Molar um málfar og miðla 341

  Velunnari Mola sendi eftirfarandi:  Myndatexti á Pressunni eftir Mörtu Maríu Jónasdóttur: „Það er hrikalegt að sjá hármissirinn á Naomi Campbell.“  Ekki mikilli  ritleikni fyrir að fara á þeim  bænum og  raunar ekki heldur í þessu dæmi  af Pressunni (29.06.2010): Sérstakur saksóknari segir að þeir fyrstu sem embættið ákærði fyrir umboðssvik gefist nú tóm til þess að átta sig. Villan í þessari setningu  er flestum svo augljós að um það þarf ekki að hafa fleiri orð.

 Það varð Ríkissjónvarpinu  tilefni sérstakrar fréttar (29.06.2010) að kvöldið eftir  yrðu fréttir á réttum tíma.  Þetta var rétt  fréttamat. Engin önnur  ríkissjónvarpsstöð  misbýður  fólki með  jafnmiklum fótbolta og Ríkissjónvarp Íslendinga. Látum vera þótt sýndur  væri einn leikur á  dag meðan þessi keppni stendur yfir. En hið sjálfumglaða,endalausa og  innihaldslausa  blaður á undan og eftir öllum leikjum er  venjulegu fólki óskiljanlegt. Það er því miður ekki  hægt að segja upp áskrift að RÚV. Þetta er lögbundin nauðung  og það notfæra menn sér í Efstaleitinu. 

Úr myndatexta á forsíðu Morgunblaðsins (29.06.2010): Katlarnir hafa brætt gríðarlegt magn af ís,sem rennur nú í Skaftá og Eldvatn. Í sameiningu mynda árnar og hinn bráðni ís gríðarlegt hlaup...Nú  má vel vera að Molaskrifari sé  farinn að  ryðga í þeirri  jarðfræði, sem hann  lærði á  sínum tíma. Hann hefði þó haldið að katlarnir  bræddu ekki eitt eða neitt , heldur  safnaðist í þá vatn sem  jarðhiti  undir jöklinum  bræðir. Þá er sérkennilegt að tala um að ís  renni í  Skaftá og Eldvatn og að árnar og hinn bráðni ís myndi hlaup.  Kannski er þetta bara sérviska Molaskrifara?

Nú lifa lesendur Morgunblaðsins nýja  tíma.  Nú hirta ritstjórar blaðsins opinberlega og með myndbirtingum, þá  þingmenn sem ekki hafa skoðanir að  skapi  húsbænda í Hádegismóum. Það er líka nýlunda í íslenskri blaðamennsku að þegar  dylgjað er nafnlaust („þingmaður með víðtæka reynslu úr mörgum flokkum") er  birt mynd af þeim þingmanni,sem væntanlega er átt við og  nafn undir myndinni, svo ekkert fari nú milli mála. Um leið er  Morgunblaðið að hirta  allan þann fjölda bæði í forystusveit og grasrót  flokksins,sem hefur skoðanir í Evrópumálum,sem  ekki eiga upp á  pallborðið við austanvert Rauðavatn.

Athugasemdir

[Þorsteinn Briem, 30.6.2010 kl. 12:09]

Sorglegt er það fjölmiðlafár,
frúin Campbell missti sitt hár,
saksóknarinn sérstakur mjög,
á sumum engin opnanleg fög.

[Sigurður Hreiðar, 30.6.2010 kl. 14:59]

Ég er sammála þér um fótboltafárið/rausið, og mér finnst bráðni ísinn líka skrýtinn. -- En eru ekki aðalstöðvar Mogga meira svona norðan við Rauðavatn en austan? Eða norðvestan?

[Þorsteinn Briem, 30.6.2010 kl. 16:30]

Mogginn er fyrir norðan Rauðavatn
Og þar liggur nú hundurinn grafinn

[Sveinki (IP-tala skráð) 30.6.2010 kl. 16:47]

Er ekki komman algjörlega óþörf í eftirfarandi texta? "Katlarnir hafa brætt gríðarlegt magn af ís,sem rennur nú í Skaftá og Eldvatn"

Er hún ekki sömuleiðis óþörf hér og furðulega staðsett á ýmsum stöðum hjá þér? "Nú hirta ritstjórar blaðsins opinberlega og með myndbirtingum, þá þingmenn sem ekki hafa skoðanir að skapi húsbænda í Hádegismóum"

Jæja, hvað veit ég. Finnst bara kommunotkun í íslensku orðin hálfskrýtin og kenni amrískunni um.

[Sigurrafn (IP-tala skráð) 30.6.2010 kl. 17:42]

Óþarfi að hafa of miklar áhyggjur af Rauðavatnsdeildinni. Þar á bæ hefur sannast að öflugustu skjálftar hafa líðið að segja. Oft fletti ég blaðinu en forðast að rýna í flokkadrætti, uppmáluð svik við flokkinn og stefnur. Jafnvel ágætir vinir deyja án þess að maður verði þess var í dánartilkynningum eða eftirmælum blaðsins. Vel getur verið að vegna jarðskjálftasprungna við Rauðavatn renni lítið affall úr vatninu. Hvort hinn bráðni ís renni með og í jökulám finnst mér ekki athugavert, þetta leitar allt til sjávar í hið stóra haf.  Ákveðinn frumleiki er að nota orðið ketill í sambandi við jarðhita. Ketill getur verið jarðhitapottur eða eldhólf sem upp úr sýður, jafnvel með ketilsprengingu og eldgosi. Katlar eiga vel við tröllið Kötlu og fjallið.  

[Eiður Svanberg Guðnason, 30.6.2010 kl. 19:55]

 Eigum við ekki að segja   norðaustan  við Rauðavatn  Steini?

[Þorsteinn Briem, 30.6.2010 kl. 22:49]

Deiliskipulag fyrir Hádegismóa - Mogginn er í Hádegismóum númer 2, norðan við Rauðavatn, og reisa á Búddahof suðaustan við Moggann

Ekki veit ég hvort þar verður Búddalíkneski í líki Davíðs Oddssonar en ákveðið hefur verið að vangamynd af honum sem fyrrverandi seðlabankastjóra prýði "íslensku" evrumyntina.

"Páll Júlíusson, sem er talsmaður búddista í lóðamálinu, segir byggingu [Búdda]hofsins verða fjármagnaða af taílenska auðkýfingnum Dr. Prasert Prasathong Osoth, eiganda Bankok Airways, og hofið muni bera nafn taílensku prinsessunnar Galayani Vadahana."

Búddistar fá lóð undir hof í Hádegismóum – Verður nyrsta Búddahof í heimi

Búddahof reist við Rauðavatn

Mbl.is 14.8.2006: "... en það má segja að [nýja Morgunblaðs]húsið standi á eins konar tímamótum, líkt og blaðið, því önnur hlið hússins vísar að Reykjavík og þeim mikla byggðakjarna, og því sem var og er, á meðan hin hlið hússins vísar í átt til fjalla, til móts við hið óþekkta."

Skömmu síðar varð Morgunblaðið gjaldþrota.