Molar um málfar og miðla 368

   Af hverju ertu með  verðlaunapening,   spurði sjónvarpsfréttamaður sjö ára stúlku  Stúlkan svaraði að bragði: Af því að ég vann !

Hraðakstrar í Húnaþingi, sagði í fyrirsögn á  mbl.is (03.08.2010). Orðið akstur er ekki til í fleirtölu. Svo einfalt er nú það.

  Aðstoðarmaður  menntamálaráðherra  varð frægur að endemum á  dögunum fyrir orðbragð í  tölvupósti. Í tíu fréttum  Ríkissjónvarps (03.08.2010) var haft  orðrétt  eftir  aðstoðarmanni félagsmálaráðherra:.. svo sjoppan yrði opin , þegar fólki mætti... Aðstoðarmaðurinn  kallaði  skrifstofu umboðsmanns skuldara  sjoppu !  Líklega ættu ráðherrar að vanda  sig meira, þegar þeir velja sér  aðstoðarmenn.

Gæslan fann villta konu, sagði í fyrirsögn á mbl.is (01.08.2010). Sá sem  benti  Molaskrifara á þessa fyrirsögn fullyrðir að konan hafi verið frumbyggi ! það var greinilegt að  viðvaningar höfðu  tekið völdin á mbl. is um helgina. Eftirfarandi  dæmi bera vott um það: Fallið var um einn meter. Drengurinn lenti illa og missti við það andann um stund. ....Stór rúta missti smurolíuna niður á bílastæði og í götuna við Uppsalaveg á Húsavík í dag.

Eigið þið von á mikið af  fólki í dag ?  Þannig  spurði  fréttamaður Stöðvar tvö  ( 31.07.2010)   Hann  átti við hvort von væri á mörgu fólki  til Eyja í dag. Í sama fréttatíma var sagt  að þoka hefði verið að valda truflunum á  flugi. Betra hefði verið að segja  að þoka hefði valdið truflunum  á flugi.  Frakkinn sigraði hundrað metrana, sagði íþróttafréttamaður  Stöðvar tvö (31.07.2010)   og  sagði svo að  tiltekinn garpur hefði stolið  sigrinum og annar nappað  sigrinum.  Vonandi hefur lögreglan haft hendur í hári þjófanna.Sami fréttamaður sagði daginn eftir  að  ágætur íþróttamaður hefði  sigrað kúluvarpið.  Óboðlegt málfar.

  Það  ar  ágætlega að orði komist í  fréttum Ríkissjónvarpsins , þegar sagt var (31.07.2010): Talið er að  ein milljón manna hafi orðið fyrir skakkaföllum vegna flóðanna.

 Ríkisútvarpið hneykslaðist á því (01.08.2010), að bjór hefði verið auglýstur á ljósastaurum í Borgarnesi. Ríkissjónvarpið  sýnir þjóðinni daglega bjórauglýsingar og  opinberar þannig virðingarleysi  þessarar þjóðarstofnunar fyrir   landslögum og  reglum. Ekki hefur verið fjallað um bjórauglýsingar Ríkisútvarpsins í Ríkisútvarpinu.

Athugasemdir

[Hallgrímur Indriðason (IP-tala skráð) 4.8.2010 kl. 09:49]

Sæll og takk fyrir oft góðar ábendingar.

Langar til að leiðrétta þig aðeins vegna þess sem þú sagðir um bjórauglýsingar RÚV. Um þetta hefur verið fjallað í fréttum Ríkisútvarpsins, þó að sú umfjöllun hafi verið um afmarkað dæmi. Sjá hér: http://www.ruv.is/frett/hord-vidbrogd-vid-bjorauglysingu. Hvort sú umfjöllun mætti vera meiri er svo annað mál.

Kv.

Hallgrímur.

[Sverrir Einarsson, 4.8.2010 kl. 10:33]

Ég vil fá að vita í hvaða sæti hundrað metrarnir höfnuðu og hvers lenskir þeir eru, en það var frakki sem vann þá!. Sama á við um kúluvarpið.

Nei nei Eiður takk fyrir þessa pistla ég les þá sjaldnar núna en áður fyrr en alltaf jafn gaman að þessu.

[Eiður Svanberg Guðnason, 4.8.2010 kl. 11:15]

 Það er rétt, Hallgrímur, að var stuttlega fjallað  um þetta vegna  harkalegra viðbragða  Samtaka foreldra  gegn  áfengisauglýsingum.   Þetta var ekki að frumkvæði  fréttastofunnar. Viðbrögð yfirmanna  Ríkisútvarpsins við þessari gagnrýni  voru með ólíkindum.

[Guðmundur St Ragnarsson, 4.8.2010 kl. 20:40]

Takk fyrir vakandi auga með íslensku málfari og áfengisauglýsingum Eiður. Maður lærir alltaf eitthvað nýtt af þér. Mætti samt ekki gera (staðbundna) málfræðilega undantekingu á orðinu "akstrar"? Svona til að auðvelda Blönduóslöggunni eftirlitsstörf? Það er svo erfitt að handtaka menn stundum í eintölu.

[Eiður Svanberg Guðnason, 4.8.2010 kl. 21:36]

 Sæll Guðmundur,

Þakka þér vinsamleg orð í minn garð. Blönduóslöggan ger létt með  að handtaka  fjöldann allan af ökumönnum fyrir hraðakstur, -  í eintölu !

[Eiður Svanberg Guðnason, 5.8.2010 kl. 00:24]

.... fer létt með... , átti þetta að vera.