Molar um málfar og miðla 320

  Í fróðlegu og fínu Sjómannadagsblaði Morgunblaðsins (05.06.2010) segir í auglýsingu: Starfsfólk Naust Marine  senda sínar bestu kveðjur  til  allra sjómanna.... Starfsmenn senda kveðjur, en starfsfólk sendir kveðjur.

 Þegar Ríkisútvarpið segir okkur (06.06.2010), að eldur hafi logað á 400 metra löngu svæði  í Heiðmörk, erum við ákaflega litlu nær. Svo er líka  svolítið einkennilegt að heyra  fréttamann tala um að eitthvað hafi gerst á Þorlákshöfn.

 ...en engar viðgerðir hafa verið gerðar, sagði fréttamaður  í hádegisfréttum RÚV (05.6.2010). Menn gera ekki viðgerðir. Í sama  fréttatíma var sagt, að næstu  daga mundu  fleiri laxveiðiár opna. Hvað skyldu árnar opna?

 Þaulvönum útvarpsmanni varð það á  (06.06.2010) að segja í  kynningu að Ólína Andrésdóttir hefði gert textann við lag Kaldalóns, Sæmd er hverri þjóð að eiga sægarpa enn. Ólína var skáldkona, en ekki textahöfundur. Hún orti ljóð.

  Hann er jafnan seinheppinn formaður Framsóknarflokksins. Hann segir  við Morgunblaðið (05.06.2010), að fyrirtækin í landinu gangi nú á gufunni einni.  Hvað á hann við ? Ganga ekki gufuvélar fyrir gufunni einni?  Gufu sem verður  til þegar  kolum eða  olíu er brennt.

  Fréttamaður Ríkisútvarpsins spurði formann þingflokks Sjálfstæðisflokksins (05.06.2010) hvort Guðlaugur Þór Þórðarson ætti ekki að segja af sér þingmennsku, eftir   alla milljónastyrkina. Það virtist ekki hvarfla, að þingflokksformanni að svara   spurningunni, - hún  malaði bara út og suður. Enn síður hvarflaði það að fréttamanni RÚV að fylgja spurningu  sinni eftir  til að freista þess að fá svar.

  Og svo heldur þátturinn ótrauður áfram, sagði þulur  Ríkisútvarpsins (05.06.2010)

 

Athugasemdir

[Þorvaldur Sigurðsson (IP-tala skráð) 6.6.2010 kl. 23:03]

Þótt mér sé ekkert sérstaklega við framsóknarmenn sem slíka vil ég þó bera í bætifláka fyrir formanninn. Hér brúkar hann „ævafornt“ orðatiltæki, sem flugmönnum fyrri tíðar amk. var tamt. Þegar bensín er á geymi myndast eimur yfir því og þegar tankurinn er tómur er bensíngufan ein eftir. Margur hafði sig til lendingar á gufunni einni saman, kannski ekki bókstaflega, en ef eldsneytið er mjög á þrotum og stutt eftir til yfirvofandi nauð- eða brotlendingar nota menn þetta orðatiltæki. John Denver söngvari til að fljúga á gufunni og drap sig reyndar á því. Hann flaug til hafs rúmlega hálft flugþolið og svo sneri hann við. Yfirleitt hafði hann sig til baka en svo rann sá dagur að gufan í tankinum þraut. Varð það hans síðasta ferð.

Svo verður gufa gufuvéla ekki til við brennslu eldsneytis heldur þegar bruni þess er látinn sjóða vatn.  Kannski tittlingaskítur en verður ekki gagnrýnandi að forðast að gefa á sér höggstað.

[Eiður Svanberg Guðnason, 6.6.2010 kl. 23:23]

 Þetta með vatnið , Þorvaldur, er auðvitað rétt, en mér fannst þetta svo augljóst, að ekki þyrfti það að nefna. Miklar efasemdir hef ég um,  að Framsóknarformaðurinn hafi hugsað þetta svona.