Molar um málfar og miðla 378

 

 Mikið er á stundum metnaðarleysið í Kastljósi  Ríkissjónvarpsins.  Kallaður var á skjáinn í kvöld (13.08.2010) nýráðinn aðstoðarmaður formaður  Sjálfstæðisflokksins.  Hann hefur svo sem enga stöðu í samfélaginu, nema sem flokkshestur í Valhöll. Hafði enda lítið að segja, nema þá helst, hérna, hérna í næstum hverri setningu. Bjóðið okkur eitthvað betra á  föstudagskvöldum en menn sem  tala um Magmadílinn og   segja  að eitthvað meiki ekki sens.  Þið gerið kröfur til okkar um að borga nefskatt. Við gerum líka kröfur til ykkar.

Úr fréttum Stöðvar tvö (11.08.2010): ....enn vantar styrktarfélaginu  níu milljónir króna... Hvað á að gera við þágufallssjúka fréttamenn? Leggja þá inn á  sjúkrahús þar sem  þeim er kennd íslenska? Rúmin þar yrðu fljót að fyllast.

  Velunnari benti Molaskrifara á frétt í  dv.is, sem hefði  verið fádæma illa skrifuð. Hann sendi tengil  við  fréttina, sem  þá var búið að lagfæra talsvert. Góð er hún ekki: http://www.dv.is/frettir/2010/8/12/octopus-akureyri-paul-allen-og-felagar-kafa/

  Talsmenn þjóðkirkjunnar eru þögulir sem gröfin  um kynferðisbrot innan  kirkjunnar. Talsmaður  ráðs eða nefndar ,sem fjallar um þau efni neitar að  gefa fjölmiðlum  upplýsingar og  biskupinn kemur í  viðtal  og segist ekkert vita.  Ætlar  íslenska þjóðkirkjan að falla í sömu gryfju og kaþólska kirkjan ?

  Talsmaður Stígamóta talaði í fréttum Stöðvar tvö (12.08.2010)  um að hylma yfir um.  Hér  hefði nægt að segja hylma yfir, - leyna.  Í sama fréttatíma sagði fréttamaður .... fræðsluherferð líkt og þá sem samtök hennar hafi í undirbúningi, sé því mikilvæg. Klúður.

Úr visir.is (12.08.2010):  Að auki reyndist bíllinn vera ótryggður og þá voru ákvæði um skoðun heldur ekki fyrir hendi. Hvað eru ákvæði um skoðun? Var bíllinn ekki bara óskoðaður , eins og sagt er?

 Það er eins gott  að játa ósigur, þegar ljóst er að orrusta hefur tapast.  Molaskrifari lærði það á sínum tíma að verð væri eintöluorð. Gott  verð ,ekki  góð verð. Notkun fleirtölunnar  er  orðin  svo útbreidd að hún heyrist nú orðið oftar en eintalan. Í  sexfréttum Ríkisútvarpsins (13.08.2010) var viðtal við kvótakóng  úr Vestmannaeyjum ,sem aðeins kunni að nota orðið verð í fleirtölu. Þannig er nú það.  Hann var mjög ánægður með verðin sem hann var að fá  fyrir ferskan fisk sem fluttur var til útlanda, -- eða þannig !

Athugasemdir

[Egill Þór (IP-tala skráð) 15.8.2010 kl. 03:04]

..."nýráðinn aðstoðarmaður formaður Sjálfstæðisflokksins" ...!?

Ekki kasta steinum úr glerhúsi, Eiður, og ég held að, með öllum þessum (innsláttar)villum þínum, dagar þínir séu brátt taldir, hehe :) !! Enda er ÉG eini aulinn sem nennir að lesa þetta ennþá ... þvílíkur brandari :) !!

[Eiður Svanberg Guðnason, 15.8.2010 kl. 21:33]

Þakka þér kurteislega athugasemd, Egill Þór. Þú ert greinilega sannur heiðursmaður. Rétt er það að þarna átti að standa „formanns".