Molar um málfar og miðla 342

   Fréttir í Útvarpi  Sögu  fóru hnökralaust af stað (01.07.2010), en þar er  reyndur fréttamaður Haukur Hólm við stjórnvölinn. Einhverjum kann ef til vill að  finnast sú orðanotkun orka tvímælis  að kalla fólk á þrítugsaldri ungmenni eins og gert var í fyrsta fréttatímanum. Það  orð  finnst Molaskrifara  betur eiga  við um fólk undir  tvítugsaldri. Verið   var að  segja  frá ungum Íslendingum  sem í fylleríi ollu skemmdum  á bílum og bifhjólum á Ítalíu. Útvarpsstjóri Útvarps Sögu hélt upp á þennan áfanga í morgunþætti sinum.

Fjöldi listamanna koma fram,sagði  þrælvanur fréttamaður og  þulur í kvöldfréttum RÚv (30.06.2010). Þetta átti að sjálfsögðu að vera: Fjöldi listamanna kemur fram. Fjöldi er nefnilega  eintöluorð.

Æ algengara er að sjá og heyra  forsetningunum að og  af ruglað saman. Dæmi um þetta mátti sjá á visir.is (30.06.2010), en þar sagði: Lögreglan óskaði svo eftir vitnum af atburðinum í gær. Lögreglan óskaði sem sé eftir að hafa tal af vitnum  að  atburðinum, ekki af  atburðinum.  Maður verður  vitni að einhverju.  Sér eitthvað gerast  eða fylgist með einhverju gerast.

  Stundum á Molaskrifari erfitt með að átta sig á  rökrænu samhengi hlutanna. Í Garðabæ er Fréttablaðið borið heim til hans á hverjum morgni. Ókeypis. En ef hann ætlar að sækja  Fréttablaðið í verslun á Selfossi verður hann að borga fyrir það !

  Svo er hér að lokum örlítil leiðrétting á umfjöllun  DV um garðsláttuvélar (30.06.2010). Þar segir  Jóhann mælir með því, að fólk kaupi sláttuvélar með mótorum annað hvort  frá  Briggs  eða Stratton....   Briggs & Stratton er eitt og  sama  fyrirtækið.  Það  framleiðir  litla  bensínmótora, sem eru nánast  ódrepandi.

Athugasemdir

[Emil Ragnar Hjartarson (IP-tala skráð) 1.7.2010 kl. 13:02]

Stundum kemst ákveðið orðalag í tísku og apar þá hver eftir öðrum linnulítið.Það má ekki verða til þess að góðum og gildum orðum sé úthýst. Ég minni á að í málinu er til sögnin að fjölga. Nú er sagt að fjöldi ferðamanna hafi aukist og á þessu jórtrað

án afláts, að fjöldi hafi aukist. Fjöldi  umsókna hefur aukist,fjöldi styrkþega hefur aukist o.s.frv.Þessar setningar  allar heyrði ég eða sá í dag.Þetta skilst,satt er það.Hins vegar getur það varla kallast goðgá að segja svona til tilbreytingar að ferðamönnum, umsóknum eða styrkþegum hafi fjölgað. Svo er þetta endemis orðalag sem haft er t.d. þegar stórslys verða

"Óttast er að tala látinna eigi eftir að hækka" Þetta er óskapnaður. Af hverju er ekki sagt :Óttast er að fleiri hafi farist.

Tala látinna er eitt af þessu eftiröpunarorðafari sem é kýs að nefna sv 

[Ben.Ax. (Benedikt Jóhannes Axelsson), 1.7.2010 kl. 13:53]

Ég sá skemmtilegt nýyrði á bloggi ungrar konu áðan. ,,En svaka flott pía sem bjó að mestu erlendis og er gift einhverjum erlendum auðkylfing.''
Auðkylfingur er bæði gegnsætt og auðskilið og er gott til þess að vita að til skuli vera ungt fólk sem stundar nýyrðasmíð.

[Þorsteinn Briem, 1.7.2010 kl. 17:45]

Auðkylfingur þessi er trúlega kvæntur dömu frá Auðkúlu en þar bjó landnámsmaðurinn Eyvindur auðkúla.

[Jóhann Kristjánsson (IP-tala skráð) 2.7.2010 kl. 08:21]

Reyndar segir maður,  fréttir á Útvarpi Sögu en ekki fréttir í Útvarpi Sögu. Molaskrifari þarf að endurskoða stafsetningu sína ;)

[Eiður Svanberg Guðnason, 2.7.2010 kl. 10:51]

Jóhann þú hefur  líklega heyrt þetta á Ríkisútvarpinu, eða hvað ? Segðu mér hvað ég hef misritað, svo ég geti lagfært það.

[Egill Þór (IP-tala skráð) 2.7.2010 kl. 18:49]

... segðu mér, Eiður, og reyndar okkur öllum; hlustar þú á fréttir í Bylgjunni?

[Eiður Svanberg Guðnason, 2.7.2010 kl. 19:07]

Egill, ég hlusta bæði á fréttir á Bylgjunni og í  Ríkisútvarpinu og í Útvarpi sögu. Ég hlusta hinsvegar ekki á fréttir á  Ríkisútvarpinu eins og mér heyrist þú gera.