kirkju eitt sunnudagskvöld. Hér mætti gera  að minnsta kosti  tvær  athugasemdir.  Að tala um yfirmann vinnukonunnar er hallærislegt. Húsmóðir væri betra. Merking er líka óljós. Eru  Thomas og yfirmaðurinn tveir menn?  Í stað þess að segja,  sneri  aftur úr kirkju, væri betra að tala um að koma  úr kirkju eða frá kirkju. Eitt sunnudagskvöld er  óíslenskulegt.  Betra væri að segja, að kveldi  sunnudags. Líklega er þetta hrátt úr ensku: One  Sunday evening.

  Í hádegisfréttum Ríkisútvarpsins (25.10.2010) sagði fréttamaður: Þyrlan hlekktist á.... Hann hefði betur  sagt: Þyrlunni hlekktist á.  Það er  í samræmi við málvenju og er því rétt mál. Í sama fréttatíma var  talað um  fjallagöngumann.  Málvenja   er að segja: -  fjallgöngumaður. Hinsvegar er talað um fjallamann og fjallageit. Ef  góður íslenskumaður hefði lesið handrit  þessara fréttamanna yfir,  áður en  fréttirnar  voru lesnar fyrir okkur hlustendur  hefðu þessar villur verið  leiðréttar.   Hvar var málfarsráðunauturinn?

Athugasemdir

[Sigurður Antonsson, 27.10.2010 kl. 18:32]

Lítið var um nístingskulda á kvennafrídaginn, nema norðanlands um kvöldið. Hráslagaveður eða hryssingur væri nær lagi. Nafngiftin á deginum á heldur ekki við þegar konur ganga út af vinnustað og fara í kröfugöngur í vinnutímanum.

Skítaflétta er ekki viðeigandi orð yfir fjármálagerninga þeirra félaga Jóns og Pálma. Ef satt reynist að þeir hafa verið að véla upp bókhaldsverðmæti Iceland verslunarkeðjunnar í því augnarmiði að hafa fé af bönkunum er það miklu alvarlegri athöfn.

[Þorsteinn Briem, 27.10.2010 kl. 19:45]

Ég held að flestar konur hafi fengið frí á kvennafrídaginn.

[Þorsteinn Briem, 27.10.2010 kl. 19:57]

Fleira skiptir máli en hitastig á mælinum við útidyrnar þegar menn búa sig andlega og líkamlega undir spásséritúra.

"Wind chill (often popularly called the wind chill factor) is the felt air temperature on exposed skin due to wind. It measures the effect of wind on air temperature.

The wind chill temperature is usually lower than the air temperature, since the air temperature is usually lower than the human body temperature.

In contrast, humidity on the skin can result in a higher felt air temperature, and the heat index is used instead."

Wind chill - Wikipedia

[Emil Ragnar Hjartarson (IP-tala skráð) 27.10.2010 kl. 20:24]

Í  9.tölublaði 60.árgangs tímaritsins HEIMA ER BEST er birt viðtal við Matthías Jóhannessen. Hann er spurður

"Hefur stíl og málfari fjölmiðla hrakað eða breyst til betri vegar með árunum ?" og Matthías svarar: "Bæði og,það eru ýmsir sem skrifa og tala ágætlega í fjölmiðlum, svo eru aðrir sem ættu að vinna við eitthvað allt annað. Sumir eru svo lélegir að mínu mati að ef flugstjóri á þotu, sem ég ferðaðist með, kynni jafn mikið á þotuna og einhver þeirra á íslenska tungu, þá myndi ég líftryggja mig vel.Ég tala nú ekki um ef ég  ætti að fara í skurðaðgerð hjá manni sem væri álíka góður í læknisfræði og þeir í íslensku sem verstir eru í fjölmiðlum,þá væri ég í mikilli lífshættu .