Molar um málfar og miðla 422

 

  Þið eruð  opnir til klukkan hvað?  Svona spurði þáttastjórnandi í  Útvarpi Sögu (02.10.2010). Ansi eru þeir margir,sem ekki  ráða við  sögnina að opna. Þessi þáttastjórnandi   er  illa haldinn af þágufallssýki, slettir ensku  í tíma og ótíma  (myndin á að vera svona memo!).Mesti bögubósi. Annars er makalaust að hlusta á útvarpsþátt þar sem átölulaust er hvatt til líkamsmeiðinga. En fróðlegt var að heyra að þáttastjórnandinn hafi ekki verulegar áhyggjur af neinu nema áformaðri hækkun erfðafjárskatts !

Þessi  þáttastjórnandi kallaði Þróunarsamvinnustofnun Íslands „kratabúlluna  þaðan sem mokað er milljörðum", sagði hann efnislega  , -- undir  rassinn á  einhverjum vitleysingum úti í heimi! Ótrúlegt.

Ekki er að efa  að í allan heila  dag (04.10.2010) mun Útvarp Saga hvetja til óláta við  Alþingishúsið í kvöld.

 Frétta- og þjóðlífsþátturinn Landinn fór ágætlega af stað  í Ríkissjónvarpinu og   virðist lofa  góðu.  Umfjöllunin um grásleppuna hefði mátt vera ögn ítarlegri. Makalaust að við  skulum  kasta á  fimmta þúsund tonnum af öndvegismat í sjóinn. Borðaði oft  grásleppu sem krakki, bæði nýja , saltaða og  signa. Verst  var mér við að þurfa líka að éta hveljuna. 

 Hjartaknúsarinn, sem sneri höfðum, er ákaflega útlensk fyrirsögn í sunnudagsmogga (03.10.2010) Hrátt úr ensku.

 Fréttamaður Stöðvar tvö (02.10.2010) talaði um samanrekinn grunnskóla og leikskóla.  Að vera samanrekinn  er að vera kraftalega vaxinn, þrekinn án þess að vera feitur, sterklegur. Klaufalegt orðalag, en kannski þekkir fréttamaðurinn ekki orðið samanrekinn.

 Í   hádegisfréttum Ríkisútvarpsins (02.10.2010) var sagt  frá járnbrautarslysi á eyjunni Java. Það er gróin málvenja í  íslensku að beygja nafn þessarar eyjar. Þess vegna hefði átt að tala um járnbrautarslys á Jövu. Á þetta hefur Bjarni Sigtryggsson líka bent . Í fréttum Ríkissjónvarps  var rétt farið með þetta.

Bjarni Sigtryggsson, sendi Molum eftirfarandi: „"The White House Chief of Staff" er ekki starfsmannastjóri Hvíta hússins, eins og iðulega er sagt í fréttum. Algengasta enska heitið á
starfsmannastjóra er "Director of Human Resources".

Um þetta starfsheiti segir svo á Wikipedia fræðasíðunni: "The White House Chief of Staff is the highest ranking member of the Executive Office of the President of the United States President. The
office-holder has been dubbed "The Second-Most Powerful Person inWashington" due to the nature of the job." and a senior aide to the  President."

Starfsmannastjóri fer jafnan með ráðningar-  og kjaramál starfsfólks, starfsmannastefnu og skyld mál. Nær væri að titla Rahm Emanuel forsetaritara, vilji menn leita hliðstæðna í íslenzkum embættum.
Einnig mætti kalla hann yfirmann forsetaembættisins."

Rétt  er það  sem þarna kemur fram, að forsetaritarinn er æðsti embættismaður  forsetaskrifstofunnar og  hefur verið nefndur  næst valdamesti maðurinn í Washington og nánasti samstarfsmaður forsetans.  En  svo  virðist sem íslenskir fréttamenn séu búnir að  festa þessa vitleysu í sessi. Að kalla þennan embættismann starfsmannastjóra er út í hött.

Athugasemdir

[Sigurður Hreiðar, 4.10.2010 kl. 12:36]

Þetta með nefnifallsíhaldið, sbr. eyna Jövu, er orðið býsna ríkjandi. Ég hef lengst að notað skírnarnöfn mín tvö en iðulega mátt sæta því að síðara skírnarnafn mitt sé notað óbeygt. Ég hef líka verið að hugsa um hvernig fjölmiðlar eigi eftir að fara með síðara nafn borgarstjórans í Reykjavík þegar kemur að því að það eigi að vera í eignarfalli. Gerist eitthvað í stjórnartíð Jóns Gnarrs? Eða er yfirleitt einhverra tíðinda að vænta af Jóni Gnarri?

[Emil Ragnar Hjartarson (IP-tala skráð) 4.10.2010 kl. 18:50]

Í Fréttablaðinu í dag er sagt frá viðureign Hauka og ítalska liðsins Conversano í handknattleik. Í frásögninni er að finna þessi gullkorn: "Hraðaupphlaupin voru ekki að nást hjá Haukum "

                 Illa gekk hjá þeim ítölsku: "þeir sáu fram á að markmið þeirra var ekki að fara að nást"

                  " sóknarleikurinn var að virka vel"

                   "---- áttum lítinn möguleika þegar við vorum að mæta þeim einn á einn "

 Mér finnst  þetta ekki boðlegt, vona að mér fyrirgefist það

[Eiður Svanberg Guðnason, 5.10.2010 kl. 08:24]

 Gnarr lét mála Hverfisgötuna græna að hluta og rífa niður stöðumælana. Síðan hefur ekki sést þar til hjólreiðafólks. Nú er verið að  hreinsa  grænu málninguna  af götunni  með  ærnum tilkostnaði. Kannski kemur þá hjólreiðafólkið aftur, -- og stöðumælarnir.

Emil Ragnar, - þetta er  ekki  boðlegt. Það er hárrétt. Þetta er eiginlega ótrúlegt hrognamál.