Molar um málfar og miðla 423

  Molaskrifari hélt, að sér hefði misheyrst, þegar fréttamaður Ríkissjónvarps (04.10.2010) spurði  forsætisráðherra hvort hún vildi ekki stíga  fram á  svalir  Alþingishússins og  ávarpa mannfjöldann á  Austurvelli?  Fréttamaður hefði  alveg eins getað  sagt: Má  ekki bjóða þér út á svalirnar svo þú geti fengið  golfkúlur og grjót í hausinn, -   svona í  tilefni dagsins ?  Þetta var  út úr kú. Eins og   venjulega  eyðilögðu smáhópar skrílmenna mótmæli friðsamra borgara og ollu milljóna  tjóni, sem  skattgreiðendur borga. Lögreglan á heiður skilinn  svo og allir þeir sem fóru með friði um Austurvöll.  

Ófriðsamt haust, sagði prófessor í stjórnmálafræði,  réttilega. Fréttamaður   Ríkissjónvarps  talaði hinsvegar um ófriðarsamt haust, sem Molaskrifara finnst lakara. 

   Tveir fréttamenn Ríkissjónvarpsins  töluðu um að fleiri þúsund  manns  hefðu mótmælt á  Austurvelli (04.10.2010). Fleiri en hvað?  Þeir  áttu við að mörg þúsund manns, eða  þúsundir manna hefðu mótmælt á  Austurvelli í kvöld.  Þetta hefur svo sem verið nefnt hér áður. Það er gamall ósiður að tala um fleiri þúsund þegar átt er við mörg þúsund.

 Ruglið í Útvarpi Sögu á sér engin takmörk. Þar er aftur og  aftur talað um að forseti Íslands  eigi að rjúfa þing og boða  til kosninga. Þingrofsvaldið er ekki í höndum forseta, -  sem betur  fer. Líklega  hefði  núverandi  forseti ekkert á móti því að hafa þann rétt. Í lýðveldi hefur   forsetinn ekki þennan rétt, --  sem betur  fer.

Molaskrifari stenst ekki mátið að birta þennan snilldartexta  úr dv.is (04.10.2010): Jórunn er varaþingkona Atla Gíslasonar og var viðstödd þingsetninguna. Hún er einnig ólétt. Það var og !

 Of margar af þeim ræðum,sem Molaskrifari  hlýddi á frá Alþingi  í kvöld (04.10.2010)  voru innihaldslaust lýðskrum og  upphrópanir.  Því miður.

Athugasemdir

[Sigurður Þór Guðjónsson, 5.10.2010 kl. 19:29]

Mótmælin voru ekki neitt eyðilögð af neinum.

[Húsari. (IP-tala skráð) 5.10.2010 kl. 20:11]

Sæll Eiður.

Þessa klausu gaf að líta á vef Morgunblaðsins:

"Rétt áður en mótmælunum lauk reyndu tveir ungir menn að bera garðbekk á bálkest sem slökkt hafði verið í á Austurvöll en gáfust upp á miðri leið."

 

 

[Sigurður Rafn (IP-tala skráð) 5.10.2010 kl. 22:20]

Helgi Seljan átti frábær viðtöl við mótmælendur á Austurvelli í Kastljósþætti kvöldsins. Náði ótrúlega skýrri og sannfærandi mynd af umkomuleysi mótmælenda. Lífgaði hressilega upp á bragðdaufan þátt. Ólíkur hinu svartklædda Kastljósfólki sem helst minnir á leikendur í stjörnustríðsleik, fólki sem er í litlu jarðsambandi við hinn venjulega alþýðumann. Fórnarkostnaður sem af mótmælum hlýst er ekki mikill ef hann skilar okkur öruggara og réttlátara samfélagi. Þátturinn Návígi var einnig góður.

--

[Eiður (IP-tala skráð) 5.10.2010 kl. 22:29]

Þáttur Þórhalls var fínn.Málefnalegur og á nótum skynseminnar En Helga þáttur í Kastljósi skelfilegur, algjör andstæðam snerist eingöngu um að fá fram „hasar".