Molar um málfar og miðla 373

   Í þessa stuttu setningu hefur blaðamanni mbl.is tekist að troða ótrúlega mörgum málvillum : Um borð í dráttarvélinni var maður og barn sem flutt voru með þyrlunni til aðhlynningar á Borgarspítalann.  Menn eru ekki um borð í dráttarvél, frekar en menn eru um borð í bíl. Þá  hefði átt að segja .. voru maður og barn  og þau voru  flutt til aðhlynningar á Borgarspítalanum, sem líklega heitir nú Landspítalinn í Fossvogi.  Ef þið ritstjórar mbl.is  haldið að okkur áskrifendum megi bjóða hvað sem er, þá vaðið þið í villu og svima.  ---  Þegar sagt var frá þessu slysi í tíufréttum Ríkisútvarpsins (07.08.2010)  var talað um  lögregluna á Stykkishólmi. Hvar er nú listinn sem einu sinni var til  á fréttastofu Ríkisútvarpsins  með forsetningum með íslenskum  staðanöfnum? Sennilega hafa fréttastjórinn  og málfarsráðunautur ákveðið að fleygja honum í ruslakörfuna í nafni umburðarlyndis.

 Í hádegisfréttum Ríkisútvarpsins (07.08.2010) var sagt frá flóðunum miklu í  Pakistan.  Þar sagði fréttamaður skýrt og greinilega: Einhverjir voru orðnir úrkula vona.  Orðtakið  er að verða  úrkula vonar,  missa alla von um að eitthvað gerist.  Í sömu frétt sagði fréttamaður: ..forseti Pakistans hefur hafnað gagnrýni, sem hann hefur hlotið, fyrir að hafa ekki orðið eftir  í Pakistan á þessum hamfaratímum. Hann er nú í opinberri heimsókn í  Bretlandi.  ...fyrir að hafa ekki  orðið eftir !  Hér hefði  átt að segja  að forsetinn hefði verið gagnrýndur fyrir  að fara frá Pakistan  eða  fyrir að fara úr landi á þessum hamfaratímum.   Þegar sagt er að einhver hafi orðið eftir, er um leið sagt að einhverjir aðrir hafi haldið  áfram: „Jón varð eftir á  Akureyri, en við  héldum áfram til Húsavíkur." Sá sem  svona skrifar hefur ákaflega litla máltilfinningu. Ríkisútvarpið okkar er svo metnaðarlaust gagnvart íslenskri tungu ,að það jaðrar við að skemmdarverk  séu  unnin þar oft á dag. Hvern einasta dag. Svo var ráðinn nýr málfarsráðunautur til að blessa þetta. Ja, hérna.- Auðvitað vinna margir  góðir íslenskumenn  hjá  Ríkisútvarpinu. Bögubósarnir eru bara of margir og skyggja á hina.

Eyjubloggarinn Friðrik Friðriksson sendi Molum  eftirfarandi:  Sæll Eiður og takk fyrir pistlana.  Vek athygli þína á meistarasmíð í orðaböggli í Mogga í dag á bls. 37 um æfi Arnolds Schwarzenegger.  Það er fyrirsögnin sem er svo stórbrotin að Magnús Óskarsson hefði líklega sett hann á forsíðu hjá sér...„Arnold S braust úr auðmjúklegum grunni með,járnviljamarkmiðasetningu“  Það verður varla skrautlegra.. kv. Friðrik Friðriksson (Eyjubloggari) Rétt er það Friðrik, að verra getur þetta varla orðið.

Úr mbl. is (06.08.2010): Í þessu tilfelli virðist sem bíllinn hafi þotið upp og skíðað á vatnsaganum á veginum og farið út af þar sem hann valt og endaði á toppnum.  Vægt  til  orða tekið , er þetta einkennilega orðað. Betra hefði verið að segja: Svo virðist sem bíllinn hafi flotið stjórnlaust á  vatnshimnu á  veginum, runnið útaf , oltið og endað á toppnum.

Aðstandendur  hátíðarinnar voru sáttir með daginn, var sagt í fréttum Ríkissjónvarps (07.08.2010). Á íslensku segjumst við vera sátt við eitthvað , ekki með eitthvað. Sjálfsagt rennur þetta þó greiðlega í gegnum umburðarlyndissíu málfarsráðunautar Ríkisútvarpsins. Hún hefur svo víða möskva.

 

Athugasemdir

[Sigurður Hreiðar, 9.8.2010 kl. 11:20]

Sæll Eiður -- og þakka þér fyrir hvað þú ert iðinn við málfarskolann. Sæmundur Bjarnason segir í bloggi sínu að pistla af þessu tagi lesi aldrei þeir sem á því þurfi að halda en ég er ekki viss um að það sé rétt hjá honum. Og þú brýnir okkur hin sem gefum frá okkur gusur við og við (sem kannski enginn les sér að gagni en ég held nú samt að sumt af því nái alla leið).

Um þetta bílslys sem þú vitnar til hér að ofan hefur það stundum verið kallað „uppflot“ sem verður þegar bílar missa gripið við undirlag þakið bleytu og „skautun“ þegar þeir renna og snúast hömlulaust af því þeir ná ekki gripi. Sem venjulega er af því dekkin eru orðin léleg og með of grunnt munstur eða hreinlega af því of hratt er farið miðað við aðstæður. Sem er hinn eiginlegi hraðakstur, en það orð er mjög svo ranglega notað um akstur yfir hæsta lögleyfðum hraða sem oft á tíðum er fyllilega réttlætanlegur þar sem aðstæður eru réttar.

Og: ég hefði viljað enda leiðréttinguna á „endaði á hvolfi“ ekki á toppnum.

[Eiður Svanberg Guðnason, 9.8.2010 kl. 20:25]

  Sæll Sigurður,allt er þetta rétt hjá þér.  Enska orðið yfir þetta  fyrirbæri er held ég  waterplaning, bíllinn flýtur ofan á vatnshimnu milli  slitins hjólbarða og rennvots yfirborðs  vegarins.

  Es  Sá  í  dag samskonar Suzuki jeppling og túristarnir ætluðu á yfir  Krossá. Hann var enn minni en  myndin sýndi. Ótrúlegt.  Snargalið fólk.

[Sigurður Hreiðar, 10.8.2010 kl. 19:46]

Aquaplaning var mér kennt að nota. Túristum á smájeppum (man ekki eftir neinum beinlínis jepplingi fra Suzuki, í mesta lagi litlum fólksbílum með drif á öllum hjólum, jepparnir eru allir jeppar með millikassa en það skilur milli jeppa og jepplings, ekki stærðin) er vorkunn, þeir sjá hjólför liggja út í vatnsfall og hafa séð kvikmyndir af bílum böslast yfir svona náttúrufyrirbæri en þekkingin nær ekki lengra. M.a. af því bílaleigurnar gera held ég lítið til þess að fræða leigutakana. Innfæddir eru líka sumir þannig að þeir halda að sé bíllinn skráður aldrifsbíll sé hægt að bjóða honum hvað sem er.-- Ég hef ekki séð mynd af þessum túristajeppa. Veistu um slíka?

[Þorsteinn Briem, 10.8.2010 kl. 21:38]

Ríkissjónvarpið - Frönskum ferðamönnum bjargað úr Krossá

[Sigurður Hreiðar, 10.8.2010 kl. 22:19]

Þakka þér fyrir þetta skot, Steini Briem. Mér hefnist fyrir að horfa ekki á sjónvarpið nema takmarkað. Þetta er Suzuki Jimny, mjög góður jeppi svo langt sem hann nær, mjög svipaður í málunum (lengd og breidd) og upprunalegi jeppinni, Willys MB, sem allir jeppar heita í raun eftir og engum hefur dottið í hug að kalla jeppling. Langt er hann langt frá að vera einhver jepplingur. Það er aftur á móti minn einkabíll, Nissan X-trail, sem er töluvert stærri en Suzuki Jimny.

[Þorsteinn Briem, 10.8.2010 kl. 22:25]

Ekkert að þakka, Sigurður minn.

Þú ert sérfræðingurinn í þessum efnum.

[Eiður Svanberg Guðnason, 10.8.2010 kl. 22:41]

  Myndin var á forsíðu Fréttablaðsins í gær, 9. ágúst.

[Eiður Svanberg Guðnason, 10.8.2010 kl. 22:43]

Aquaplaning  er réttara. Satt er það.

[Þorsteinn Briem, 11.8.2010 kl. 00:00]

Myndir af björguninni á forsíðu Fréttablaðsins

[Sigurður Hreiðar, 11.8.2010 kl. 13:11]

Takk fyrir samskiptin, Steini og Eiður. -- Fréttablaðið er ekki lengur borið út í minni sveit.

[Þorsteinn Briem, 11.8.2010 kl. 16:41]

Fyrir margt löngu vaktaði ég Álafossverksmiðjurnar á nóttunum og um helgar.

Vegna minni raflýsingar í Mosó voru stjörnurnar þar mun sýnilegri en í Reykjavíkinni.

Álafossföt bezt