Molar um málfar og miðla 400

Í skjóli tjáningarfrelsis  getur útvarpsstjóri Útvarps  Sögu, Arnþrúður Karlsdóttir  farið með lygar, óhróður og dylgjur um Eið Guðnason í athugasemdum við Mola um málfar og  miðla. En hún verður að standa ábyrg orða sinna.  Þegar  Arnþrúður Karlsdóttir hinsvegar  hefur í hótunum við eiginkonu Molaskrifara  eins og  hún gerir  í athugasemdum við Mola  ( Molar 393) er mælirinn fullur , - og skekinn. Hótun  Arnþrúðar Karlsdóttur um að  ryðjast inn á heimili okkar  er alvarlegt mál og líklega  einsdæmi  á blogginu.

  Vinsamleg ábending til umsjónarmanna  Kastljóss Ríkissjónvarpsins: Ekki misbjóða okkur með því að kalla Tómas Guðmundsson textahöfund eins og gert var í kvöld (08.09.2010). Tómas Guðmundsson var eitt  fremsta ljóðskáld liðinnar aldar.  Tómas Guðmundsson samdi ekki  texta  við gullfalleg lög  Sigfúsar  Halldórssonar.  Sigfús samdi gullfalleg  lög  við  mörg  fegurstu  ljóða  Tómasar Guðmundssonar.  Það er reginmunur á þessu.   Ekki kalla  Tómas Guðmundsson textahöfund !

 SKÝRR boðar til ráðstefnu þar sem haldin verður  lykilræða (Auglýsing 07.09.2010). Þarna er greinilega verið að basla  við að  búa til íslenskt heiti á því  sem á  ensku er kallað keynote speech. Hversvegna ekki   aðalræða?  Lykilræða er eiginlega bara  bull.

 Í frétt Ríkissjónvarpsins (07.09.2010) af umræðum á Alþingi um fjárfestingar lífeyrissjóðanna segir  fréttamaður:  og þeir  eigi að gæta hagsmuni hennar.  Rétt væri  að segja: ... gæta hagsmuna hennar.

Enska sögnin to seal þýðir  bæði að innsigla og loka vel eða þétta. Íslenska sögnin að innsigla  þýðir að setja innsigli á, loka með innsigli, lakka,  svo vitnað sé Íslenska orðabók. Í Morgunblaðinu (08.09.2010) er fjallað um sultugerð og þar er talað um að innsigla krukkurnar í lokin. Það ætti nú að vera óþarfi á flestum heimilum. Molaskrifari er nýbúinn að  sjóða dýrindis krækiberjahlaup en honum láðist alveg að innsigla krukkurnar. Lét nægja að loka þeim vel.

Velunnari Mola, Molavin, sendi eftirfarandi:  „Eyjan.is: "Coleen hefur fyrirgefið honum áður en kynni hans af Jenny Tompson mun vera dropinn sem fyllti mælinn." Mér finnst ég sjá það æ oftar að fólk, sem þekkir ekki helstu orðtök notar þau engu að síður, og þá ranglega. Dropinn holar að vísu steininn, en það er kornið, sem fyllir mælinn. --Molavin."

Athugasemdir

[Sigurgeir Jónsson, 9.9.2010 kl. 21:33]

Linmælgi þín er of mikil til að þú getir kennt íslensku.Hún skýn jafnvel í gegnum hið prentaða orð.Þegar lygar og óhróður,órökstuddur, um virtan útvarpsstjóra, sem þú varðst aldrei, bætist við, ættir þú að athuga þinn gang.Ef einhver ætlar að bæta sig í íslensku ætti hann að forðast að lesa bull þitt.

[Heimir Tómasson, 10.9.2010 kl. 07:27]

Linmælgi ritast ekki. Skín er með einföldu -i, ekki y. Hvernig linmælgi skín í gegnum prentað orð er ofar mínum skilningi. Kommur eru gjarnan notaðar til að skipta niður lengri málsgreinum, til að auðvelda skilning á hvaða orð tilheyra hvert öðru og auka skilning á lengri setningum. Setningin þín hefði komið betur út svona:

"Þegar lygar og órökstuddur óhróður um virtan útvarpsstjóra - sem þú varðst aldrei - bætist við, ættir þú að athuga þinn gang."

Einnig þykir það góð Íslenska að hafa bil á milli orða. Ég bætti nokkrum slíkum í setninguna svona til að kynna þér hugtakið og koma með - eins og kallað er - áþreifanlegt dæmi. Ekki reyna að kenna Íslensku þegar þú kannt hana ekki sjálfur.

Bara að benda á þetta fyrst þú virðist hafa meiri áhuga á því að reyna níða skóinn af Eiði á þann eina máta sem að þú heldur að komi að notum. Það er ekki alveg að ganga upp hjá þér. Ég held að þér myndi frekar nýtast að rýna í hvernig Eiður bendir á málvillur í staðinn fyrir að froðufella yfir skoðunum hans. Skoðunum sem mér er reyndar alveg sama um, ég les pistlana til að auki við Íslensku (eða kannski Íslenzku) kunnáttu mína.

Ég þakka þeim er hlýddu.

[Jón H. Brynjólfsson (IP-tala skráð) 10.9.2010 kl. 20:42]

Alltaf er það neyðarlegt þegar menn setja sig á háan hest og skrifa af öðru eins yfirlæti og Heimir Tómasson - ekki síst þegar þeir hafa ekki efni á því. Honum er hér með bent á að orðið "íslenska" er ekki skrifað með stórum staf.

Eiður, þakka þér fyrir áhugaverða pistla. Ég er oft ósammála þér, eins og gengur, en það er bara betra!

[Heimir Tómasson, 10.9.2010 kl. 23:04]

Ég er búsettur erlendis og ein af ástæðum þess að ég les pistlana er til að bæta kunnáttu mína í íslensku. Ég þakka þér fyrir þennan fróðleik.