Skrifað og skrafað

22.10.2010 | 07:36

Molar um málfar og miðla 437

Útvarp Saga hefur um langt skeið einbeitt sér að rangfærslum og óhróðri um íslensku utanríkisþjónustuna. Stjórnendur leggja sig í líma við að varpa rýrð á utanríkisþjónustuna og það fólk sem þar starfar. Það er bót í máli, að flestir sæmilega viti bornir hlustendur láta Sögubullið sem vind um eyru þjóta.

Það er verra og alvarlegra mál, að Ríkisútvarpið ohf skuli nú taka þátt í því að rægja utanríkisþjónustuna. Ríkisútvarpið er eign þjóðarinnar og til þess eru gerðar kröfur. Utanríkisþjónustan á auðvitað að þola gagnrýni eins og aðrar stofnanir ríkisins, en gagnrýni verður að vera málefnaleg, byggð á rökum og staðreyndum. Í morgunþætti Rásar tvö í Ríkisútvarpinu (20.10.2010) fóru umsjónarmenn mikinn vegna kaupa á sendiherrabústað í London, sem kostar rúmlega 800 milljónir króna. Þeir fengu til skrafs við sig þingmann Sjálfstæðisflokksins Kristján Þór Júlíusson,sem sæti á í fjárlaganefnd.

Umsjónarmennirnir höfðu ekkert kynnt sér það mál, sem þeir voru að ræða og Kristján Þór Júlíusson kaus að þegja yfir því sem hann hlaut að vita, sem fulltrúi flokks síns í fjárlaganefnd. Þeir fjösuðu fram og til baka um hversu dýrt hús væri verið að kaupa, - líkt og fasteignaverð í London væri á sömu nótum og á Akureyri eða í Breiðholtinu ! Meiriháttar hneyksli !

Staðreyndir málsins eru hinsvegar þær, að utanríkisráðuneytið seldi gamlan sendiherrabústað við Park Street í London fyrir 1700 milljónir króna og keypti annan bústað fyrir meira en helmingi lægri upphæð. Með þessum viðskiptum skilaði utanríkisráðuneytið íslenska ríkinu um 900 milljónum króna í hreinar tekjur. Örugglega var þetta stærsta hagræðingaraðgerð í öllum ríkisgeiranum árið 2009. Þetta höfðu umsjónarmenn ekki haft fyrir að kynna sér, eða vildu ekki nefna, enda hefði það spillt málinu frá þeirra sjónarhóli séð. Þeir höfðu nefnilega persónulegar skoðanir á málinu,sem þeir lágu ekki á. Kristján Þór Júlíusson alþingismaður kaus að þegja rosalega þunnu hljóði. Hann vissi betur en þagði þó.

Þá má bæta því við, að áður hafði utanríkisráðuneytið skilað íslenska ríkinu 400 milljónum króna með því að kaupa minni og ódýrari sendiherrabústað í Kaupmannahöfn í stað húss, sem ríkið hafði átt í áratugi. Og enn mætti segja frá því, að fyrir nokkrum ætlaði eigandi sendiherrabústaðarins í Peking að hækka húsaleiguna verulega. Samningur við hann var ekki endurnýjaður. Minna og ódýrara hús var tekið á leigu. Slíkt þykir auðvitað ekki fréttnæmt.

Svona vinnubrögð eiga að vera brottrekstrarsök á alvöru fjölmiðli. En auðvitað gerist ekkert hjá Ríkisútvarpinu, sem er fyrir löngu orðið stjórnlaust rekald í íslenska fjölmiðlahafinu.

Umsjónarmenn morgunútvarps Rásar tvö (þessa sem grátbiðja Leitis Gróu Ríkiútvarpsins í Hollywood á hverjum föstudagsmorgni um meira slúður) á að leysa frá störfum. Þeir valda ekki starfinu. Kristjáni Þór Júlíussyni þingmanni Sjálfstæðisflokksins er hinsvegar bara hægt að vorkenna.

Hvað þýðir: Samkvæmt fyrstu heimildum fréttastofu? Þannig var tekið til orða í áttafréttum Ríkisútvarpsins (20.10.2010) Er þá líka til eitthvað sem heitir til dæmis þriðju heimildir?

Í fréttum Ríkissjónvarpsins (20.10.2010) var sagt, að Austurbæjarskólinn,(þar sem Molaskrifari stundaði nám frá 1947 til 1952) væri fyrsta húsið í Reykjavík ,sem tengt hefði verið hitaveitunni. Molaskrifari hefur jafnan heyrt að Hnitbjörg á Skólavörðuholti ,Listasafn Einars Jónssonar, hafi fyrst húsa fengið yl frá hitaveitunni. Á netinu er að finna fullyrðingar um þetta sem stangast á . Gaman væri að vita hvort er rétt.

Þegar þessi skóli opnaði , sagði umsjónarmaður morgunútvarps Rásar tvö (20.10.2010) í viðtali vegna afmælis Austurbæjarskólans í Reykjavík. Skólinn opnaði ekki neitt. Hann var opnaður, eða kennsla hófst í skólanum. Seint holar dropinn steininn.

Flokkur: Bloggar | Facebook

Athugasemdir

"Árið 1928 var fyrsta holan boruð við Þvottalaugarnar, sem höfðu verið notaðar um áratugi til þvotta.

Við borunina jókst vatnsstreymið til yfirborðsins, 14 l/sek af 87°C heitu vatni.

Vatnið var leitt um þriggja km leið að Sundhöllinni, Austurbæjarskólanum, Landsspítala og 60 húsa í nágrenninu."

Orkuveita Reykjavíkur - Hitaveita

"1943 Hitaveita Reykjavíkur fullgerð að mestu í árslok.

Þjónaði þá byggð innan Hringbrautar, auk Norðurmýrar og hluta Melahverfis. Íbúar í Reykjavík þá um 43 þúsund."

Saga Hitaveitu Seltjarnarness

Þorsteinn Briem, 22.10.2010 kl. 17:39

líkt og fasteignaverð í London væri á sömu nótum og á Akureyri eða í Breiðholtinu !segir þú. Þetta finnst mér ekki fallega sagt. Þar að auki skil ég ekki verðið á húsinu í London. Fyrir 1.700 milljónir væri hægt að kaupa ansi margar villur í Breiðholtinu.

Ben.Ax. (Benedikt Jóhannes Axelsson), 22.10.2010 kl. 19:42

Molaþátturinn þinn verður seint heildstæður eins og stígur borgarfulltrúans. Það er vel til fundið að geta um sparnaðarþátttöku ríkisins í Park Street, ráðuneytinu til ágætis. Gagnleg þegar harðnar á dalnum er að skipta um útsýni og veggi á skrifstofunum. Snillingurinn og snyrtipinninn Óskar Wilde hafði sérlega næmt nef fyrir betri götum Lundúna. Yfirlætið varð honum síðar að falli. Óbreyttur borgari eða lítið sigldur (floginn) fréttamaður kann ekki skil á slíkum tilflutningi frá Mayfair yfir á Knightsbrigde. Líklega þessvegna berja menn olíutrommur.

Sigurður Antonsson, 22.10.2010 kl. 20:20