Molar um málfar og miðla 381

  Það er ekki eitt, sem er að þessari  frétt á  dv.is (16.08.2010), heldur allt: http://www.dv.is/frettir/2010/8/16/bjorn-grunadur-um-fimmtiu-innbrot/    Reynir, ritstjóri:  Svona fólki á ekki að sleppa lausu í nánd  við nettengdar tölvur.

 Vaxandi tilhneigingar gætir til að bera  þf.et. ýmissa  orða með ákveðnum greini , eins og  brúin,  frúin, fram   eins og  þau séu skrifuð  brúnna, frúnna. Þetta er rangt. Heyrðist meðal annars skýrt og greinilega  í morgunfréttum Ríkisútvarpsins (16.08.2010).  

 Visir.is (16.08.2010): Verkjalyfinu magnýl er ekki dreift hérlendis þessa dagana,- Er verkjalyfjum dreift ?  Líklega er átt við hér, að  verkjalyfið magnýl sé ekki á  boðstólum, ekki fáanlegt í  lyfjabúðum um þessar mundir.

 Í  fréttum Ríkissjónvarps (16.08.2010) var sagt: ... og því þurftu þeir að há þriggja holu umspil (innsk. einvígi?) um sigurinn.... Nú má vera  að kunnáttuleysi hái Molaskrifara , - en ekki fannst honum þetta eðlilegt orðalag. Ekki fremur en þegar þennan  sama  dag, þegar sagt   var í  fréttum Stöðvar  tvö,  þegar  skorið var upp í dag, -   verið var að segja  frá því að  börn í  skólagörðum voru að taka upp kartöflur og grænmeti. Þau voru við uppskerustörf. Ankannalegt orðalag , en líkast til ekki rangt.

Vinstri grænir bregðast ekki fremur en fyrri daginn. Þegar talað  er um að veita lögreglu hér á landi svipaðar heimildir til rannsókna og  löggæsluyfirvöld í grannlöndum okkar hafa,  stökkva  talsmenn þeirra fram á fjölmiðlasviðið og  byrja að tala um mannréttindi.  Mannréttindi skipulagðra glæpagengja eru líklega  mikilvægari en mannréttindi almennra borgara að þeirra mati. Það ber að vernda  glæpamenn sem koma  hingað í hópum í skjóli Schengen  til að brjótast inn á heimili okkar  og íslensk fyrirtæki og  stela úr verslunum.  Heyr á endemi, segir Molaskrifari.

Tillaga Rögnu dómsmálaráðherra er fín. Hana ber að samþykkja.

 

Athugasemdir

[Bjarni Kjartansson, 18.8.2010 kl. 11:37]

Svo vogu menn að ganga milli Pontíusar og Pílatusar í morgun  þætti Bylgjunnar.  Furðuleg ganga það.

Hélt að Herodes hefði átt eitthvað með þessa göngu að gera.

Miðbæjaríhaldið

[Þorsteinn Briem, 18.8.2010 kl. 13:57]

Að heyja - að framkvæma, gera.

Að heyja orrustu - að berjast.

Að heyja þing - að halda þing.

Þeir háðu orrustu og þeir hafa háð orrustu.

En ekki: "Að há orrustu."

[Þorsteinn Briem, 18.8.2010 kl. 16:01]

Málvenja er hjá þúsundum Íslendinga að segja "hann gengur yfir brúnna" og "hann mjólkar kúnna".

Samkvæmt samræmdri íslenskri stafsetningu á hins vegar að skrifa "hann gengur yfir brúna" og "hann mjólkar kúna".

Einnig: Langur og svangur. Samt segja langflestir Íslendingar "lángur og svángur"

Og það eru ær og kýr sumra kaupmanna að mjólka kúnna.

[Eiður Svanberg Guðnason, 18.8.2010 kl. 20:00]

Já, Bjarni, vissulega kom Heródes við sögu. Þetta minnir mig á, að fyrir margt löngu varð ágætum blaðamanni, sem hættur var störfum en hélt áfram greinaskrifum , það á að tala um að „ganga milli Pontíusar og Pílatusar". Honum varð svo mikið um þetta, að hann lýsti því yfir, að nú væri hann hættur öllum greinaskrifum. Hann stóð við það.