Molar um málfar og miðla 318

  Nýlega heyrði Molaskrifari á einhverri útvarpsstöðinni, að  talað  var  um að binda  ekki skóþvengi sína eins og  aðrir menn. Molaskrifari er á því að þetta sé mesta rugl. Í ágætri bók dr. Jóns G. Friðjónssonar, Merg  málsins, segir um skóþveng/skóþvengi : Binda  skóþvengi sína,  er að tygja sig til brottfarar. Binda ekki skóþvengi sína /skóþveng sinn lengi einhversstaðar, dveljast ekki lengi á sama stað. Vera ekki þess verður að leysa skóþveng einhvers, vera e-m öðrum langtum óæðri,  vera ekki þess verður  að gera e-m  hinn minnsta greiða. 

 Hér er væntanlega verið að rugla með orðatiltækið að binda ekki bagga sína sömu hnútum og samferðamenn,sem þýðir að vera  sérlundaður, fara sínar eigin leiðir. Í einu   kunnasta erfiljóð íslenskrar  tungu yrkir Bjarni Thorarensen svo um  séra Sæmund Magnússon Hólm:

Því var Sæmundur

á sinni jarðreisu

oft í urð hrakinn

út úr götu,

að hann batt eigi

bagga sína

sömu hnútum

og samferðamenn.

Um séra Sæmund var sagt, að hann hefði verið manna kynlegastur.

Sögnin að valda veldur mörgum  erfiðleikum, meðal annars nafnkunnum Moggabloggara,sem skrifaði (02.06.2010):Óheft íbúðalán bankanna sem ullu stórhækkun fasteignaverðs á sínum tíma.. - ollu  en ekki ullu. 

  Íþróttamenn eiga oft erfitt með að fóta sig á hálu svelli tungunnar. Íþróttafréttamaður  Stöðvar tvö  sagði (02.06.2010): .. gaf undan..  Hér er ruglað  saman tveimur  orðatiltækjum,  að láta undan  og að gefa eftir. Úr verður  ambaga.

  Algenga villu mátti heyra í  fréttum Stöðvar tvö (02.06.2010) þegar  sagt var, að  tiltekinn einstaklingur  væri  hæst launaðasti... Hér  hefði verið alveg nóg  og reyndar réttara að  segja: Hæst launaði...  eða launahæsti.

 Lögreglumaður sá stuttu síðar tölvuna í bíl sem var á ferð og handtók konuna(mbl.is 03.06.2010). Þeir eru  aldeilis fráneygir í lögreglunni !

Athugasemdir

[Sigurður Þór Guðjónsson, 3.6.2010 kl. 19:32]

Þér að segja bind ég alls ekki skóþvengi mína eins og aðrir menn. Mín aðferð er alveg unique! 

[Ben.Ax. (Benedikt Jóhannes Axelsson), 3.6.2010 kl. 19:33]

Sæll. Flest sem þú segir hér eru algengar villur og ganga aftur einhverra hluta vegna. Ég hef trúlega bent á það áður að nú er svo langt um liðið frá fornum búskaparháttum að ungt fólk þekkir þá ekki. Það er því klórað í bakkafullan lækinn og komið annað hljóð í skrokkinn. Um þann hæst launaða finnst mér fólki vera nokkur vorkunn. Um sögnina að valda dettur mér í hug gömul vísa eftir óþekktan höfund.

Saman á skeiðvöllinn skullu
og skelfingu í hverfinu ullu
er Skúli á skeið
sér skellti og reið
henni Rannveigu næstum að fullu.

[Heimir Tómasson, 4.6.2010 kl. 04:10]

Já, dagar íslensgukunátunar eru talnir. Svei því.

[Eyþór Örn Óskarsson, 4.6.2010 kl. 12:49]

hér að ofan í athugasemd 3, er skrítið orð sem ég held að sé prentvilla þ.e. "talnir" - ég reikna með að þar eigi að standa taldir - mér finnst bera of mikið á ritvillum í skrifum fólks og er það hvimleitt, ekki eru færri villur í mæltu máli og má vissulega sjá og heyra að tunga okkar á undir högg að sækja vegna þess að fólk nennir ekki að vanda sig varðand málfar - þetta sem og slettur er því miður orðið algengt í viðtalsþáttum útvarps- og sjónvarpsstöðva. 

[Elín (IP-tala skráð) 4.6.2010 kl. 13:27]

@Eyþór ... held þér hafi yfirsést eitt orðið í athugasemd #3, þó að þú bendir réttilega á að orðið 'talnir' hljóti að vera ritvilla. En margt er undarlegt með orðið 'íslensgukunátu' og tel ég að hérna sé um ískalda íroníu að ræða.

 En ekki veitir af því að benda fólki á slæmar málvillur og batnandi mönnum er best að lifa svo lengi sem þeir kjósa að læra af mistökum sínum.

[Eiður Svanberg Guðnason, 4.6.2010 kl. 13:31]

Góð vísa, Ben.Ax., er sjaldan of oft kveðin !

[Heimir Tómasson, 7.6.2010 kl. 00:45]

Þetta var reyndar kaldhæðni hjá mér já... merkilegt hvernig það fór framhjá sumum