Molar um málfar og miðla 359

 

 Á vef Ríkisútvarpsins (22.07.2010) stóð: Á stjórnarheimilinu láta menn reka í reiðanum. Þetta orðalag kannast Molaskrifari  ekki  við. Sá sem  svona tekur til orða  skilur sennilega ekki orðið  reiði en það er siglutré með seglabúnaði ( Íslensk orðabók). Á íslensku er talað um að láta  reka á  reiðanum, að láta fara sem vill. Vonandi  kristallast hér ekki reiðareksstefna Ríkisútvarpsins hvað málfar varðar. Vonandi  nær umburðalyndi málfarsráðunautar ekki  yfir  svona  fráleit mistök,  eða hvað ?

Í fréttum fjölmiðla (21.07.2010) neituðu  talsmenn slökkviliðsmanna,sem boðað hafa verkfall á  föstudag, ítrekað að  segja  hlustendum hverjar kröfur  slökkviliðsmanna væru. Þannig kjarabarátta er ekki trúverðug. Ef launakröfurnar eru sanngjarnar hversvegna fáum við ekki að  vita hverjar þær  eru?

 Eftirfarandi athugasemd barst  frá  Molalesanda: „ Ummæli dagskrárkonu RÍKISútvarpsins í gærmorgun eftir viðtal við Einar Sv. veðurfræðing: „Veðurblíðan mun haldast til fimmtudags en þá mun ÞAÐ snúast við" . Ég skildi þetta hins vegar svo að á miðvikudag myndi vindur snúast í vestlægar áttir og þá hlýnaði á norður og austurlandi. Er RUV bara svæðisútvarp fyrir höfuðborgarsvæðið eða sér dagskrárgerðarfólk útvarpsins bara út fyrir gluggann í Efstaleiti? Hrynjandin hefur stundum pirrað mig  í málfari auglýsingalesara á Bylgjunni og einnig í svæðisútvarpi Akureyrar (RUV), við erum kannski að eignast nýja mállýsku eftir að hinar gömlu hafa þynnst út."

  Úr dv.is (20.07.2010): Lögreglumenn á eftirlitsferð um Eyrarbakka í gærkvöldi fannst hann finna kannabislykt og að hana mætti rekja að tilteknu húsi.   Það var og.  Lögreglumenn fannst hann finna !

  Í kvöldfréttatíma Ríkissjónvarpsins (19.07.2010) var okkur  sagt að Landeyjahöfn yrði vígð daginn eftir. Rétt reyndist það, að  höfnin var vígð, þótt  þessi  væri aðeins  stuttlega  getið í framhjáhlaupi að prestur hefðu komið við sögu. Öðru vísi verða mannvirki nefnilega ekki vígð. Það var  vel til fundið að blessa þetta mannvirki og biðja  þeim blessunar ,sem um höfnina  eiga eftir að  fara.   Það var hinsvegar ranglega sagt sumstaðar ,að  Kristján Möller samgönguráðherra hefði vígt höfnina. Hann vígir ekki eitt né neitt, enda  ekki vígður maður.

    Alltaf öðru hverju  heyrist í fréttum talað um  að taka þátt á  íþróttamóti. (Stöð tvö  20.07.2010). Hvimleitt. Við tölum um að taka þátt í einhverju, ekki á einhverju.  Í  Ríkissjónvarpinu var sagt um íþróttakonu, að hún kæmi frá Kópavogi. Betur hefði farið á því að segja að hún væri úr Kópavogi. Nema að hún hafi verið að koma úr Kópavogi.

Athugasemdir

[Bjarni Kjartansson, 23.7.2010 kl. 20:41]

Hér verð ég að leiðrétta þig minn kæri.

Menn létu reka á reiðanum, þegar ekki var tjaldað nokkru til, hvorki klýf eða fokku.

Afi minn gamli var skipstjóri, togaraskipstjóri og síðar seglasaumari, eftir að hann fór í land í nokkurri elli að mati samferðamanna en ekki hans auðvitað, þar sem honum fannst hann ekkert gamall, fyrr en um nírætt.

 Talað var að letingjar,, bleyður og ómenni létu reka á reiðanum berum.  Aðrir settu upp voðir og reyndu að sigla þann byr, sem gafst.  Þá réð á, að kunna að haga seglum þannig að fley fengi sér eitthvað til framdráttar.  Snarpur beitivindur var hvað erfiðastur og einnig slögun á trýni. 

Komin tími til að hætta, mann langar svo til, að leggja í sarpinn fleiri orð, sem urðu til við baráttu manna við Höfuðskepnurnar, það er me´r fró í þeim aðstæðum, sem ég sé stýrimenn þeirrar skútu sem nefnd er við þjóðina.  Þar er allt í hafaríi og stjórnendur þar horfa í gaupnir sér vegna ofurhræðslu og vanmáttar.

Megi klár siglari himintungla koma þjóð minni til bjargar úr greipum þeirra Gýgja sem nú hafa tögl og hagldir um afkomu barna minna og barnabarna.

Miðbæjaríhaldið

Að Vestan og þjóðernissinnaður mjög.

[Eiður Svanberg Guðnason, 23.7.2010 kl. 20:50]

  Sæll Bjarni, -  ég vitnaði til merkingar orðsins  reiði eins og hún er skilgreind í orðabókinni.  Allt er rétt sem þú  segir, en að láta  reka á reiðanum , þýðir í óeiginlegri merkingu og þeirri algengustu, líklega,að trassa, að láta fara sem fara vill, að láta e-ð darka. Svo vitnað sé aftur í orðabókina þá  þýðir að láta reka á reiðanum líka að láta skip hrekjast undan veðri, og ég bæti við, án þess að hafa nokkur segl uppi.

[Bjarni Kjartansson, 23.7.2010 kl. 22:02]

Mér er sjómennskan afar kær og einnig forn gildi um dugnað og þor.  Því setti ég þetta inn hjá þér.

Orðatiltæki sem eru ,,ættuð " úr störfum genginna kynslóða, verða að njóta fyllstu virðingar og menn sem þekkja til upprunans, eiga, raunar þeim BER að láta vita ef rangt er með farið.  Menning á borð við okkar, er ekki bara okkar einkamál, heldur heimsgersemi.  Þetta veit ég af kynnum mínum við menntamenn frá mörgum löndum og af afar ólíkum uppruna.  Nægir þar að nefna Kína og Sviss, sem ,,andstæður". 

Okkar forna menning sem hefur varðveist hvað best í hugarheim, atferli, umgengni og lífskoðunum sannra Vestfirðinga, er einstök en sameinar afar margt, bæði frá austurlöndum og Egyptalandi, sem svo sameinast í ,,heiðni" .

Meira um það síðar en mikið er ég þakklátur þér, að hafa nennu, að standa vörð um okkar tungu, það skýra vopn.

Miðbæjaríhaldið

Þjóðernissinnað að vanda

[Eiður Svanberg Guðnason, 23.7.2010 kl. 23:24]

 Endurles ævisögu  Guðmundar G. Hagalíns. Þar er sko  sagt frá sönnum Vestfirðingum ! Guðmundur er stórlega vanmetinn höfundur.