Molar um málfar og miðla 360

  Í fréttum Stöðvar tvö  var sagt frá  einkar heimskulegum athugasemdum á  vef Sky-sjónvarpsins  við  frétt af nýfundinni ofurbjartri stjörnu.  Um þann sem  gerði athugasemdina  sagði reyndasti  frétthaukur Stöðvar tvö: Ekki kannski skarpasti hnífurinn í skúffunni. Ekki er hægt að hrósa þessu orðalagi. Það er of enskulegt til að geta kallast  vandað íslenskt mál.  Það var hinsvegar  hnyttið  ( Molaskrifara fannst það að minnsta kosti) þegar þessi  sami  fréttahaukur  sagði fréttir að því að Shackleton landkönnuður og  menn hans  hefðu verið orðnir  vistalitlir á leið að  suðurpólnum, en áttu þó  fjóra kassa að  viskíi ! Var á honum að heyra að  menn með slíkar birgðir  væru hreint ekki vistalitlir.  Svolítið spaug er gott með með öðru, - meira að segja í fréttum.

   Í fréttum Ríkissjónvarpsins sagði  fréttaþulur (23.07.2010): ... og furðar sig á hve illa hefur gengið fyrir  fyrirtækið að kaupa kvóta hér á landi.  Að tala um að  eitthvað gangi illa  fyrir einhvern er  barnamál.  Rétt hefði verið að segja: ... og furðar sig á því hve illa fyrirtækinu hefur gengið að kaupa (eða fá keyptan) kvóta  hér á landi.

 Umsjónarmaður  morgunútvarps Ríkisrásar tvö  sletti á okkur  ensku í viðtali um  eplatré (22.07.2010). Hann talaði um sexual partners.  Slæmt er ,að  stjórnendur í Efstaleiti skuli ekki hafa metnað til  málvöndunar. Stundum sletta þeir mestri ensku sem minnst kunna fyrir  sér  í því ágæta tungumáli.

 Í tíu fréttum Ríkissjónvarpsins (21.07.2010) las fréttaþulur: Bróðurpartur úthafsrækjukvóta þessa fiskveiðiárs var úthlutað til fimm útgerða...  Hér  hefði  þulur átt að segja:  Bróðurparti  úthafsrækjukvóta  þessa fiskveiðiárs var úthlutað til fimm útgerðarfyrirtækja ... Einhverju er úthlutað, Eitthvað er ekki úthlutað. En  í ljósi umburðarlyndis  reiðareksstefnunnar í Efstaleiti  þykir þetta líklega gott og  gilt. Molaskrifari er á öðru máli.

Sjónvarpsauglýsingar  Símans  í enskættuðu auglýsingaherferðinni Ring fara  hríðversnandi. Það nýjasta er að sýna  pilt  sem klæðist skátabúningi og er látinn koma fram  eins og hann sé þroskaheftur eða greindarskertur. Hvaða  tilgangi á  svona  rugl að  þjóna?  Síminn misbýður okkur áhorfendum,  ekki síst þeim sem hafa starfað innan skátahreyfingarinnar. Af hverju  gerir Síminn lítið úr Skátahreyfingunni?

Í hádegisfréttum Ríkisútvarpsins (21.07.2010) var sagt: ... skipaði bráðabirgðastjórn yfir félaginu. Ekki  finnst Molaskrifara þetta eðlilegt orðalag. Betra hefði  verið að tala um að  skipa félaginu bráðabirgðastjórn. Þessi  ambaga hefur svo sem heyrst áður í Ríkisútvarpinu.

Athugasemdir

[Vendetta, 25.7.2010 kl. 13:43]

Er þá þitt álit að betra orðalag væri: "Kannski ekki beittasti hnífurinn í skúffunni"? Annars fannst mér verst við þessa frétt, að Óli Tynes skuli hafa endurtekið þennan eldgamla brandara um sólina og tunglið.

Fyndið að þú skulir nefna, að fréttamenn RÚV væru lélegir í ensku, því að starfsmenn Stöðvar 2 eru enn verri, og ekki sízt þeir sem þýða sjónvarpsefni fyrir þá sjónvarpsstöð. Ég hef persónulega safnað saman litlum hluta af röngum þýðingum úr ensku undanfarin ár og fyllir það margar blaðsíður. Það virðist eins og þýðendurnir noti stundum þýðingarforrit og leiðrétta svo ekki eftir á, eða þá að þeir hvorki lesi handritið né horfi á þáttinn/myndina, en þýði einungis eftir eyranu. Árangurinn verður svo endemis della. Það er minna um þetta á RÚV, en samt kemur það fyrir. 

Annars hefurðu rétt fyrir þér í því að íslenzkar sjónvarpsauglýsingar eru ömurlegar. Og ekki bara málfarslega. Að lokum vil ég nefna, að ég vandaði mig við að skrifa þessa athugasemd, svo að þú tækir mig ekki í gegn líka.

[Sigurður Hreiðar, 25.7.2010 kl. 22:12]

Gaman að sjá að fleiri en ég láta auglýsingar Símans fara í taugarnar á sér. En sumpart eru þær í stíl við það sem skemmtikröftum nútímans finnst fyndið, að raða saman hálfvitum og fábjánaskap. Minnir á auglýsingar Happdrættis háskólans eins og þær hafa lengstum verið, eins og viðskiptavinirnir -- eða markhópurinn eins og tíðkast að kalla það núna -- sé hópur vanvita.

[Vendetta, 25.7.2010 kl. 22:53]

"... eins og viðskiptavinirnir -- eða markhópurinn eins og tíðkast að kalla það núna -- sé hópur vanvita."

Þótt auglýsingaranar á Sky fari í taugarnar á manni stundum og þær séu alltaf fegraðar, þá er amk. eitt sem ekki er í þeim: fávitar. Og það er alltaf ljóst hvað verið er að auglýsa. Ég álít, að íslenzkar auglýsingastofur séu bara ekki skilja, að auglýsingar verða að vekja traust, ef þær eiga að virka.

[Haraldur G Magnússon, 26.7.2010 kl. 10:54]

Mér finnst þessar auglýsingar bera með sér dálæti á einelti