Molar um málfar og miðla 425

  Lánið fellur á gjalddaga , sagði íþróttafréttamaður Stöðvar tvö (06.10.2010). Lán falla ekki á gjalddaga, heldur falla  lán í gjalddaga, ef   þau eru ekki greidd á réttum  tíma. Eindagi  er gjalddagi, síðasti dagur sem unnt er að greiða skuld án þess að á hana falli dráttarvextir eða annar kostnaður.

 Vinsamleg ábending  til Kastljóss: Umræður um stefnuræðu  forsætisráðherra eru ekki eldhúsdagsumræður. Eldhúsdagsumræður  fara fram í þinglok. Þetta er málvenja, sem engin ástæða er til að breyta.

 Ekki hvarflaði það  að umsjónarmanni Kastljóss Ríkissjónvarpsins (05.10.2010) að spyrja þá mótmælendur á Austurvelli,  sem vildu að  landið  fengi  svokallaða neyðarstjórn eða utanþingsstjórn hver  ætti að skipa slíka   stjórn, eða hvernig slík stjórn ætti að starfa í sátt við  þingið. Né heldur  datt  umsjónarmanni í hug að spyrja  þá sem kröfðust þess að hreinsað  væri út úr  þinghúsinu  hverjir ættu að taka  við.  Heldur dapurleg vinnubrögð. 

Umfjöllun um  atburðina á  Austurvelli   var  betri í fréttum Stöðvar tvö og í  Íslandi í dag en  raun bar vitni í  Ríkismiðlinum (05.10.2010). Þar kom vel fram  hverskonar skrílslæti þeir höfðu í frammi sem mest bar á þetta kvöld. Málefnalegast og skynsamlegast var þó framlag  Ölmu Jennyar Guðmundsdóttur í þætti Þórhalls Gunnarssonar Í návígi í  Ríkissjónvarpinu (05.10.2010). Fínn þáttur.

Orð Kolbrúnar Bergþórsdóttur um  skrílslæti á  Austurvelli í Morgunblaðinu ((07.10.2010) eru í tíma töluð.  Fjölmiðlar þora ekki að nefna  hlutina réttum nöfnum. Það er ámælisverður heigulsháttur. Hér hefur verið  leitast við að tala skýrt um þessi mál.  Við sáum skrílslæti í  sjónmvarpinu, en  við  sáum líka fullt  af fólki sem fór með friði.

 Athyglisvert er  er hvernig  sömu  lögmönnunum  tekst  aftur og  aftur að plata   fréttamenn og  komast í sjónvarpsfréttir með „ekki-fréttir",  sbr. fréttina  um regnhlífina (05.10.2010). Fréttastofur verða að gæta þess að láta óprúttna lögmenn ekki ljúga sig inn í fréttatímana.

Valdfíkinn maður,sem forseti Íslands er, þá þarf engum að koma á óvart frétt DV (06.10.2010) um að hann skuli  þegar  byrjaður að þreifa fyrir  sér um  skipun utanþingsstjórnar. 

Athugasemdir

[Jónas Gunnar Einarsson (IP-tala skráð) 7.10.2010 kl. 14:10]

Sæll Eiður

ég fylgist öðru hvoru með þínum ágætu fróðlegu pistlum um málfar og þykir gott að vita af þér á þeirri vaktinni

og flestir hljóta að vera sammála þér og Kolbrúnu um skrílslætin og hve allt ofríki/ofbeldi er vítavert í skoðanaskiptum fólks

en þá má einnig spyrja eftir mótmæli með eggja- og skítkast alþingishúsi og alþingismönnum hvernig komið verður í veg fyrir ofríki/ofbeldi kjörinna fulltrúa almennings gegn eigin þjóð, ofríki/ofbeldi seljenda gagnvart kaupendum á markaði (bíla og húsnæðislán), ofríki/ofbeldi fjölmiðla gagnvart t.d. greinarhöfundum og bloggurum og öðrum sem láta uppi ólíkar skoðanir en þær sem hljóta náð hjá stjórnendum/eigendum

það er kannski smásmygli að segja frá því en í morgun 7 okt 10 birtir mogginn smágrein mína á bls 22 og stórskemmir svo svakalega með viðbótum og breytingum að einna helst verður fyrir manni að líkja þessum greinarstúf við alþingishús útatað eggjum og málningu.

Fátt er um svör í síma hjá mogga gamla þegar spurt af hverju; en ef þú kynnir hafa áhuga á má skoða greinina óskaddaða á jonasgunnar.blog.is. Ég ætla að henda henni inn á eftir.

Ef einhver flugufótur skyldi yfirleitt fyrir þessum óskapa breytingum moggafólksins núverandi (sem hefur haldið greininni hjá sér síðan 3.sep. sl.) skal ég vera fyrsti maður til þess að hrósa mogganum fyrir ofríkið/ofbeldið.

Fáum held ég sé betur treystandi en þér að véla óvilhallt um íslenskt mál, þess vegna datt mér í hug að nefna þetta við þig.

mkv

Jónas Gunnar Einarsson  

[Eiður Svanberg Guðnason, 7.10.2010 kl. 18:07]

Athyglisvert. Hverju breytti Mogginn?