Molar um málfar og miðla 386

  Það er til marks um algjöra veruleikafirringu dagskrárstjóra Ríkissjónvarpsins,að þeir skuli halda  að þjóðin vilji þátt eins og Popppúnkt í meira en klukkutíma   klukkan rúmlega  hálf átta á laugardagskvöldum.  Þetta er besti  sjónvarpstími vikunnar. Þennan þátt ætti að sýna klukkan hálf  átta á mánudagsmorgnum. Lifi nauðungaráskriftin. Það skal í það. Í kjölfar poppþáttarins kemur svo unglingaefni sem unglingarnir í minni fjölskyldu , að minnsta kosti ,hafa ekki minnsta áhuga á.

Úr hádegisfréttum Ríkisútvarpsins (21.08.2010): .. í verklagsreglum Vestiu eignarhaldsfélagi Landsbankans.  Hefði átt að vera ...í verklagsreglum eignarhaldsfélags Landsbankans. Fréttamaður sagði: Menntaskólinn á Tröllaskaga er til húsa í gamla  gagnfræðaskólahúsinu í Ólafsfirði,sem hefur gengið í gegnum töluverður endurbætur að undanförnu. Nýr skólameistara sagði: ... það væri verið að  auka fjárveitingar þar inn,  og  ... á Eyjafjarðarsvæðinu njótum við þess að skólinn er að koma inn. Á mbl.is er haft eftir sama skólameistara: : „Við förum að sjá unga fólkið meira heimavið og menntunarstigið eykst. Samvirkni milli menntastofnunar og samfélagsins skiptir máli,“ . Ekki finnst Molaskrifara þetta lofa  góðu. Ef hann ætti heima á Tröllaskaga mundi hann sennilega senda börn sín í MA. 

 Úr íþróttafréttum Ríkisútvarpsins  í hádeginu (21.08.2010):  Leikurinn,sem fram fór í gærkvöld, lauk með   fjögurra marka sigri Póllands. Hér hefði íþróttafréttamaður  auðvitað átt að segja: Leiknum, sem fram  fór í gærkvöld, lauk með  fjögurra marka  sigri  Póllands. Eða: leiknum í gærkveldi lauk með fjögurra marka sigri Póllands.  Leikurinn lauk ekki. Líklega ætti Ríkisútvarpið  frekar átt að ráða handritalesara ,en málfarsráðunaut.

Hversvegna þurfa ágæt íslensk byggðarlög að nota í  í netfangaheitum,  þegar verið er að  auglýsa á íslensku og auglýsingunum er beint að Íslendingum? Dæmi:  visitakureyri.is og visithunathing.is. Þetta eru óþarfa slettur,sem  Ríkisútvarpið ætur dynja á okkur dag eftir dag.

visir.is (21.08.2010): Jón Gnarr, borgarstjóri Reykjavíkur, setti Menningarnótt fyrir stundu í tjaldi við Ferðamálastofu Íslands Fréttavefur Ríkisútvarpsins (21.08.2010):Menningarnótt í Reykjavík var sett í 15. sinn af Jóni Gnarr borgarstjóra klukkan 13.Germynd  á visir.is er betri óþörf þolmynd ruv.is.

   Það var eitthvað barnslega bjálfalegt við það, þegar Kjartan Magnússon  fv. stjórnarformaður Orkuveitu Reykjavíkur kom í  fjölmiðla  um helgina til að kenna öðrum um ófarir Orkuveitunnar.  Sjálfstæðismenn eru  saklausir sem ungabörn. Þetta er allt öðrum að kenna.  Það er  með ólíkindum hve  sumir  stjórnmálamenn halda kjósendur heimska.

Athugasemdir

[Billi bilaði, 23.8.2010 kl. 11:02]

Popppúnktur er eðalsjónvarpsefni. Alveg eins og Kontrapúnktur var á sínum tíma. Hann er á fínum tíma, takk fyrir.

[Vendetta, 23.8.2010 kl. 22:53]

Ég er algjörlega ósammála hr. Bilaða. Mér finnst popppunktur (alveg eins og Kontrapunktur á sínum tíma) afburða leiðinlegur. Og það á laugardagskvöldi, þegar ætti að sýna spennumynd eða gott skemmtiefni! Það mætti alveg sýna þennan Popppunkt rétt eftir hádegi, þá horfi ég nefnilega aldrei á sjónvarpið.

En þar eð ég er sveigjanlegur, þá gæti ég fallizt á að hafa svona spurningarþátt að kvöldi til, en þá með öðruvísi uppsetningu. Að hafa alltaf sömu menina þrjá og þrjá saman er bara svo hallærislegt. Þetta fyrirkomulag minnir helzt á spurningakeppnirnar í Kanasjónvarpinu fyrir 45 árum.

Varðandi spurningakeppnir almennt: Ég tel, að eru börn síns tíma or eru úreltar. Eina spurningakeppnin sem mér hefur fundizt varið í, var Mastermind sem var sýnt á BBC2 sem Magnús Magnússon heitinn stjórnaði. Fjórir keppendur tóku þatt í að svara ca. 30 spurningum á 2 mínútum (eða eins mörgum og þeir gátu á 2 mín.) fyrst þungar og léttar um almennt efni og síðan mjög þungar um efni sem þeir höfðu sérhæft sig í. Í samanburði er Viltu vinna milljón? bara brandari.

Eiður: Ég leyfði mér að nota keppni í fleirtölu. Má það ekki örugglega? (Bezt að fara varlega á þessu bloggi).

[Eiður Svanberg Guðnason, 24.8.2010 kl. 07:35]

 Ég reyni nú frekar að forðast fleirtöluna keppnir, en vefur Árnastofnunar , beygingalýsing íslensks nútímamáls ,er með  fleirtöluna keppnir. Sami vefur  hefur orðið verð  einnig í fleirtölu  sem, ég hneigist mjög til að nota aðeins í eintölu.