Molar um málfar og miðla 397

   Óralöng frétt Stöðvar tvö (05.09.2010) um morðið í Hafnarfirði bætti nákvæmlega engu  við fyrri fréttir af málinu. Svo eru fjölmiðlar hissa á að  hnífur  sem leitað er að í drullunni á botni hafnarinnar í Hafnarfirði skuli ekki finnast samstundis.  Sennilega er auðveldara að finna saumnál í heystakki.

 Jón Baldvin Hannibalsson var  skýrmæltur og skörulegur að vanda í endurteknum  viðtalsþætti í Útvarpi Sögu á sunnudagsmorgni ( (05.09.2010). Þar sópaði hann til hliðar með einni setningu  utanþingsstjórnarbullinu sem veður uppi í þessum fjölmiðli oft  á dag. En áfram munu þau hjúin, Arnþrúður og Pétur ,sem  stjórna þessar  stöð  halda áfram að  fjasa um utanþingsstjórn,sem  sýnir það eitt að þau  þekkja ekki til þingræðis eða lýðræðis.

 Úr mbl.is (05.09.2010)... þar sem stór jarðskjálfti varð aðfararnótt laugardagsins. Molaskrifara finnst eðlilegra að tala um harðan jarðskjálfta, eða  snarpan jarðskjálfta heldur en  stóran  jarðskjálfta.

 Kraftaverk að enginn hafi látið lífið í jarðskjálftunum, sagði visir.is (04.09.2010) um jarðskjálftana á Nýja Sjálandi. Betra hefði verið: Kraftaverk að enginn lét lífið.

Nú (05.09.2010) eru klerkar  komnir í hár saman í  fjölmiðlum vega  biskupsmálsins. Það hlaut að koma að því.

 Lottóið á svo mikla peninga,að það hlýtur að geta ráðið sæmilega talandi fólk til að kynna  útdráttinn á  laugardagskvöldum. Kynningin  sl. laugardagskvöld (04.09.2010) var  ógóð.

...þegar jörð skreið af stað, hreif með sér  hús og bíla og endaði úti í sjó, var sagt í  fréttum Ríkissjónvarpsins (04.09.2010).  Ekki mjög vel að orði komist, - og heldur ekki þegar sagt var  að íþróttafréttamaður væri með smekkfullan pakka. Það er ekki boðlegt orðalag. Ekki  var sjáanlegt að íþróttafréttamaður héldi á pakka og ekki veit Molaskrifari hvernig smekkfullur pakki lítur út. Í sama fréttatíma var  sagt  frá nýrri flugvélategund  frá  Boeing  sem  nú er  á Keflavíkurflugvelli þar sem flugmenn æfa lendingar í hliðarvindi. Fréttamaður sagði um þessar þotur , að ein þeirra æfði nú flugtak og lendingu... Vélin æfir að sjálfsögðu hvorki  eitt  né neitt.

 Í skjátexta í Ríkissjónvarpinu (05.09.2010) kom við sögu  fuglategundin lyngrjúpa. Ekki hefur Molaskrifari heyrt þessarar fuglategundar áður getið  áður, en kunnátta hans í dýrafræði  er  reyndar ekki upp á marga fiska.  Lynghænu hefur hann hinsvegar  heyrt talað um. 

Þá rifjaðist upp að fyrir löngu sátu íslenskir þingmenn að  snæðingi í Kaupmannahöfn  og biðu heimferðar að loknu Norðurlandaráðsþingi. Flugu þar margar  vísur um borð.   Meðal  rétta var fugl sem hét  „moseand" á máli innfæddra. Eitthvað vafðist fyrir mönnum hvað  fugl þessi héti á íslensku, en  mest var talað um mosaönd.

Einn úr hópi þessar hagmæltu  þingmanna leiðrétti það á leiðinni heim  daginn eftir með svofelldri vísu: 

„Mosaönd" er ekki  til á okkar máli.

Laumað var með lipru táli

 lynghænu í kjaft á Páli.

 

Athugasemdir

[Emil Ragnar Hjartarson (IP-tala skráð) 6.9.2010 kl. 15:56]

Í Pressunni er í dag sagt frá vanda sem við er að stríða í Landeyjahöfn og stafar af sandburði inn í höfnina. Eyjamenn hafa að vonum áhyggjur af þessu. Í Pressunni segi:" Kvíða þeir sérstaklega vetursins "Þarna er orðið vetur rangt beygt og dregur dám af beygingu orðsins fingur. Þessi orð, fingur og vetur beygjast eins og kunnugt er eins í öllum föllum nema eignarfalli eintölu. Þar skilur á milli. Fingur er í ef.et. fingurs, vetur er í ef.et. vetrar. Það er talað um vetrarveður, vetraríþróttir eru stundaðar og einu sinni voru ráðnir vetrarmenn til starfa.Vonandi dettur engum í hug að stunda vetursíþróttir.Það er líka sérkennilegt við beygingu þessara orða að þau eru eins í nefnifalli eintölu og fleirtölu.Ég veit eitthvað upp á mína tíu fingur -ekki?fingra ?- Nemendur voru fjóra vetur í menntaskóla-ekki ?vetra? Fallbeyging er eitt af einkennum íslenskunnar.Ég skrifa þetta vegna þess að mér finnst fallbeygingin  vera nokkuð á undanhaldi um þessar mundir.Við eigum að halda fast í beygingarnar og kenna án alls undansláttar. Verum í því efni "íhaldssamir, já alveg gífurlega íhaldssamir" svo vitnað sé í  Molaskrif  í gær

[Eiður Svanberg Guðnason, 6.9.2010 kl. 17:05]

 Þakka þér þessa prýðilegu athugasemd, Emil Ragnar.  Við eigum að halda fast í beygingarnar.  Þar erum við hjartanlega sammála. Næstum í hverjum  einasta fréttatíma  Ríkisútvarps og Ríkissjónvarps heyrum  við að beygingarnar eru á undanhaldi. Nýliðarnir, margir hverjir, valda þeim ekki.

[Emil Ragnar Hjartarson (IP-tala skráð) 6.9.2010 kl. 22:32]

Þakka þér fyrir  Eiður, en ég gleymdi einu. Ég veit ekki betur en sögnin að kvíða  taki með sér þágufall  og hefði þess vegna átt að segja "kvíða þeir sérstaklega vetrinum"