Molar um málfar og miðla 334

  Nú býður  Ríkisrásin íslensku þjóðinni upp á  allt að 8- 10 klukkustundir á dag af  fótbolta og  froðusnakki um  fótbolta. Þjóðin er nauðbeygð til að borga  fyrir skylduáskrift að Ríkisrásinni. Þeir í Efstaleitinu gefa öllum sem ekki eru  forfallnir í fótboltasýki langt nef. Engin önnur Ríkisrás á Norðurlöndunum býður sínu fólki upp á svona lagað. Það þarf að taka allan  rekstur Ríkisrásanna í Efstaleiti til róttækrar  endurskoðunar.

 Svona var dagskrá  Fótboltasjónvarps  ríkisins,  frá klukkan 17 15 mánudaginn  21. júní 2010:

1715 HM Stofa. Froðusnakk um fótbolta.

18 00 Fréttir og veður

18 20 Fótboltaleikur

20 30 HM-kvöld. Meira froðusnakk um fótbolta.

21 10 Lífsháski. Amerísk  spennumyndaröð.

22 00 Fréttir og  Veður

22 20 Íslenski boltinn. Meiri  fótbolti.

23 05 HM- kvöld  endursýnt froðusnakk um  fótbolta.

23 30 Fótboltaleikur

01 20 Endursýndar kvöldfréttir.

Þá er þess  reyndar ógetið  að klukkan 13 30  hófst froðusnakk um fótbolta og  síðan  var sýndur  fótboltaleikur  fram undir klukkan 16 00 !!!

Þessi  dagskrá er reginhneyksli.  Molaskrifari tekur hiklaust undir með þeim,sem hafa lagt til að  Ríkissjónvarpið setji upp  íþróttarás með sérstöku afnotagjaldi  fyrir  forfallna. Svo  þarf að skipta um dagskrárstjórn í Efstaleitinu.

  Dv.is  segir í  fyrirsögn (21.06.2010):  Japanir  hafa borið fé í fulltrúa Alþjóðahvalveiðiráðsins.  Nú segir ef til vill einhver, að ekkert sé athugavert við þessa fyrirsögn. En af  fréttinni má ráða,  að Japanir hafi  verið að múta  fulltrúa  Alþjóðahvalveiðiráðsins.  Á íslensku er  talað um að bera fé á einhvern,  þegar rætt er um mútur,  en ekki að bera fé í einhvern. Íslensk stórfyrirtæki og bankar báru fé á  íslenska stjórnmálamenn í stórum stíl.

Athugasemdir

[Kennsla (IP-tala skráð) 22.6.2010 kl. 09:30]

Mér finnst eiginlega betri hugmynd að setja upp sérstaka rás fyrir þá sem kunna ekki að meta fótbolta og láta þá greiða sérstakt afnotagjald. Myndi koma mun betur út fyrir Rúv.

[Helga (IP-tala skráð) 22.6.2010 kl. 09:57]

Það er lítið r í ríkisrás.

[Kristín (IP-tala skráð) 22.6.2010 kl. 17:25]

Er svo hjartanlega sammála ykkur og meira til, mér finnst það ósvifni að vera látin borga afnotagjald fyrir tímabil þar sem ekki er opnað sjónvarp, og hér er bara hægt að ná ríkisrásinni. Hvað skyldu vera margir sem vildu vera með í því að neita að borga afnotagjald fyrir einn mánuð.

[Sigurrafn (IP-tala skráð) 22.6.2010 kl. 23:31]

Orð í tíma töluð. Sýnir hve illa er komið fyrir ríkisrekstri sem átti rétt á sér áður fyrr. Lítill söknuður er að sjónvarpi nú þegar dagur er lengstur.  Eina sem ég vildi borga fyrir úr dagskrá sjónvarps eru kvöldfréttir og umræðuþættir, hefði ég val. Rás 1 hefur styrk til að halda uppi menningardagskrá og gerir það með ágætum. Flestir sem eru orðnir læsir á ensku geta horft á sjónvarpsdagskrá frá gervihnöttum. Ríkið á ekki að halda uppi samkeppni við sjálfstæðan rekstur sem aðrir geta rekið með hagnaði og útsjónarsemi. Sama gildir og um fjölmiðlafyrirtæki sem komast undan með að borga lán og opinber gjöld.