Molar um málfar og miðla 410

Svolítið villandi fyrirsögn var í mbl. is (21.09.2010) 100 ár síðan kona var tekin af lífi í Virginíu.  Þegar fréttin  er lesin,  kemur í ljós, að  fyrirhugað er að taka  konu af lífi í Virginíu, en  kona var síðast tekin af lífi þar fyrir  hundrað árum.  Fyrirsögnin var  ekki röng, en horft var framhjá aðalefni fréttarinnar.  Í fréttinni segir ennfremur: ....og hafi verið undir sterkum áhrifum frá sér klárari fólki þegar morðin, sem hún var dæmd fyrir, voru framin.  . Áhrifum frá sér klárara fólki ,væri  betra, en ekki gott.

Úr íþróttafréttum mbl.is (20.09.2010): Hvað gerðist í þessu atviki?„Þetta kallast að lesa leikinn, það gerði ég en ekki dómarinn.  Boltinn datt fyrir framan mig og það koma tveir varnarmenn á fullri ferð í mig....   Það var og.

 Aðfaranótt  þriðjudags (21.09.2010) heyrði Molaskrifari brot úr endurteknu viðtali, (öllu fremur eintali Ólafs)  við Ólaf Ragnar  Grímsson  forseta Íslands í Útvarpi  Sögu. Í þeim stutta kafla,sem  Molaskrifari  hlustaði á  voru mýmargar staðreyndavillur. Ólafur  fór ekki einu sinni rétt með árið,sem hann fór í opinbera heimsókn  til Kína. Það var 2005 ekki 2006.  Það er  líka  rangt að allir sem komi  til Peking fái særindi í háls og nef vegna mengunar. Staðreyndir hafa    aldrei staðið  Ólafi Ragnari fyrir þrifum. Stjórnendur vissu ekkert í sinn haus.    Það rifjaðist upp við að hlusta á þetta, að   árið  2005 hafði Ólafur Ragnar ekki áhuga á að heimsækja  Xianiang þar sem unnið var að hitaveituframkvæmdum  á vegum  Íslendinga. En þá var Ólafur Ragnar heldur ekki búinn að finna upp hitaveituna.

  Hausthreingerningar standa  yfir í Útvarpi Sögu , því samkvæmt   því sem segir í Fréttablaðinu er  bæði búið að  reka  Sigurð G. Tómasson og Önnu Kristine Magnúsdóttur, -- með SMS símaskilaboðum !

 Nú orðið  kynnir  Molaskrifari  sér   fyrst efni norrænu sjónvarpsstöðvanna í Mogga, áður en hann lítur á dagskrá Ríkissjónvarpsins. Það er þó tilhlökkunarefni að horfa á Kilju Egils  í kvöld. 

Athugasemdir

[Sigurður Rafn (IP-tala skráð) 22.9.2010 kl. 22:45]

Skil ekki öll þessi hnýfilyrði út í Útvarp Sögu. Liðsmenn DV ættu líka að vita að þáttagerðamenn koma og fara. Erum við bara ekki allt of góðu vön. Í tryggum höndum hjá ríkinu eða í boði banka. RÚV og Bylgjan. Hvað með alla verktakana á hinum frjálsa markaði. Iðnaðarmenn og arkitekta. Enginn kvartar yfir lánsleysi þeirra þótt litla vinnu sé að hafa.

Útvarpsmenn Sögu eru í sókn og komnir með fréttastofu og veðurágrip. Hér sannast að nýjir vendir sópa best, auka hlustun og auglýsingar. Er það ekki af hinu góða að hinir "föstu liðir" á útvarpsmarkaði fái samkeppni. Gott að vita að Ólafur Ragnar, Vinstri Grænir og Express ferðaskrifstofan eiga sér athvarf og samastað á útvarpsstöð. Stjórnarandstaða sem kemur á óvart.

[Eiður Svanberg Guðnason, 23.9.2010 kl. 08:21]

  Vinnubrögð í Útvarpi Sögu eru yfirleitt svo ófaglegleg, sem mest má verða. Nú er búið að reka þau tvö, sem einna best kunnu  til verka  Sigurð G. Tómasson og Önnu Kristine Magnúsdóttur. Það er ekki alvörufjölmiðill  þar sem  hægt er  að kaupa útsendingartíma til að hella  hvaða bulli,ósannindum og rangfærslum sem er, yfir þá sem hlusta.