Molar um málfar og miðla 367

   Visir.is  sagði frá  því er hvítabjörn  var drepinn á Svalbarða (30.07.2010): Hvítabirnir eru friðaðir á Svalbarða. Sýslumaðurinn þar sagði hinsvegar augljóst að dýrið hafi verið drepið í sjálfsvörn og eftirmáli því enginn.   Eftirmáli þýðir  niðurlagsorð , texti aftan  við meginmál. Eftirmál eru hinsvegar eftirköst, afleiðing, rekistefna vegna tiltekins  atferlis. Hér hefði því átt að standa: Eftirmál urðu því engin.  Það er ótrúlega  algengt að  ruglað sé  saman  eftirmála og eftirmálum. Í stað hafi hefði átt að segja hefði.

  Fínn þáttur Lönu Kolbrúnar Eddudóttur um Bítlalög með íslenskum textum, eða Bítlalög á íslensku eins og hún orðaði það. Ríkisútvarpið,  rás eitt (30.07.2010).

 Ég er á móti ESB af því ég vil ekki Breta inn í landhelgina aftur, sagði Guðni vinur minn Ágústsson í Kastljósi (30.07.2010). Það er ekki á  góðu von, þegar umræðan um ESB er á þessum nótum.  Guðni veit vel ,að Bretar eigan engan úthafsflota lengur, -   þeir eiga ekki skip til að senda  til Íslands, þótt slíkt væri í boði. Það verður auðvitað aldrei í boði. Þetta er dapurlegt dæmi um  það hvernig andstæðingar ESB aðildar  tala og hræða fólk með  hálfgerðum hótunum.

 Hvenær skyldi Ríkissjónvarpið hætta að bjóða áhorfendum upp á  vonlausar amerískar dellumyndir  á föstudagskvöldum ? 

  Það er mikill misskilningur hjá  stjórnendum Fréttastofu Ríkisútvarpsins, að halda að allir fréttamenn geti verið fréttaþulir.  Að þessu hefur verið vikið hér áður.  Þeir sem lesa  fréttir verða að vera áheyrilegir. Á það  skorti nokkuð  í morgunfréttum (02.08.2010).

  Dagskrárstjóri  Ríkisútvarpsins segir í viðtali við Morgunblaðiðað þar séu   (30.07.2010) ýmsar leiðir til niðurskurðar á teikniborðinu.  Er þá verið að teikna  niðurskurðarleiðir ?

Á heimasíðu Ríkisútvarpsins er listi yfir starfsmenn stofnunarinnar.  Þar telst Molaskrifara til að séu hátt í 340 nöfn. Væri ekki hægt að komast af með aðeins færra fólk?  Þetta er eiginlega með ólíkindum.

    Hér var á dögunum vikið að  skrumþætti  Jónu Ásgerðar Flosadóttur, Á Ferð og flugi með Iceland Express, í  Útvarpi Sögu. Svo merkilega vill til, að  Matthías Imsland , forstjóri ferðaskrifstofunnar Iceland Express, (Iceland Express er  ekki flugfélag) er  stjórnarformaður Fjölskylduhjálpar Íslands, einkafyrirtækis Jónu Ásgerðar Flosadóttur. Svona er Ísland í dag.

 

Athugasemdir

[Heimir Tómasson, 2.8.2010 kl. 15:52]

Jújú, svona er Ísland í dag. Og alltaf verða menn jafn undrandi þegar svona tengsli koma upp á yfirborðið.

[Pétur Jósefsson (IP-tala skráð) 2.8.2010 kl. 18:07]

Sæll vertu og takk fyrir þætti  þína sem eru ákaflega gott innlegg í baráttuna fyrir betri og réttari íslensku. 

Nú er að hefjast í útvarpinu upplestur á skáldsögunni  THE GREAT GATSBY - en það sem ég er ekki sáttur við er íslenska nafnið á skáldsögunni -  GATSBY HINN MIKLI  -  

Að mínu viti heitir sagan á íslensku  HINN  STÓRFENGLEGI  (eða magnaði)  GATSBY.  Þegar GREAT fer á eftir nafni  eins og  t.d. PETER THE GREAT  -  er auðvitað rétt að hafa það á íslensku  Pétur mikli  -  en þegar GREAT fer á undan þá er merkingin ekki alveg sú sama  og þá er ég þeirrar skoðunar að "hinn mikli" á eftir sé ekki  rétt.

Kveðja,

Pétur J.