Molar um málfar og miðla 350

   Ekki er að sjá að nein önnur norræn sjónvarpsstöð hafi notað  tvær og hálfa klukkustund á  laugardagskvöldi, á besta tíma, undir  boltaleik   og fótboltafjas eins og  sjónvarp ríkisins á Íslandi gerði (10.07.2010). Samt gátu snillingarnir ekki haldið sig innan tímaramma dagskrár.  Á hinum Norðurlöndunum hafa sjónvarpsstöðvarnar víðari sjóndeildarhring. Þar hafa menn heldur ekki auglýsingadeildir sem  stjórna  dagskránni og íþróttadeildirnar eru greinilega valdaminni en á Íslandi. Sem betur fer  sér  nú fyrir  endann á þessari linnulausu  og kostnaðarsömu misnotkun á  Ríkissjónvarpinu.  En í dag fær íslenska  þjóðin þriggja klukkustunda  fótboltaskammt,ef auglýstri dagskrá verður  fylgt og leikurinn ekki framlengdur. Það er margfalt Norðurlandamet. Að sjálfsögðu  á að sýna leikinn, - bara   tuðinu. Hvað skyldi tuðið annars kosta?  Hef grun um að það sé ekki ódýrt.

Ríkissjónvarpið hefði getað sparað umtalsvert fé, ef það hefði   farið svipaða leið og aðrar norrænar stöðvar.  Sparnaðinn hefði mátt nota í innlenda  dagskrárgerð og til að kaupa vandaðra erlent efni. Það hefði mátt  spara með því að sýna  langtum færri leiki framan af, meðan þetta var ekkert spennandi, einn á dag hefði verið meira en nóg og með því að sleppa fjasi vitringanna  að mestu.  

Á mbl. is (09.07.2010) segir í fyrirsögn:  Nær allar auglýsingar í Fréttablaðinu. Svo  segir í fréttinni: Á fyrri hluta þessa árs keyptu fyrirtæki í eigu Haga ígildi 396 heilsíðna af auglýsingum í dagblöðum. Af þeim voru 383, eða 97%, í Fréttablaðinu, en 13, eða 3%, í Morgunblaðinu. 

    Á fyrri hluta síðustu  aldar, þegar  Finnbogi Rútur Valdimarsson var ritstjóri Alþýðublaðsins  voru  Morgunblaðið og Alþýðublaðið   álíka stór blöð. Þá var Alþýðublaðið brautryðjandi í nútíma blaðamennsku.  Svo keyptu kaupmenn Morgunblaðið og beindu nær öllum sínum  auglýsingum þangað.  Þá  byrjaði upplag Alþýðublaðsins  að minnka  en Mogga fór að vaxa fiskur um hrygg.

  Að sögn Hjördísar Guðmundsdóttur, upplýsingafulltrúa Keflavíkurflugvallar, kemur atvik sem þetta reglulega upp.(visir.is 08.07.2010). Ekki verður sagt að snilldarblær sé á  þessari  setningu úr frétt  þeirra Vísismanna.

   Úr mbl.is (08.07.2010): Tilboðið var skriflegt og hljóðaði upp á nákvæmlega 8.819 blaðsíður. Líklega er hægt  að segja  að tilboð  hljóði upp á tiltekna upphæð, en tilboð getur aldrei hljóðað upp á  blaðsíður  eins og Netmoggi segir. Þá ætti að vera óþarfi  að taka  fram að tilboð í smíði  179 flugvéla hafi verið skriflegt !  En það er auðvitað gott  að gera ráð fyrir því að hugsun lesenda sé ekki alltof skýr.

  Leiðari  Morgunblaðsins (10.07.2010) Sko dómstólana, er tær snilld, svo notuð  séu  fleyg orð. Það er sjaldgæft að leiðarar séu  svona skemmtilegir.

Í DV (09.07.2010) segir   enn einu sinni frá íslenskri fyrirsætu,sem býr í Búlgaríu, en er að flytjast til Þýskalands. Mér líst ágætlega á þetta allt saman enda er Munich flott borg ......., segir fyrirsætan.  Molaskrifari vonar að hún finni borg  með þessu nafni í Þýskalandi. 

Í frétt á  dv.is  segir (09.07.2010): Mikinn gufustrók stendur upp úr eldstöðinni í Eyjafjallajökli. Hér ætti annað hvort að standa: Mikinn gufustrók leggur nú upp úr eldstöðinni.... eða: Mikill gufustrókur stendur nú upp úr eldstöðinni.... 

 Þegar málfarsráðunautur Ríkisútvarpsins var að setja  ofan í við Molaskrifara í grein í Fréttablaðinu á  dögunum, sagði hann meðal annars um þessi skrif: ..og þar eru sömu atriðin nefnd aftur og aftur. Þetta er rétt athugað. Glöggur maður, málfarsráðunauturinn.   Sömu atriðin eru hér nefnd  aftur og aftur í þeirri traustu trú að dropinn holi steininn.

Athugasemdir

[Grefill (IP-tala skráð) 11.7.2010 kl. 10:15]

Hvernig heldur þú að úrslitaleikurinn milli Hollendinga og Spánverja fari í kvöld, Eiður?

[Eiður Svanberg Guðnason, 11.7.2010 kl. 14:13]

 Hvernig ég  greflinum á ég að vita  það ?  Hallast þó fremur að Spánverjum. Hef  annars minna en ekkert vit á þessu.

[Eiður Svanberg Guðnason, 11.7.2010 kl. 14:15]

Þetta átti auðvitað að evra: Hvernig í greflinum á ég að vita það.

[Eiður Svanberg Guðnason, 11.7.2010 kl. 14:16]

Gengur illa að koma þessu réttufrá mér  ....   vera ,  ekki  evra!!!

[Grefill (IP-tala skráð) 11.7.2010 kl. 14:55]

Þetta er ESB-heilkennið

[Þórir Kjartansson, 11.7.2010 kl. 15:26]

Tek undir með þér Eiður hvað varðar þessar endalausu og innihaldslausu boltaumfjallanir sem er verið að nauðga upp á þjóðina. Eins og þú hef ég velt fyrir mér hvað  RUV borgar þessum  ,,sérfræðingum"  fyrir að sitja þarna og rausa um þetta aftur á bak og áfram.  Við eigum heimtingu á að vita það.

[Grefill (IP-tala skráð) 11.7.2010 kl. 15:52]

Ég held þeir séu með 1890 kr. á tímann samkvæmt samning SSS og og ÍBB og litlu eitt hærra kaup um helgar.

[Eiður Svanberg Guðnason, 11.7.2010 kl. 23:41]

 Mér þætti eðlilegt að þeir fengju 189 krónur á tímann og 198 um helgar. Þeir skemmta sér svo vel, að eiginlega ættu þeir að borga en ekki fá borgað !

[Gunnar (IP-tala skráð) 12.7.2010 kl. 10:24]

Mér fannst grein „málfarsráðunautsins“ í Fréttablaðinu ekki til að hrópa húrra fyrir. Hann ruglar saman tvennu ólíku — trú og reglum. Ég held að við lentum í vanda ef fólk tæki upp „umferðartrú“ í stað þess að fara eftir umferðarreglum. Og ekki þykir mér ástæða til að bíða eftir að fólk skilji ekki fréttir eða pistla. Nei, það þarf að sporna við fótum mun fyrr, m.ö.o. núna!

En kostulegast fannst mér að sjá nafn hans í Fréttablaðinu. Ásgrímur Angantýsson var þar nefndur „Ásgrímur Angantýrsson“.

[Eiður Svanberg Guðnason, 12.7.2010 kl. 11:32]

 Það flokkast líklega undir umburðarlyndi að hafa þetta svona, Gunnar.

[Guðmundur Paul Jónsson (IP-tala skráð) 12.7.2010 kl. 15:37]

það er oft fyndið hvað fjölmiðlafólk tjáir sig vitlaust verra finnst mér ef fréttin skilar ekki réttum upplýsingum. Sem dæmi, er að einhver skuldi helmingi meir nú en áður. Það segir mér ekkert um stöðu viðkomandi. Einnig ef frétt er um að eitthvað kosti billjón, gæti verið bein þýðing úr amerísku (reyndar skil ég ekki heldur milljarð). Skemmtilegar villur er hins vegar, þegar blaðasalinn í Austurstræti, á árum áður stundi mæðulega: "aldrei kaupir enginn ekki neitt af mér". þakka þér frábæra pistla, verst að slíkir pistlar skuli ekki vera lengur í útvarpi, Guðni "til læks", hefði ekki átt að gefast upp, öllum getur orðið á.

[Grefill (IP-tala skráð) 13.7.2010 kl. 04:25]

Sammála því að það vantar fasta málfarspistla í útvarpið ... sakna þátta eins og þeirra sem Guðni Kolbeins var með á sínum tíma og kenndu manni margt.

Reyndar hef ég heyrt málfarspistla eftir hádegi á sunnudögum á Rás 1 ... en það eru bara allt of fáir að hlusta er ég hræddur um.

Af hverju ekki að vera með 5 til 10 mín. daglegt innskot í morgunútvarpinu á Rás 2 og hnykkja á einhverju málfræðilegu sem er fróðlegt og upplýsandi? Ég hafði mjög gaman af slíku sem barn og unglingur og tel mig betri íslenskumann fyrir vikið.